Luk 9 | SwjSC | STEP | Yesu negugukige digumi di bebingitsi ne bebingitsi be bebeyi, abevege ndure ne dinyange di gusanze me menyuni mabi, ne ngudu yi gubeluse bibedu.

Luke 9

Yesu agarumi digumi di bebingitsi ne bebingitsi bebeyi

1 Yesu negugukige digumi di bebingitsi ne bebingitsi be bebeyi, abevege ndure ne dinyange di gusanze me menyuni mabi, ne ngudu yi gubeluse bibedu. 2 Vane, abambile re: «Yendanu mu mimbu menzusu gwenenenze musamu bulongu bu Nyambi ne gwenebeluse bibedu.» 3 Yesu ne gwambile bebingitsi bandi nesi begwende gumuvevilu re: «Nuyabonge kepagere givave, nesi duvengu, nesi pengi, nesi giguye, nesi doli, nesi ngoye beyi. 4 Kepagere ndagu yi yenu nugwingene, tsagenanu gu ndagu yine kwangene venu gwendile. 5 Mbure tsyotsu tsi batu be gubuse re nutsageni gu ndagu tsyawu, ve nuguvudugile gu ndagu yine, kukumunanu difufundu di byeru byenu. Gubebigise re Nyambi agu betabulile bubanze.» 6 Bebingitsi be Yesu bende mu mbili mimbu mi musyengi Galilé. Bene nenzange musamu boti. Mbure tsyotsu tsyawu bendange bekwene labisange bimage negubeluse bibedu.

Erode akadumi Yesu

7 Vane, Erode, ngowu yi Galilé ne gulu mambu ne bimage bi Yesu vagange asekuyabange dyambu ne pundu. Pikile gutsyemuge. Mba bemosi bambilange gukyelu Yesu re: «San amarambuge gu dufu.» 8 Befimbe bambilange re: «Eli amakunde labene.» Bane gwandi re: «Mubigitsi wu gulu amakunde rambuge gu dufu.» 9 Tumbe Erode akekwe kwambilange re: «Nitabuse muru San batiste. A mutu nye wune wunyagulu wadyanzi mambu me bimage mane?» Akukebange gumwene.

Yesu alise toseni yiranu tsi batu

10 Bilumbi bi Yesu negugabuge gu muvevilu wu yawu bende, bese mwambile mambu motsu me yawu bevage mu mimbu. Yesu negubebonge, bende ve mbure yigukeme yisa batu beli ve mbeke yadi yi Betsaida. 11 Mbili batu neguyabe re Yesu amagwende bemubinge. Yesu abevagere: «Ruganu gusegulu musamu bulongu bu Nyambi.» Botsu bebelange Yesu akubebeluse. 12 Tsisige, bilumbi byandi negubambeme nandi, negumwambile re: «Gabuse batu nonge bekwende mu mimbu ne mipindi mi mumbeke beku dile mbure yigu ningilile ne biguye. Mbare vave duve kumu.» 13 Yesu negubambile re: «Bevegyanu yenubeni biguye.» Tumbe yawu negwambile re: «Dukane pembi yiranu ne bisonzi bibeyi. Ka dwende yetubeni gwesumbe biguye bi batu botsu babe.» 14 Vane, gube gotsu toseni yiranu tsi batu, Yesu negwambile bebingitsi bandi re: «Betsagenisyanu mu milongu mi megumi meranu me bebagele.» 15 Bevage neve ayambilile betsagenise batu botsu. 16 Yesu negubonge pembi tsyeranu ne bisonzi bibeyi, negugengise gu yulu negugabusile Nyambi diboti gukyelu biguye. Atabule pembi tsyeranu ne bisonzi birini. Negubivege bebingitsi bandi beku gabile batu botsu. 17 Batu botsu neguye negukure. Gukunde salilu digumi diponzi ne ponzi beyi tsibase ne birini bi pembi ne bisonzi.

Pyere amagwambile re Yesu Kriste mugobutsi wu Nyambi asebyatse

18 Wisi mosi, wu Yesu lembange vike, bebingitsi bandi babe vembeke andi. Negumane lembe abivule re: «A batu botsu bagwambile re menu re nye?» 19 Yawu botsu bagule re: «Wu San batiste, bemosi re ndyayu wu Elie, befimbe re ndyayu wu mubigitsi wumosi wugulu warambuge gu dufu.» 20 Yesu negubivule re: «A yenu, menu re nye?» Pyere negumwagule re: «Ndyayu wu Kriste mugobutsi wu Nyambi asebyatse.»

21 Yesu negubevege dinyange re, nuyagwambile dyambu dine kepagere mutu. 22 Negukunde bambile re: «Nonge menu Mwane Mutu akengi veveni, aguvinu ne bivunde bi dibundu, bi bevegitsi be pagu ne bi migage mi Moyise. Nonge batu bemuboki, wisi mureru agurambuge gu dufu.»

Nevu babingili Yesu

23 Vane, ayambile batu botsu babe: «Pasi gu mutu warondi mbinge, abusi binge mambu me yandi beni garondi guvage. Ayibi akike wisi wotsu gu gusindile mukengu kwangene gu dufu, abingi nzile yi menu nyavyogili.» 24 Mba kepagere mutu warondi bandekene monyu andi ve butambe agutsyemuse monyu yi mwendu ne mwendu. Tumbe kepagere mutu wapagili gitu, wasise mambu motsu me butambe gukyelu ami, agudenge monyu yi mwendu ne mwendu. 25 Pasi mutu ane mbili meboti me bulongu mu butambe, tumbe gere asane monyu mwendu ne mwendu, pasi amafu meboti mane mekine musumbwa? Nesi. 26 Kepagere mutu wu gunyulu gisoni, wugulu ndongi tsyami gisoni menu gwami Mwane Mutu nzagumusinge ve nigurugile ne bundumbe bwami, bu tayi ami ne bu byanze bi Nyambi. 27 Nyanwambili bureti, batu bemosi be vave, nesi begufu begube mbeyi ve bundumbe bu Nyambi bugurugile mu bulongu.

Gidimu gi Yesu gyakaluge

28 Yesu ne gumane gwambile bebingitsi bandi, tsufu ginane neguvyoge, abonge Pyere, San ne Sake, bepande gu mukongu gwelembe. 29 Ve Yesu lembilange, ginengu gyandi negukaluge gidimu bidwaru byandi bikube ne dufugu duneni dwabangi. 30 Vane ne vane, batu bebeyi belabene bekwambilange nandi, Moyise ne Elie, 31 mu bundumbe bu Nyambi. Bambilange ne Yesu neve agumanine gidyanzu gi Nyambi murumine mu butambe, ve agusegufilu gu Serusaleme. 32 Pyere ne bembatsi bandi beningile gyelu gineni. Negurambuge, belabe Yesu akavedemi ne bundumbe bwandi ne batu babeyi ve mbeke andi. 33 Gigumbi gi Moyise ne Elie bepasugile ne Yesu, Pyere negumwambile re: «Fumu, dinonge re dubyanu vave. Durungi anu mesambe mereru. Dimosi dyagu, dimosi Moyise, dimosi di Eli.» Tumbe ve yandi yambilange nane aseyabange di ayambilange. 34 Ve Pyere yambilange, dimungi dikutsebefugemine yawu botsu. Bebingitsi be Yesu bekugangu ne mune wome. 35 Gu gari dimungi gukulunu dyufi dikwambile re: «A wuwu, mwane ami wu menu nzesale mugobisi anu mulilu anu.» 36 Dyufi di Nyambi ne gulunu, bebingitsi be Yesu bekulabe Yesu masale vike betsibige minu, beseyambile kepagere mutu gigumbi gine motsu me yawu belabe.

Yesu gabelusi mwane wune dinyuni dibi

37 Wise ne gutsamuge, Yesu ne bebingitsi bandi bareru besunde gu mukongu gubabe. Mbili batu beruge gusemubengusene. 38 Vane, vegari mbili batu bevingilange Yesu, gube mutu wamuge veveni: «Mulonzi kokolu tsyagu, gengise mwane ami dikike. 39 Ve dinyuni dibi dyamugangilingi, akwamugange, akutabugange nyambu, divusi diku vudugange gu munu. Disamusisi mbangu mbangu, dikumutsungulange. 40 Nzelembige bebingitsi bagu re besanzi dinyuni dine, tumbe besarungule.» 41 Yesu negwagule ne kabu re: «Dilale di batu besavagili Nyambi gitu, batu babi. Kwangene gigumbi gye? Nigubange nenu, nigunusindile? Bege mwane agu gunu.» 42 Gigumbi gi mwane bambemange ne Yesu, dinyuni dibi negumuberuse vetsi, negumutabuse nyambu. Yesu negukenine dinyuni dibi, negudisanze mu mwane wune. Mwane negubeluge. Yesu negumusambule taye andi. 43 Batu botsu babe vane bekumame neve Yesu abelusile mwane wune, ne ndure neni yi Nyambi.

Yesu mayabise dufu ne durambugu dwandi du dufu

Gigumbi gi batu bemamange mambu me Yesu vagange, negwambile bebingitsi bandi re: 44 «Yenu, yulwanu dikengi dyambu di nyanwambili: Menu Mwane Mutu nigusaku mu mekake me batu bapini.» 45 Tumbe bebingitsi be Yesu beseyulungu dyambu di yandi yambilange. Mba disumu di dyambu dibange disweme gu yawu. Bedumange gu mwivule disumu di dyambu dine.

A givunde nye?

46 Vane, bebingitsi be Yesu bekusosange gu guyabe givunde ve gari awu. 47 Yesu neguyabe pikile tsi mirime myawu, negubonge mwane mugegi amubege ve mbeke andi. 48 Yesu negubambile re: «Kepagere mutu wabandekeni mwane mugegi gukyelu ami, mebeni agabandekeni. Wotsu wambandekeni agabandekeni gwandi mutu wusetume. Mba wotsu wu mugegi ve gari yenu botsu yandi re givunde.»

Mutu wusa nuvini ayi mutu wenu

49 San negwambile Yesu re: «Fumu, duselabe mutu wasanzi menyuni mabi ne ngudu yi dine dyagu. Dusemugandise mba asa mu dibundu dyetu.» 50 Yesu negumwambile re: «Nuyamugandise, mutu wusanuvini giburu gyenu.»

Dimbu di Samari dibuse Yesu

51 Gigumbi gi tsufu tsi Yesu gupande gu yulu negugogule, Yesu akube ne dibagi digwende gu Serusaleme. 52 Arume gu wusu andi bilumbi. Negwende, bingene gu dimbu di Samari gwetsonzige ndagu ne tugu yi Yesu ne bebingitsi bandi. 53 Tumbe betsige be dimbu dine bekubuse re Yesu atsageni gu dimbu dyawu mba ayendange gu Serusaleme. 54 Bebingitsi be Yesu, Sake ne San, negulabe nane bekwambile re: «Fumu, warondi re dwivuli Nyambi re asunzi ruvi du yulu dukusebenyenze?» 55 Yesu negugeluge gu yawu, negubesyembe. Abambile re: «Nu ne mbele yi gupikile nane.» 56 Yesu ne bebingitsi bandi bende gu dimbu dinzusu.

Batu barondi binge Yesu

57 Ve Yesu yendilange ne bebingitsi bandi, mutu kubambene nandi negumwambile re: «Mbure tsyotsu tsi ndyayu wugwende, nigukubingange.» 58 Yesu negumwagule re: «Bibagu bene midunge mi baningilili, nyoni bene mubu. Tumbe Menu Mwane Mutu nzane mbure yi guningilile.»

59 Negwambile mutu wufimbe: «Mbingi.» Mutu wune negumwagule re: «Fumu, kinzise nikyetsige tayi ami.» 60 Tumbe Yesu negumwambile re: «Sise batu bene menyuni mafu gwetsige bibindi bi biburu byawu. Ndyayu yende gwenenze musamu wu bundumbe bu Nyambi.»

61 Mutu mosi gwandi negumwambile re: «Fumu, nigukubinge, tumbe kinzise nikyelagile biburu byami.» 62 Yesu negumwagule re: «Pasi mutu amapakile gidyanzu ayakunde gengise nzime munongu mosi ne mutu wa pakili mbinge. Pasi amakunde pikile monyu andi yi gulu gidyanzu gyandi gisagube giboti gu bulongu bu Nyambi.»