Luk 8 | SwjSC | STEP | Sige vane, Yesu yendange mu yadi ne mu mimbu. Mbure tsyotsu akwene nenzange musamu wuboti wu bulongu bu Nyambi. Digumi di bebingitsi ne bebingitsi bebeye be yandi sale, bendange nandi.

Luke 8

Begetu bendange ne Yesu

1 Sige vane, Yesu yendange mu yadi ne mu mimbu. Mbure tsyotsu akwene nenzange musamu wuboti wu bulongu bu Nyambi. Digumi di bebingitsi ne bebingitsi bebeye be yandi sale, bendange nandi. 2 Gubange gwandi begetu bebelusu mbili mibelu, besanzu menyuni mabi ne Yesu. Gube Mari yi Magdala, wubange ne menyuni mabi mane gumereru me Yesu sanze. 3 Gube gwandi Sane mugatsi Suza yibange mutu wu bandekenange meboti me kanangu Erode, Susane ne begetu be mosi bamusange Yesu ne bebingitsi bandi ne meboti mawu.

Kugu yi muvaritsi

4 Wisi mosi, mbili batu berambugile mu mbili mimbu besebengune ve mbeke Yesu, gusegulu mambu me yandi yambilange. Neguvere kugu yiyi: 5 «Gube muvaritsi wende gu gyambe gwelage milunde mi bukulu ^{▼▼Dusebonge «bukulu» tumbe gumbu be Sife «blé».}. Ve yandi lagilange, milunde mimosi mikubonduge mu nzile. Batu be vyogilange mu nzile bekumitsarilange. Nyoni gwandi tsikuse dode milunde myotsu. 6 Milunde mimosi gwandi, mikubonduge ve digunge. Vemipakile bendile, mikumuge mba gusa mutambe dede. 7 Milunde mimosi mikubonduge ve gari kengetsi. Bukulu ne kengetsi bekubendange mbure mosi. Kengetsi tsi kuboke bukulu. 8 Milunde mimosi mi bukulu mikubonduge ve mutambe boti vemikubugile, gyambe gyotsu gibase ne bukulu. Yesu negumane vere kugu yine, ayamuge gugwambile bumongu. Yulwanu dikengi dyambu dinyarondi nwambile.»

Dibandu di Yesu ga gwambili ne kugu

9 Mwepesu kwe, bebingitsi bandi bemwivule: «A kugu yiyi yagwambili retsye?» 10 Yesu yagule re: «Nyambi senuvege gyese giguyabe mambu mesweme me bulongu bu Nyambi. Tumbe batu besa bebingitsi bami, nyabambili mu kugu nonge
batu bagengisi, tumbe besagulabe.
Bagulu mambu, tumbe besagulu dibandu di dyambu ^{▼▼Esayi 6.9}.»

Yesu kayabisi kugu yi muvaritsi

11 Yesu negwambile re, Mulunde, musamu Nyambi. 12 Milunde misebonduge mu nzile, mimunongu mosi ne batu bagulu musamu Nyambi. Tumbe Mbeni agarugi gusegusule musamu wune mumirime myawu. Nonge betsatsegube ne gitu, bekole gobulu ne Nyambi. 13 Milunde misebonduge ve digunge, munongu mosi ne batu bagulu musamu Nyambi, bamusingi ne mugangu tumbe musamu wusagwingeni gumirime myawu. Begabi ne gitu mu gigumbi, varugili meguge besakundegube ne gitu. 14 Milunde misebonduge ve gari kengetsi, batu bagulu musamu Nyambi, tumbe gigumbi neguvyoge, pikile tsibi, mugangu busine, mugangu monyu boti, migangu myotsu mine myabakigi musamu Nyambi gu mirime myawu. 15 Milunde misebonduge ve mutambe boti, mi munongumosi ne batu bagulu musamu Nyambi ne murime sigeme. Bamubandekeni mu mirime myawu. Bemunongu mosi ne bivaru byaburi mbili milunde miboti. Mutsageninu wawu, wu wuboti ve wusu Nyambi.

Kugu yi lambi

16 Gusandi mutu wabangisi lambi ne guyiswege gutsye mulumbu, vo akuyisunze gutsye tangi. Tumbe bayikobigi gu yulu mu dusongu, nonge batu bagwingeni gu ndagu bekulabe giyalele. 17 Mambu motsu mabandekenu, mesweme nekyawu meguyabisu vegiyalele. Musamu wusweme, wuguyabegenu mbure yandi wotsu. 18 Yulu anu dikengi me nyanwambili, botsu besegulu musamu ami, Nyambi agukunde bevege duyabu. Tumbe mutu wusagulu, Nyambi agumudumbe nesi diyandi beni gayabi re dinandi.

Nguye ne bane be nguye be Yesu

19 Nguye ne bane be nguye be Yesu, beserungule dukesene nandi mba gube mbile batu bemutsyenge. 20 Mutu amwambile re: «Nguye agu ne bane be nguye tsyagu begu kane barondikwene.» 21 Tumbe Yesu negwambile batu botsu re: «Botsu bagulu musamu Nyambi, bavagi motsu nevu dwufi di Nyambi dyagwambilili, nyabegobisi munongu mosi ne nguye ami ne bane be nguye tsyami.»

Yesu agaleligi mukunge

22 Wisi mosi, Yesu ne bebingitsi bandi, bekekwine gu bwatu. Negubambile re: «Gwendyanu gu disimu dine di gidibe.» Bende. 23 Ve betabulile gidibe ne bwatu, Yesu neguningile. Vane ne vane, mukunge neguvuge gu gidibe. Mambe negwingene gu bwatu, beli gubase ne mambe, beke ve leleke. 24 Bemurambuse, bemwambile re: «Fumu, Fumu dukafu.» Yesu negurambuge gyelu, neguretseme, negukenine mukunge ne mambe me gibemange. Mukunge negusikeme, mambe me gibe gwandi negusigeme. 25 Vane, negubambile re: «A gitu gyenu gigu?» Negugangu ne wome, bekumamange. Bekwambesenange yawu ne yawu re: «A mutu nye wuwu wagobisu nesi ne mukunge ne mambe.»

Yesu abeluse mutu wube ne menyuni mabi

26 Ne guduke bwatu ve gisyeni gi musyengi yi Gerasa yidisimu dine di gidibe gengeseni ne musyengi Galilé. 27 Ve Yesu sundile gu bwatu, gukuruge mutu guse mubengusene. Mutu wune ayibange ne mbili menyuni mabi gu gari andi. Mbe amatsinge ka negunangange peni asetsagenange gu ndagu ka gupesi. 28 Mutu negulabe Yesu, abambeme nandi, negwamuge, negukuteme ve wusu andi ne gumwambile re: «Yesu, nzisi kindikindi. Ndyayu wu mwane Nyambi Yulu. Nyakulembigi wuyakengise.» 29 Yesu mbe amavege dinyuni dibi dignyange di guvuduge mu mutu wune. Mba mbili nyongu agondungu ne dinyuni dibi. Gu gumubandekene, batu bekumutunge mekake ne pange, bekumugomine bivangu mu byeru. Tumbe menyuni mabi mekumuvegange ngudu tsi gutabule pange ne gurubule bivangu dinyuni dibi diku mubegisange kagwe netsagene vike. 30 Yesu negumwivule re: «Dine dyagu nye?» Dinyuni dibi ne negwagule re: «Nyanengure Gigondu.» Ayambile nane mba abegisungu ne mbili menyuni mabi. 31 Menyuni mabi melembige Yesu nonge akolebetinde gu nzugu yi menyuni mabi ya nengure dubile. 32 Gube vane mugambe ngulu wuyange bivaru gu mukongu. Menyuni mabi mane melembige Yesu gere asebesanze gu gari mutu wune, abetindi gu gari ngulu tsine, Yesu negube singisile. 33 Avane, menyuni mabi mevuduge gu gari mutu wune, mingene gu mugambe ngulu. Mugambe wotsu wu ngulu, wende mbangu wusunde mukongu, wende gweputeme gu gidibe, wotsu wufu gu mambe. 34 Batu bebandekenange ngulu tsine, negulabene dyambu dise vage Yesu, bende mbangu gwenegwambile batu botsu mu yadi ne mimbu me Gerasa dyambu dibeselabe. 35 Vane, batu bulu gilombi gine, bende gwelabe yawu beni nevu disevyogile. Neguvuduge gu Yesu, beragesenu mutu wutsibange ne menyuni mabi metsagele ve mbeke Yesu, negulungu ndongi tsyandi. Amadware bidwaru biboti, dinyuni dya sigeme, amabeluge. Batu negulabe gimage gine bekulu wome. 36 Mbeyi tsi labe mambu mane, tsyambile bembatsi neve Yesu asegobulile mutu wutsibange ne menyuni mabi.

37 Vane, batu botsu be musyengi Gerasa begangu ne mune wome, bambile Yesu re: «Yusuge gumbu gyetu.» Yesu negunangeme gu bwatu ne bebingitsi bandi ayene gabuge. 38 Mutu wobulu menyuni mabi ne Yesu amulembige: «Nibenze gwende nagu?» Tumbe Yesu negubuse amwambile re: 39 «Gabuge gu gifumbe gyagu, yende gwebambile motsu me Nyambi sekuvage.» Mutu wune ayende gwe negwambile batu botsu mu yadi motsu me Yesu semuvage.

Mwane mugetu wu Jairus ne mugetu wu bembe gidwaru gi Yesu

40 Batu botsu bevingilange Yesu disimu dine di gidibe. Neguruge batu bemusambegene ne mugangu. 41 Vane, gube mutu wa nengure Jairus ayibange givunde gi ndagu ndembu, akuruge gusekutemine Yesu nonge akwende gu ndagu andi. 42 Mba ayibange ne mwane andi dikike wu mugetu. Mbe akene gindande gi digumi di mipume ne mipume mi beyi, abelange beli gufu. Ve Yesu yendilange gu mbu Jairus, akubakigungu ne mbili batu. 43 Vane, ve gari batu bane, gube mugetu wubelange nzime tsungi yisekamugange mu digumi dimipume ne mipume mi beyi. Amane doli ne meboti mandi motsu negwene bugu, tumbe gusabe mutu wumubeluse. 44 Negubambeme gu nzime Yesu, abembe gutsweminine mbeke gidwaru gyandi, vane ne vane, nzime tsungi negukamuge abeluge. 45 Vane, Yesu negwyvule batu bemutsyengage: «Nye sembembe?» Yawu botsu negwambile re: «Sa yetu.» Pyere negwambile re: «Fumu, mbili batu bakubakigi mu tsyelu tsyotsu a gye wakundi gwyvulile?» 46 Tumbe Yesu negwambile re: «Nyayabi re gu mutu sembembe mba ndure du belusu yavuduge mu nyuru tsyami.» 47 Mugetu wune neguyabe re amayabegenu neguruge ne wome, neguregeme gusekutemine Yesu. Negwambile ve misu me batu botsu re: «Nzebelange re dibandu nzemubembile, vane ne vane nibeluge.» 48 Yesu negumwambile re: «Mwane ami, neve wusepagile gitu, wabeluge. Yendange pembi ne polu.»

49 Yesu mbe kyagwambili ne mugetu wune, re va rugile gilumbi girambugile gu ndagu Jairus. Negusemwambile re: «Mwane agu amafu. Wuyakunde tsugise Mulonzi re ayendi gu ndagu agu.» 50 Tumbe Yesu negulu nevu gilumbi yambililange Jarius, negumwabile re: «Wuyadede nyuru, bange kane gitu re nigumubeluse.» 51 Yesu ne batu bendange nandi konge neguvuduge gu ndagu Jarius, Yesu ase ronde re mbili batu bingini gu ndagu yibange mwane wubelange vengu ka Pyere, San, Sake, tayi ne nguye mwane. 52 Batu botsu babe vane beku lilange beku nyongange. Nesi begwingene gu ndagu, Yesu negubambile re: «Nuyalile, volanu, mwane asafu ayigyelu.» 53 Batu botsu beyabange re mwane amafu. Redibandu bedokilange Yesu. 54 Tumbe Yesu negubambeme ne mwane, negumugange ve dikake, negwamuge re: «Mwane, rambuge.» 55 Dinyuni dyandi negumugabugile, neguvefume. Vane ne vane negutsagene. Yesu neguvege biburu bi mwane dinyange digu muvege biguye. 56 Biburu bi mwane bekumame. Yesu negubambile re: «Nuyagwambile mutu dyambu di nuselabe.»