1Pe 5 | TLF | STEP | (Jon 21:16, Ap 20:28, 1 Tim 3:1-13, 4:6-16, 5:17-22, Tat 1:5-9) Kale Kristen unang tinum imi kamok kamok ibaa. Nagal mungkup Kristen unang tinum imi kamok no kale, niyo ilipmi tinum kanube kamok ke albip ilitap kale, nagal nalami tiin fala Krais iyo atama-bilita, at diim uyo kaal fuyap uyo ku kaan-se kale, ulutap son-temu uyo, Krais imi asok tal kafin diim e tala unang tinum iyo atamipta, beyo win so kela kalaa agelan-temip uyo, iso niso maagup win so kelan-temup kalaa age-nilita, kamok kamok ibo weng kobelita o ageta kupka-e-bii ko.

‏ 1 Peter 5

Fita imi bogo-nala, “Kamok ibo God imi unang tinum iyo tiin mo-bom-nilipta o,” agesa uta ko

(Jon 21:16, Ap 20:28, 1 Tim 3:1-13, 4:6-16, 5:17-22, Tat 1:5-9)

1 Kale Kristen unang tinum imi kamok kamok ibaa. Nagal mungkup Kristen unang tinum imi kamok no kale, niyo ilipmi tinum kanube kamok ke albip ilitap kale, nagal nalami tiin fala Krais iyo atama-bilita, at diim uyo kaal fuyap uyo ku kaan-se kale, ulutap son-temu uyo, Krais imi asok tal kafin diim e tala unang tinum iyo atamipta, beyo win so kela kalaa agelan-temip uyo, iso niso maagup win so kelan-temup kalaa age-nilita, kamok kamok ibo weng kobelita o ageta kupka-e-bii ko. 2 Kale ibo God imi unang tinum iyo tambaliim kup tiin molip ipmi sagaal diim kal kong sipsip ilitap bom-nilip e, ipmi weng uyo tinangka-bom ke-bilipta o ageta kale, tinum migik ita tebe, “Ibo kamok kelin o,” age asit kup ibo ulaa imdulip ipkil bisop kanuman-temip boyo mafak e minte, ipmi aget uyo, ogok boyo ke-bom-nulupta, tisol uta kwaamum o agan-kalin ba kale, ibo ogok bomi aget uyo ugaa kwaa-nilipta, kanupmin ogok boyo God ilami, “Bota kanumin o,” agan-be uta kup waafu-bom deng tebe-bom-nilipta, dital fagaa kanumin o ageta ko. 3 Kale ipta kamok ke-nilipta, unang tinum God tebe ulu kulep yak ilipmi sagaal diim tola tiin mobip bilip iyo imdaak tamalin o ageta ba kale, ibo kuguup tambal uta kup God imi unang tinum ko age sipsip iyo kupka-e-bom ilep tambal uyo kafale-bom no ke-bilipta, utam-nilipta, igil ipmi kuguup kanu-bilip bota waafuu kwep tebe-bom-bilipta o ageta kale, 4 kanube kamogimal ibo bota kanumip umdii, son-temu nala sipsip tiin molin imi kamok ko age Krais iyo tal kemanan-tema kota, ipmi atin suun kup tambaliim nan-temip uyo ku-nilipta, mufekmufek yuut tiine-bom ita ita kela kalaa age-nilip kupka-ebip ulutap ke kulipta, boyo suun kup tambaliim nan-temu ko.

Numi nugumal imi afak tem iinemin umi sang uta ko

(Mat 6:25-30, Ef 6:11-13, Jems 4:7, Rev 12:3,9,17)

5 Kale ulutap aa mungkup, man tinum maat ipkil kamok kamok imi weng uta kup tinangka-bom-nilipta, ibo kutaang uyo tebemin ba kale, ibo bilili agan-kalin aget uta waafu-bom-nilipta, tiin kwep yak duup-afin Kristen kelin imi, “Bota kanubelin o,” agan-bilip umi diim uta kup to-bom-nilipta o ageta kale, ipkil utamsip kale, God imi suuk kon tem uyo bogo-nulu kano,

“God iyo tebe unang tinum kutaang tibin ita waasi kebe im-kaga-bom-nala e minte, unang tinum aget bilili age-bom ipkumal imi afak tem iinemin ita God iyo inal o age dong daga-em-nuuba o,”

agesu ko. 6 Ulutap kale ibo God imi diim uyo kutaang tebemin ba kale, ipmi aget tem uyo bilili age God imi afak tem iinom-nilipta o ageta kale, God beyo titil afek uyo albu kale, iyo tebe tii ibo tiin molan-tema kale, ulutap mungkup, God imi son-temu nala Yesus iyo asok daala tal kafin diim tolon-tema kota, ipmi ilami afak tem iinsip uyo utam-nalata, ibo ulaa imdep mitam ifo-nalata, win so kelip imkalan-tema kale, 7 yagal tebe ipmi ilak uyo duga-bom tiin mo-boma kale, alugum ipmi aget kwiin tagang taga-bom aget iluum tebemin uyo kwaalip yak ilami sagaal diim abelu kupkalipta, yagal boyo telela imolak o ageta ko.

8 Kale ipmi waasi Saatan iyo pusi afek atul tebesa ko age layon tebe, tinum iyo maak itamta ano unelan o agan-bom fomtuup olan tiinan-boma ilatap kale, Saatan beyo, ibo ifak dagaman o age-nalata, kanum tiinan-boma kale, ibo aget uyo tele fugun-bom bigi-bom-nilipta o ageta ko. 9 Kale alugum ipmi duup Kristen unang tinum imi kafin kaa kutufosu komi albip iyo ipmi kaal fuyap kugan-bilip ulutap ke-bilip boyo ibo utamsip kale, ibo atin God imi ilak uyo do-nilipta, titil fagaa Saatan iyo fot tebelip yak iine-balata o ageta ko. 10 Kale God beyo suun kup nuyo kuguup tambal uyo kupka-e-boma kale, beyo tebe-nalata, ibo Krais imi diim uyo febalip kalaa age-nalata, olabelita, meng nimi miit tem uyo suun kup nin o age-nalata, ibo olabe-se kale, ibo kaal fuyap uyo kugan-siit ilugolipta, aaltam kota God yagal tebe ipmi kuguup so minte aget tem so uyo atin telela kobe-nala e, ipmi aget fugunin so Krais imi ilak dugamin so uyo kuntuk mobe no kelata, titil fagalan-temip ko. 11 Kale beyo titil afalik uyo imi diim kal nin kup bomu kale, bemi deng uyo tebe-bom-nulupta o ageta kale, bota kup kwa.

Mufekmufek iip maak maak umi sang uta ko

(Rom 1:7, 2 Tim 4:11, Rev 17:3-6)

12 Kale nimi aget fugunin uyo, Sailas iyo fen nulumi duup Krais imi ilak dolin tinum kalaa age-nilita, beta dagalita, dong dogopne suuk kon duumaat keyo dola dopnelata, ipmi daabeli no talak o ageta kale, ipmi aget fugunin uyo dong dogobelita, tambalanepmuk o age-nilita, bogobelita, dola dopnela ko. Kale nimi weng bogobeli boyo, God imi tebe atin ki kuguup tambal kup ipmi kupka-e-boma umi sang uta fomtuup bogobeli kale, ibo, God iyo kanu-e-boma kalaa age-nilipta, ibo bisat kup-kagamin ba kale, dital fagaa waafu-bom-nilipta o ageta ko.

13 Kale Kristen unang tinum abiip Babilon kaa albip iyo God tebe ipso mangkal ninggil maagup ulu-se kale, kalip iyo ipmi weng umobe kwaalip no tulu e minte, tinum maak nalami magat degelmin man ilatap bemi win uyo Jon-Mak o agan-nuubip kale, begal mungkup ibo weng umobe kwaala no tal no kelu ko. 14 Alugum ibo Kristen unang tinum nulumi aget kobina tala kemin umi kuguup uta ku-nilipta, ipkumal iyo fet duga-e-bom imtal migi una tala ke-bom-nilipta o ageta ko.

Alugum ibo Krais imi unang tinum kale, God iyo dong daga-e-balata, ipmi aget tem uyo bilili age-bom tambaliim kup bom-bilipta o ageta ko.