Pro 7 | TBG | STEP | Ti maaquo, koqemakera nena avu aatoqi ti uva vara vataana.

‏ Proverbs 7

1 Ti maaquo, koqemakera nena avu aatoqi ti uva vara vataana. 2 Te ariara minti mintiane tuna uvara, are vi uvara iriqira virera, are koqema kera variqira vinara. Are nena avuqaa koqema kera raqikinantema kera, ti uvaqaavata raqikiharama kia ti uva voqavata tauru karaitira, ekaa vi uvara iriqira vuana. 3 Ringivano ekaa enta ai kauqu vuqaqi vainantema kera, are ti uva maa, nena avu aato muntukaqi vataane.

4 Koqe avu aatora mintima tiane: Are ti nakaava koqevama variaro, tiane. Vo okara vo okara kankomake iri tave vairara are mintima tiane: Are ti tonti koqevama variaro, tiana.

5 Are mintima kera tiraro vitanta ai antua amite vaivara are kia oru vo vaiinti naata hampata niraitira, are vi nahentiva ai minta ireva ina uvaravata kia ho irinara.

Vora naatavano hampi ni okarara tura

6 Vo enta te tenta naavuuintuanahai vutu 7 tavauramanta qaraaka vaiinti kia koqe avu aato vataaka aaraqaa ni variarave. Vikaqihairo vovano, viva kia qora okarave koqe okarave iri tave vai vaiintiva 8 aara kaantaraqaa nahenti vira naavu aumanto oruntovaro 9 enta ire ivaro 10 vi nahentiva aaranahainaa nahenti utavaaqa voqaara nonku varero, vevantero vi vaiintira minta ireva auti vairave.

11 Vi nahentiva voqama kero hampi kaiqa vare vaiva vaiharo, viva kia koqema kero naavuqi oquvi vairaitiro, 12 ekaa entamaaketiqive, aaraqaave, niharo vaiintiara rante vai nahentiva vaira.

13 Te tavauraro vi nahentiva qaraaka vaiinti vira ravaaqavu kero kia kauriraitiro, vira moqakero virara tiharo, 14 Vate te aantau mati Kotiraofaa amitaunaraqihai hini mati untataurava ti naavuqi vaivo. 15 Mintiverama te tenta naavuqihai vevante ai rantarera tuvuraukama, tuvu ai ranta kauro.

16 Te tenta vaitaaina taintara qeramake vate, koqe tavuna Isipiqihai aututaara, vokalaa vokalaa vaira vi taintaraqaa vuqite, 17 koqe unta i haikara, vopauraa vopauraavata vi taintaraqaa rauruke vatauro.

18 Are tintira aniraqe tetanta oru naavuqi vaiha quaheha ruhe tutiqamaqi vivitanta aatita kaare.

19 Are kiama ti vaatiara qetaane. Viva niara aaraini vivo. 20 Viva airi monu varero vivara tiro, taarauiki aitarairaroma viva orurantero anianarove, tiro.

21 Minti tivakeharo vi nahentiva airi uqerara uvaqohairo vi vaiintira mintama varero nai naavuqi vira.

22 Purumakau vita vare vuru arukareka iantema kero, vaakama vi vaiintiva vi nahentira uva iriro, vira avata varero vira.

Diaavano vaara vuitaaraqi oru aru viro qaqi vaimanta 23 vevaqohai vira arukaantema kero, vi vaiintiva vi nahentira avata varero vira.

Uvirivano vaara vuitaaraqaa aru vintema kero, vi vaiintiva mini vira. Vi vaiintiva kia nai vaaka qutu vuainarara kankomakero iriraitiro, mini vira.

24 Ho ti maaquvarao, ne koqemake aato vatehama ti uva iriate.

25 Ni muntukavano minti nahentikara variantorave ti, ne kia vika avataqi vuata.

26 Vi nahentika minti variara kaara airi vaiinti qoraiqamavi quti variara.

27 Vi nahentira naavuqi vi varia aarava vaireva, qutu vuaka vi varianaini vua aaravama vairo. Ne vi aararaqaa vivera, ne vaakama qutu vivara.