Psa 44 | TUCO | STEP | Mbouŋ to yes Kora Maaron, muuŋ sawa to nditimbumai, yom ughamgham uraat tintina padi. Tauto tighamgham kamos pani inim inim, le aazne yei nilooŋa pa taumai taliŋamai paam.

aIgham 15:16

bMbo 34:2; 1Kor 1:31

cRo 8:36

‏ Psalms 44

Suŋuuŋ to sawa to yes Israela koiadi tilib padi

Mbouŋ to yes Kora

1 Maaron, muuŋ sawa to nditimbumai, yom ughamgham uraat tintina padi.
Tauto tighamgham kamos pani inim inim, le aazne yei nilooŋa pa taumai taliŋamai paam.

2 Yes ndug ndug to muuŋ tineep izi taan tonene, ila taum tapirim, yom undiir di tighau tila, ve ugham nditimbumai tinim tineep izi taan tonene, ve inim ledi kat.
Yom utatan yes Kanaana le tapiridi isob kat, ve ugham nditimbumai tineep pooi izi taan tonene.

3 Onoon, nditimbumai tigham malmal pa taan tonene.
Eemoghon taudi tapiridi ve buza todi igham di tilib pa koiadi ne maau.
Yom uneep toman di ve matam padi, ve upatooŋ tapirim pa koiadi ve uparab toman di.
Tauto nditimbumai tilib padi, ve tigham taan todi inim ledi.
Pasa, yom lolom padi kat. ^a
4 Yoova, yom kinik tiou, ve Maaron tiou.
Yom usaav ariaŋa ughaze yei Israela to siŋ to Yakop pale nilib pa koiamai.

5 Ila taum tapirim, yei nitatan koiamai.
Yei nighur ilat tiom, ve suŋuuŋ tiei iŋarua ghom. Tauto uul ghei ve nirab di, ve nivazag di ila aghemai samba.
6 You nanumeer pane tiou maau.
Ve buza tiou paam, nene irau igham mulin ghou maau.

7 Yom moghon to uluul ghei, ve ughamgham mulin ghei ila koiamai nimadi.
Yom ugham di tiwaghamgham, ve mayadi a tighau tila.

8 Maaron, yom uluul ghei, tauto moghon moghon nipapait ghom, ve lolomai poia payom.
Yei pale nipait izam itaghoni taghoni gha ila. ^b
9 Eemoghon aazne, yom upul murim payei, ve unum toman ndaaba tiei muul maau.
Ve upul koiamai tilib payei le mayamai kat.

10 Yom ugham ghei tapirimai maau.
Tauto nipul malmal ve niwaghaughau, ve koiamai tiyou mbeb tiei tisob.

11 Yom ughur ghei nila nimadi ninimale sipsip to timbit di leso tirab di.
Ve ureu ghei nimbiriis irau ndug ndug.

12 Yei tamtoghon tiom. Eemoghon aazne, ugholia ghei nila koiamai nimadi, ve ninim mbesooŋa padi.
Ve ugham mbeb tiina eta ila nimadi maau. Yom ughur atiamai izi kat, inimale yei mbeb sorok.

13 Yes to tineep tigharau ghei, tighita ŋgar to ugham payei,
le tiŋiŋ ve tigham ŋalalaŋ payei.

14 Yes ndug ndug to tiwatag ghom maau ne, tighita ghei ninimale mogheraaŋ.
Ve tiŋiŋiŋ payei, ve tililiit dabadi.
15 Ndag to naol, mboŋmaagh ila le rabrab izi, tamtoghon tipamayaŋin ghou.
Tovenen matag iza maau. Mayag ve natudtud moghon.

16 Pasa, tamtoghon tighita ŋgar to koiagŋa tiyati payou,
ve tipipiyaav saveeŋ velegiiŋ ve saveeŋ mayaŋiiŋa naol payou.
17 You nagham ŋgar naol naghaze pughu vena to yom upul pataŋani naol tonene tivot payei?
Pasa, yei lolomai imaagh payom maau.
Ve saveeŋ to nimbua toman ghom, yei nireua maau.

18 Yei nipul murimai payom maau.
Ve laghooŋ tiei, niyel pa ataam tiom maau.

19 Eemoghon yom uwaghamun ghei kat le ndug tiei ŋginiŋa inimale mbeb sagsagŋa inadi to nepooŋ.
Nepooŋ tiei, nene inimale ndoroom tiina ikau ghei.

20 Maaron tiei, yom uwatag: Lolomai imaagh payom maau,
ve nisuŋ pa maaron kaarom eta maau.
Inimale nigham ŋgar tovene, tone yom uwatag.
Pasa, ŋgar ŋgozaaŋ to tineep ila lolomai, eta iyooŋ payom maau.

22 Yei nimbesmbees pa yom moghon. Tauto mboŋmaagh ila le rabrab izi, koiamai tirabrab ghei nimatmaat.
Tighita ghei ninimale sipsip to timbit di leso tirab di timaat. ^c
23 Yoova, ugheen iraua! Umundig!
Ugham ŋgar eta pa uul ghei lak!
Pale upul murim payei tovene itaghoni taghoni gha ila?

24 Pughu vena to uŋgooz matam payei?
Ughita. Koiamai titatan ghei le nisami wa. Pataŋani tiina to nimbadbaada ne, lolom imaagh pani malep!

25 Aazne, koiamai titatan ghei kat.
Tovenen nitap nizi taan, ve nigheen izala ghavuur pogho.

26 Maaron, umundig! Unum uul ghei lak!
Yom lolom ineep tuŋia ila to tamtoghon tiom ve uluul di.
Tovenen upas ghei nivot pa pataŋani tonene.