Luk 6 | SwjSC | STEP | Wisi mosi wu gukole, Yesu ne bebingitsi bandi, bevyogilange ve gari gyambe gi putu. Bebingitsi bane, bedoke putu, negusule bipupu, bayange misu me putu.

Luke 6

Yesu ayi Fumu wisi gukole

1 Wisi mosi wu gukole, Yesu ne bebingitsi bandi, bevyogilange ve gari gyambe gi putu. Bebingitsi bane, bedoke putu, negusule bipupu, bayange misu me putu. 2 Farisi tsibe vane bambile re: «Agye nwavagile mambu me savagu wisi gukole?» 3 Yesu negubagule re: «Nusetangune mu gisangumu gi Nyambi, dyambu di Davide vage yandi ne batu bandi negulu nzale? 4 Nevubingenine gu gari kane ndagu Nyambi, abonge pembi tsi ndagu Nyambi tsi muvegitsi pagu amuvege. Avege gwandi batu babe nandi gilonge, yawu botsu bayi, nesi nane mugage Moyise wagwambili re: Ka bevegitsi be pagu begayi pembi tsine.» 5 Yesu negukunde bambile re: «Menu, Mwane mutu ni fumu wisi gukole.»

Yesu abeluse Mutu wube ne dikake divole

6 Wisi mosi gwandi wu gukole, Yesu negwingene gu ndagu ndembu, gwenenze batu musamu Nyambi. Ve garyawu, gube mutu wube ne dikake dimebagele divole. 7 Bivunde bi migage mi Moyise ne Farisi bekebange dyele digufurigile Yesu dyambu. Redibandu bemugengilange bekulabe gere agubeluse mutu wune wisi gukole. 8 Tumbe, Yesu ayabange pikile tsyawu. Vane, Yesu negwambile gibedu: «Retseme ve gari batu botsu.» Neguretseme, negube meteli. 9 Vane, Yesu negubambile re: «Nyanwivuli: Mugage Moyise wagwambili re: Wisi gukole, dwavagi diboti vo dibi, dwagobuli mutu, vo dwamusisi gufu?» 10 Vane, negugengise batu botsu, negwambile gibedu re: «Simbule wogu.» Negusimbule, Dikake dyandi negubeluge. 11 Tumbe betibe kabu yineni. Bekwambesenange yawu ne yawu dibeguvage Yesu.

Yesu asale ve gari bebingitsi digumi di bilumbi ne bilumbi bibeye

12 Wisi mosi, Yesu negwende gu mukongu. Avyose dibeti dyotsu gune negulembange Nyambi. 13 Wisi ne gutsamuge, Yesu arombe bebingitsi bandi. Asale digumi ne bebeyi. Abevege gidyanzu gyone, ne dine dyone di bilumbi. 14 Labanu mine mawu: Simu wu Yesu vege dine di Pyere ne mwane taye andi André. Sake ne San, Filipe, Bartelemi, 15 Matye, Tome, Sake mwane Alfe, Simu wa nengure giyani, 16 Suda mwane Sake ne Suda Iskaryote mutu wusumbise Yesu.

Yesu ganenzi bumongu ne gubeluse bibedu

17 Yesu negusunde mukongu ne bebingitsi bandi. Mbili bebingitsi bemubingange bekube vane ve mudembi, negusikeme. Ne batu berambugile gu Sudé, ne gu Serusaleme, ne Tyr ne Sidon yadi tsi mbeke mubu. 18 Botsu beruge gusegulu ndongi tsi Yesu, ne guse belusu. Batu bebegisungu ne menyuni mabi, Yesu akumesanze mu nyuru tsyawu. 19 Batu botsu berondange mubembe mbare ngudu yi vudugange mu yandi re yi belusange bibedu byotsu.

Diboti ne milogu

20 Vane, Yesu negugengise bebingitsi bandi, negwambile re:
«Nyambi gavagi diboti gu yenu bigaye, mba meboti me bulongu bu Nyambi menu.»
21 «Diboti gu yenu nune nzale ne kyawu, mba nugukure ne mbili biguye.
Diboti gu yenu nwalili ne kyawu, mba nugube ne mugangu.»

22 «Diboti gu yenu nwabingi mwane mutu. Gukyelu yine, batu begunuvine, begunusanze, begunusyenge, beguyunze mine menu. 23 Ve mambu mane me gulabenine, banganu ne mugangu, ginanu, mba Nyambi agunuvege mbili meboti gu yulu. Munongumosi nevu mikoku myawu bevagilange bebigitsi.»
24 «Milogu gu yenu bisine, mba nwamane dile menu meboti.»
25 «Milogu gu yenu nwadile ne kyawu mbili meboti, mba gigumbi gya rugi, nugube ne nzale. Milogu gu yenu nwasyevi ne kyawu, mba nugutsore, negulile veveni.»

26 «Milogu gu yenu, gere batu botsu be ne tangulu boti gu yenu, mba re nane mikoku myawu mivagilange ne bebigitsi bafuri.»

Girondu gu batu ba nuvini

27 «Tumbe nyanwambili, yenu nwanyulu, rondanu batu ba nuvini, bevagilyanu meboti. 28 Veganu mule batu banulogi, lembanu Nyambi gukyelu batu banukwani. 29 Gere mutu gakudimbi mbate ve direme, murigitsi dine direme gwandi. Gere mutu makubonge ngoye kutu, wuyamukale gubonge gwandi ngoyi yi gutsi. 30 Ke pagere mutu wakwivuli givave muvegi. Gere mutu makubonge givave wuyamwivule. 31 Vaganu mambu meboti gu bembatsi, nevu nwarondili re yawu gwandi benuvagi. 32 Gere nwarondi kaba nurondi, nwapikili re Nyambi agunugobise dikengi gukyelu yine? Nesi bevagitsi be bitsimbu barondi batu ba berondi. 33 Gere nwavagi diboti ka batu banuvagi diboti, nwapikili re Nyambi agunugobise dikengi gukyelu yine? Nesi bevagitsi be bitsimbu bavagi munongu mosi. 34 Gere nwasombisi doli ka batu benwapikili re begunugabusile, nwapikili re Nyambi agunugobise dikengi gukyelu yine? Nesi bevagitsi be bitsimbu basombeseni nesi yawu ne yawu. Ne gitu re mbatsi akumugabusile ve wusu. 35 Tumbe rondanu batu banuvini, bevagyanu meboti, sombisanu batu nesi nwayabi re besa benze nugabusile. Nyambi agunuvege meboti meneni, negube bane be Nyambi Yulu, mba Nyambi yandi beni, ayi muboti nesi mu batu besayabi diboti dyandi ne biyani. 36 Rigitsanu gigebe, nevu Taye enu ayivu.»

Nuyavege bembatsi mbele

37 «Nuyagele bembatsi, nonge yenu gwandi nutsatse gelu. Nuyavege bembatsi mbele, Nyambi gwandi asagunuvege mbele. Nyesanu bembatsi, nonge Nyambi gwandi akununyese. 38 Veganu bembatsi bivave bi barondi, nonge Nyambi gwandi akunuvege. Nyambi agubasise ponzi tsyenu kwange ne gulunde. Neve wavegili bembatsi, Nyambi gwandi agukuvege munongu mosi.»

39 Yesu negukunde beverile kugu: «Ne gugenze mutu ne pafu benze begise mutu gwandi wune pafu? Yawu botsu babeyi besagupudumuge gu dubile? 40 Mudyanzitsi asayabi vyagunu ne mulonzi andi. Tumbe mubingitsi wunenge dikengi gidyanzu, agube munongu mosi ne mulonzi andi. Tumbe asagumuvyogilile. 41 Agye wagengilili ka gipepeli gi dugunze gi gu disu di mbatsi, wusarelabe dikutu digu disu di ndyabeni? 42 Ndyayu wusalabi dikutu digu gari disu di ndyabeni, a gye wubenze gwambile mwane taye re: “Menu nikwamusi gusule gipepele gi dugunze gu gari disu.” Givyangi gyeni, pakile gusule dikutu di gu gari disu dyagu, avane wugulabe dikengi nevu wugusulile gipepeli gi dugunze dugu disu di mwane taye agu.»

Muri ka ne mulunde andi

43 «Muri boti wusa buri mulunde wubi. Muri wubi wusaburi mulunde boti. 44 Muri agayabegenu kane mulunde andi. Batu besasuki tsungubali mu mukumi. Dusabenze ragesenu poge mu dibale. 45 Batu botsu beboti barigitsi mambu meboti me barari gu mirime myawu. Batu babi barigitsi mambu mabi me base gu mirime myawu. Ne gungenze mambu magwambili mutu marigitsi pikile tsya rugili gu murime andi.»

Ndagu beyi

46 Yesu negukunde bambile re: «Agye nwagwarili gunenge “Fumu, Fumu”, gere nusavagi me nyanwambili? 47 Mutu wotsu warugi gumenu, wagulu musamu ami, wakobisi nyanurigitsi nevu ayivu: 48 Ayi munongu mosi ne mutu warunge ndagu, agapakili gubuke veveni kwange negu digunge nesi agutsumige mekutu. Nevu ndagu yi rungu dikengi, ve giningu gipandile, mupupe neguse yisibige, mambe me seberuse ndagu yine. 49 Tumbe mutu wagulu musamu ami wusavagi di nyagwambili ayi munongu mosi ne mutu wuserunge ndagu ve musyegi asabuke veveni mevulu negutsumige mekutu. Mupupe neguse sibige ndagu yine, vane ne vane yitige, yotsu yi panzige.»