Psalms 112
Poia to Maaron izaza to yes to titaghon ataam toni
1Aleluia, tapait Yoova!Ŋgeu to ighaze imatughez pa Yoova ve itaghon ŋgar toni,
ve tutuuŋ to Yoova ighami lolo poia kat,
nene pale tini iza, ve poia to Maaron iza toni.
2Ve papaghu toni pale tinim ndiran to izadi tintina.
Tovenen yes to tineep deŋiadi ila Maaron mata, tamtoghon to taan tonene pale titandag pa papaghu todi, ve poia to Maaron iza todi.
3Ndiran deŋiadi, ruum todi ivon kat pa mbaliiŋ ve mbeb popoia katindi.
Ve ŋgar todi deŋia pale ineep ariaŋa itaghoni taghoni gha ila.
4Ighaze ŋgeu deŋia eta ineep ndoroom tiina lolo, nene pale ghazooŋa to Maaron isuli.
Tamtoghon tovene lolo isasamin tamtoghon, ve ighamgham poian di, ve ipatooŋ ŋgar deŋia padi.
5Ŋgeu to ighaze mata reiŋ mbeb, ve iyokia mbeb toni pa iuul tamtoghon, ve itaghon ŋgar deŋia moghon pa uraat toni, nene pale ineep pooi. a
6Tamtoghon to itaghon ŋgar deŋia, tovaaŋ eta irau ighami itap ne maau.
Ve tamtoghon pale matadi kisini pa ŋgar poia toni tonowen itaghoni taghoni gha ila.
7Ighaze ilooŋ mbeb samia eta varu, ye irau imatughez maau.
Pasa, inumeer Yoova, ve ghurla toni iyaryaaŋ kat.
8Tovenen matughezaaŋ irau ighami maau.
Iyoon ariaŋa, le ighita Maaron itatan koia.
9Ye mata iŋgalŋgal yes mbolaaŋa, ve ireirei mbeb padi.
Ŋgar toni deŋia pale ineep ariaŋa tovene itaghoni taghoni gha ila.
Tovenen iza pale inim tiina, ve tamtoghon titandag pani. b
10Ndiran samsamiadi tighita ŋgar to ivotvot pani, le atedi yabyab, ve tiŋaaŋ mareer pani.
Eemoghon irau tigham ŋgar eta pani ne maau.
Pale pataŋani ivot padi ve tilaledi.
Tovenen mbeb popoia to lolodi padi, nene irau tigham di maau.
Copyright information for
TUCO