Psalms 41
1לַמְנַצֵּחַ מִזְמוֹר לְדָוִֽד׃ 2 ▼▼English Ref=41.1
אַשְׁרֵי מַשְׂכִּיל אֶל־דָּל בְּיוֹם רָעָה יְֽמַלְּטֵהוּ יְהוָֽה׃ 3 ▼▼English Ref=41.2
יְהוָה׀ יִשְׁמְרֵהוּ וִֽיחַיֵּהוּ יֶאְשֹּׁר ▼▼For Ketiv יֶאְשֹּׁר Qere= וְאֻשַּׁר
בָּאָרֶץ וְאַֽל־תִּתְּנֵהוּ בְּנֶפֶשׁ אֹיְבָֽיו׃ 4 ▼▼English Ref=41.3
יְֽהוָה יִסְעָדֶנּוּ עַל־עֶרֶשׂ דְּוָי כָּל־מִשְׁכָּבוֹ הָפַכְתָּ בְחָלְיֽוֹ׃ 5 ▼▼English Ref=41.4
אֲֽנִי־אָמַרְתִּי יְהוָה חָנֵּנִי רְפָאָה נַפְשִׁי כִּי־חָטָאתִי לָֽךְ׃ 6 ▼▼English Ref=41.5
אוֹיְבַי יֹאמְרוּ רַע לִי מָתַי יָמוּת וְאָבַד שְׁמֽוֹ׃ 7 ▼▼English Ref=41.6
וְאִם־בָּא לִרְאוֹת׀ שָׁוְא יְדַבֵּר לִבּוֹ יִקְבָּץ־אָוֶן לוֹ יֵצֵא לַחוּץ יְדַבֵּֽר׃ 8 ▼▼English Ref=41.7
יַחַד עָלַי יִתְלַחֲשׁוּ כָּל־שֹׂנְאָי עָלַי׀ יַחְשְׁבוּ רָעָה לִֽי׃ 9 ▼▼English Ref=41.8
דְּֽבַר־בְּלִיַּעַל יָצוּק בּוֹ וַאֲשֶׁר שָׁכַב לֹא־יוֹסִיף לָקֽוּם׃ 10 ▼▼English Ref=41.9
גַּם־אִישׁ שְׁלוֹמִי׀ אֲשֶׁר־בָּטַחְתִּי בוֹ אוֹכֵל לַחְמִי הִגְדִּיל עָלַי עָקֵֽב׃ 11 ▼▼English Ref=41.10
וְאַתָּה יְהוָה חָנֵּנִי וַהֲקִימֵנִי וַֽאֲשַׁלְּמָה לָהֶֽם׃ 12 ▼▼English Ref=41.11
בְּזֹאת יָדַעְתִּי כִּֽי־חָפַצְתָּ בִּי כִּי לֹֽא־יָרִיעַ אֹיְבִי עָלָֽי׃ 13 ▼▼English Ref=41.12
וַאֲנִי בְּתֻמִּי תָּמַכְתָּ בִּי וַתַּצִּיבֵנִי לְפָנֶיךָ לְעוֹלָֽם׃ 14 ▼▼English Ref=41.13
בָּרוּךְ יְהוָה׀ אֱלֹהֵי יִשְׂרָאֵל מֵֽהָעוֹלָם וְעַד הָעוֹלָם אָמֵן׀ וְאָמֵֽן׃
Copyright information for
THOT