3Jo | TLF | STEP |

‏

3 JON Jon imi suuk kon asuno dola kosa uta ko

Yesus iyo tam abiil tigiin unata, bii atol ulumi kup 60 umaak e? 70 umaak e? yak iinuta, Jon iyo suuk kon tem weng koyo dola ko kwaapma no imi duup maak Gayas imi diim abesu ko. Kale tinum iyo God imi weng uyo kwep baga-em tiine-bilipta, Gayus iyo dong daga-e-be kalaa age-nalata, Jon iyo bogobe-nala e, “Suguul o,” age-nala e minte, tinum migik Diotrefes imi kuguup mafak bomi sang uyo bogobe-nala e, “Kanupmin kuguup bo kanumin ba o,” age no kesa ko.

‏ 3 John

1 Nimi tinum Gayus, nimi bubul kabo nuubap aga? Niyo Kristen unang tinum imi tiin molin tinum imi kamok nita kale, suuk kon koyo kapmi dola kopkelan o ageta ko. Kale niyo tuluun kapmi aget bubul uyo kopke-sii ko.

2 Num kabe. Niyo kapmi ogok uyo tambaliim felep unuk o age-nili e minte, kapmi dam uyo kapmi God imi ilak dugamin umi tambaliim albu ulutap ke tambaliim bom-buluta o age no ke-bii kale, niyo beten keke-bom God imi dagagan-bii ko. 3 Kale am maak daanu e, Kristen tinum iip maak maak iyo tal bogopne-nilip e, “Gayus beyo tol kup tebesa tinum ke-bom-nala e minte, suun kup God imi tuluun weng uyo waafu-bom no ke-be o,” agelip tinangku-nilita, deng kup tebebi ko. 4 Niyo tinangkulita, bogo-nilip e, “Kapmi okumop man iyo God imi tuluun weng uyo waafubip o,” agan-bilip kalaa agan-kali umdii, deng kup taban-nuubi kale, nimi kanupmin okumop man kulip imi deng taban-nuubi boyo nimi mufekmufek migik migik umi deng taban-nuubi uyo kubaganuta, uta uta kebu ko.

Gayus imi ipkumal dong daga-emin umi sang uta ko

5 Nimi nugum kabe. Kapmi ogok bo tambaliim kup ke-bom-nalap Krais imi unang tinum iyo tambaliim kup dong daga-e-bom-nalap e, unang tinum itamsaalap binim ku sino dong daga-e-bom no kem-nuubap boyo tambaliim ko. 6 Kale koyo tinum maak tal Krais imi unang tinum iyo bogobe-nilip e, kapmi fital telemin imi aget kupka-e-bom dong daga-e-bom no ke-balap bomi sang uyo bogobebip kale, kabo God imi ogok waafubip bomi aget uyo tele fugun-bom ilep unon-temip umi iman sino mufekmufek sino uyo dong dogobelap umdii, boyo felepman-temu ko. 7 Kale bilip imi abiip uyo kupkaa God imi ogok waafuu kwep tiinan-bilip uyo, Yesus Krais imi ilak dosaalip binim imi mufekmufek dong daga-emin kopmum o agelipta, “Waago o,” age kupkaa bisop tiinan-bii talbip ko. 8 Kale Krais imi unang tinum nugol bilip iyo dong daga-e-bulupta, bilip iyo God imi tuluun weng baga-emin umi ogok bo waafuu kwep tebe-bom-bilipta o ageta ko.

Diotrefes bemi kuguup mafak waafusa umi sang uta ko

9 Siin uyo weng katip maak dola ko Krais imi unang tinum imi kobe-sii kuta minte, Diotrefes iyo, niyo win tibin kelita o agan-bom-nalata, nimi weng uyo tinangkusaala binim kale, 10 no tolon-temi uyo, imi kanum-nuuba boyo kupkem daabelan-temi ko. Kale bisop bogo-nalata, nuyo mafak baga-em tiinan-nuuba bota kup ba kale, beyo Krais imi unang tinum fital telemin iyo, “Suguul ke tilip o,” agan-kalin binim ke-bom-nala e, unang tinum imi, “Suguul ke tilip o,” age imdep tam am daalum o agan-bilip iyo, “Waago o,” agela kupkalip im-kaga-bom-nala e, bogo-nala e, “Ibo ipkumal Kristen unang tinum imi iibak tem uyo kupkaa tam iinin o,” agan-bom no kem-nuuba ko.

Demitrius bemi kuguup tambal waafusa umi sang uta ko

11 Nimi bubul kabe. Kek kek imi kuguup mafak mafak kanu-bilip uyo abo dulu-namap kale, imi kuguup tambal tambal uta kup waafuu abo dululal o ageta ko. Tinum dok ita kuguup mafak uyo waafula umdii, beyo God iyo atamsaala kale minte, tinum dok ita kuguup tambal uyo waafula umdii, beta God imi man ko.

12 Unang tinum kwiin tagang iyo bogo-nilip e, “Demitrius iyo tinum tambal o,” agan-bom-nilip e minte, alugum nuyo utamupta e, fen beyo God imi tuluun weng uyo waafuba kalaa agan-bom no ke-bulup kale, nagal mungkup imi win uyo kufu-e-bom no ke-bomi kale, kapkal nimi kam agan-bii boyo utamapta e, dam kalaa agebap ko.

Weng afung uta ko

13 Nimi weng kapmi bagakeman o agan-bii uyo kwiin tagang kuta, niyo suuk kon tem kegal dola kolan-temaali kale, 14 niyo no mep sino kataman o agan-bii kale, no kapmi tibit kun diim kek fenita bole, alop nugol weng uyo bogobina tala keman-temup ko.

15 Kapmi kapkumal kalbip ita kabo weng umopkelip ko. Aa mungkup kapkal numi nugumal kugol albip iyo weng umobelal o ageta ko. Kale God iyo kabo dong dagake-balata, kapmi aget tem uyo bilili age-bom tambaliim kup bom-balapta o ageta ko.