1Cor 1 | TUCT | STEP | Yau Paulus. Maaron ipoi ghau namin le, ve ighur ghau namin mbaŋooŋa to Yesu Krisi itaghon i tauu loolo. Yeiru toŋvetaz toit Sostenes nibood rau tane ilat pa yam tau aleep ila lupuuŋ to Maaron izi nugh Korin na. Yam apaak Yesu Krisi ve aleep ila tooni, tauta amin tamtamon tooni patabuyaaŋa wa. I ipoi gham amin le, leso ataghon ŋgar patabuyaaŋ imin i tauu. Ve yam mon mako. I igham tauvene pa tamtamon tisov to nughmariŋ tau tisuŋsuŋ ila Tiina toit Yesu Krisi eeza na. I tiina toozi, ve tiina toit paam.

a1Kor 6:11; 2Tim 1:9

b1Kor 12:7+; 2Kor 8:7

cPil 3:20; 1Tes 1:10; Tit 2:13

dPil 1:6; 1Tes 5:23+; 1Pe 5:10

eRo 12:16; Pil 1:27, 2:2; 1Pe 3:8

f1Kor 3:4+

gMbaŋ 18:8; Ro 16:23

h1Kor 16:15

i1Kor 2:1+

jRo 1:16; 1Kor 2:14; 2Kor 4:3

kIs 29:14

lIs 44:25; Lu 10:21; Ro 1:22; 1Kor 3:18

mMt 11:25+

nYo 4:48; Mbaŋ 17:21

oYo 6:60+; 1Kor 2:2,14

pRo 1:16; Kol 2:3

r2Kor 13:4

sMt 11:25; Yems 2:5

tRo 3:27; Ep 2:9

uRo 3:24; 2Kor 5:21; Ep 1:7; Pil 3.9

vYer 9:23+; 2Kor 10:17

‏ 1 Corinthians 1

1 Yau Paulus. Maaron ipoi ghau namin le, ve ighur ghau namin mbaŋooŋa to Yesu Krisi itaghon i tauu loolo. Yeiru toŋvetaz toit Sostenes nibood rau tane ilat pa yam tau aleep ila lupuuŋ to Maaron izi nugh Korin na. Yam apaak Yesu Krisi ve aleep ila tooni, tauta amin tamtamon tooni patabuyaaŋa wa. I ipoi gham amin le, leso ataghon ŋgar patabuyaaŋ imin i tauu. Ve yam mon mako. I igham tauvene pa tamtamon tisov to nughmariŋ tau tisuŋsuŋ ila Tiina toit Yesu Krisi eeza na. I tiina toozi, ve tiina toit paam. ^a

3 Poia to Tamaan Maaron ve Tiina toit Yesu Krisi izaa tsiam, ve tiŋgin gham aleep poia toman lolomim luuma. Onoon.

Paulus ipait Maaron pasaa i ighur poia tooni tiina izaa to yes Korin

4 Saawe isov, yau napait Maaron payam toman lolog poia. Pasaa, ila uraat to Yesu Krisi, Maaron ighur poia tooni tiina izaa tsiam. 5 Yam tau apaak Krisi ve aleep ila tooni na, Maaron Avuvu irei ŋgar popoia maata maata katini payam. Tauta aghazooŋ pa ŋgar popoia naol, ve avovotia Maaron aliiŋa ila eez maata maata. ^b

6 Maaron Avuvu igham uraat toman tapiri ila sosomim. Tauta aghilaal aghe saveeŋ to Krisi tau nisavia payam na, ene onoon, ve akisi ariaaŋ. 7 Tauvene aazne, ambool pa tapiri, ma ŋgar poia eta tau Maaron Avuvu ireii pait ne mako. Ve asasaŋan aghe le aghita saawe to Tiina toit Yesu Krisi imuul ilam ve Maaron itotoia ivot ighazooŋ. ^c

8 Maaron tauu pale ipalot gham, ve igham gham ayooz ariaaŋ le azaa pa saawe tau i ighuru payam na. Leso saawe tau Tiina toit Yesu Krisi imuul ilam, i aat ighit gham ighe lemim sosor eta mako. 9 Iit irau tanumeer Maaron. Pasaa, i itataghon saveeŋ tooni irau saawe. Ve ipoi gham gha yamŋa Naatu Yesu Krisi avalupu gham amin eemon wa. ^d

Paulus isaav ariaaŋ pa yes Korin ighe tivarewai zi sov

10 Yam toŋvetaz, yau naghe napalot gham ila Tiina toit Yesu Krisi eeza tauvene: Avarewai gham sov. Yam asov alup lolomim ve ŋgar tsiam imin eemon, ve azuari gham pa taghoniiŋ ŋgar eemon. ^e

11 Yam toŋvetaz, yau nasavia saveeŋ tane pasaa, Kloe tamtamon tooni siriv tilam, ve tipaesia varumim payau tighe parzoraaŋ naol ivotvot ila sosomim. 12 Ene nasavia ŋgar tsiam tau avavalaghi gham, ve yam siriv asavsaav aghe: “Yau nataghon Paulus,” ve siriv aghe: “Yau nataghon Apolos,” ve siriv aghe: “Yau nataghon Petrus,” ve yam siriv aghe: “Yau nataghon Krisi.” Ŋgar tana, yam asov aghamghamu. ^f

13 Mindai, yam aghe avalagh Krisi imin ŋgiira ŋgiira? Ma aghe yau Paulus nagham niamim, ve tirav ghau izala ai pambarooŋ payam? Ma yam agham yaa pa yau ezag? Mako. 14 Yau napait Maaron toman lolog poia pasaa, nagham yaa pa yam eval mako. Nagham yaa pa Krispus ve Gaius mon. ^g

15 Tauvene tamtamon eta irau isaav ighe: “Yei tane nigham yaa pa Paulus eeza.” Vene mako. 16 O, ŋgarig gha matag iŋgal. Yau nagham yaa pa Stepanas ve yes tau tileep tomania ila ruum tooni na paam. Ve yam siriv, lolog iveegh. Nagham yaa payam, ma mako? ^h

17 Puughu tau yau nagham yaa pa yam eval mako, ene vene: Krisi imbaaŋ ghau to nagham yaa pa tamtamon mako. I imbaaŋ ghau to navotia vaaru poia. Ve i ighe saawe tau navotia vaaru poia, yau irau nasaav imin yes ŋgara to taan tau tighamgham pa tauzi ezazi ne mako. Pa ighe nagham tauvene, ene pale narav matin ai pambarooŋ to Krisi tapiri, ve tamtamon tighita ai pambarooŋ tooni imin kaut sorok. ⁱ

Mateegh to Krisi izala ai pambarooŋ itotoi ighe Maaron ŋgar tooni, ene ite kat pa ŋgar to iit tamtamon

18 Onoon, saveeŋ tau isavia mateegh to Krisi izala ai pambarooŋ, yes tau titaghon eez to tilalez na, tighita tighe ene saveeŋ to yes kankanooŋa. Eemon iit tau Maaron ighamgham uratoi ghiit to igham mulin ghiit ne, taghilaal taghe: Saveeŋ tawe, Maaron tapiri igheen ila. ^j

19 Saveeŋa, Maaron isavia gha tiboode pataghaaŋ wa. Ighe:

“Zeran ŋgara to taan, yau aat navaghamunia ŋgar toozi le tivaghamgham.
Yes tau tighe tighazooŋ kat pa ŋgar tintiina na, yau pale nagham ŋgar toozi imin kaut sorok, ve le anooŋa mako.” ^k
20 Ighe vene, pale tasaav mindai pa yes ŋgara to taan, ve yes tau lezi ŋgar tintiina pa tutuuŋ to Mose, ve yes tau aazne tivavazorai zi pa savsaveeŋ ma ŋgar ne? Pale tapait zi? Mako. Pasaa, ŋgar tau tamtamon to taan tipapakur tauzi pani na, ene Maaron ipaghazoŋaini ighe ene ŋgar to yes kankanooŋa. ^l

21 Maaron, i ŋgar tooni tiina, ve ighita ighe poia to ipoon eez pa tamtamon to taan, leso tipait tauzi ezazi sov. Tauta yes ŋgara to taan ŋgar toozi irau iuul zi to tiwatagh Maaron mako. Maaron ighe itaghon eez ite to igham mulin tamtamon. Ene saveeŋ to Krisi tau nivovotia ne. Onoon, yes tau titaghon taan ŋgara na, tighita saveeŋ tane tighe ene saveeŋ to yes kankanooŋa. Eemon yes tau tighur ila saveeŋ tane, Maaron pale igham mulin zi. ^m

22 Yes Yuda tizoornugh tighe tighita gabua ŋgeretazi ivotvot imin ilaal pazi, o tighur ila. Ve yes Grika tizuari zi pa loŋaaŋ saveeŋ to yes ŋgara to taan tau tighita tighe le puughu tiina. ⁿ

23 Eemon yei nivovotia saveeŋ pa mateegh to Krisi izala ai pambarooŋ. Saveeŋ tane, saawe tau yes Yuda tilooŋa, tirere pani ve tighur ila mako. Ve saawe tau yes Grika tilooŋa, tiveleghi tighe ene saveeŋ to yes kankanooŋa. ^o

24 Eemon yes tau Maaron ipoi zi timin le na, yes Yuda ve Grika paam, yes tighilaal tighe Krisi, i itotoi Maaron tapiri ve ŋgar tooni ivot ighazooŋ pait. ^p

25 Onoon, yes tau titaghon taan ŋgara na, tivelegh Maaron ŋgar tooni tighe ene ŋgar to yes kankanooŋa. Eemon mako. Ŋgar tooni tiina. Iliiv kat pa ŋgar to iit tamtamon. Ve uraat tau Maaron ighamu na, ^{▼▼(1:25) Uraat tau Paulus isavia na, ene mateegh to Krisi ve burigiiŋ tooni.}

tauvene paam. Tamtamon tiveleghi imin kaut sorok, ve tighita tighe le tapiri mako. Eemon uraat tawe, tapiri tiina kat. Iliiv iit tamtamon tapiriin. ^r

Ŋgar to Maaron, ene ite kat pa ŋgar to taan

26 Yam toŋvetaz, agham ŋgar pa taumim. Saawe tau Maaron ipoi gham amin le na, gabuamim mindai? Zeran tau titaghon ŋgar to taan na, tighita tamtamon tsiam katini tighe lezi ŋgar tiina mako. Ve tighe lezi ezazi ve tapirizi to tigham gabua eta mako, ve ziiri waaro toozi paam, lezi ezazi mako. 27 Tauvene aghita. Yes tau tamtamon to taan tivelegh zi tighe lezi ŋgar mako imin kankanooŋa, tauta Maaron igham zi timin le, leso ipamayaŋin zeran ŋgara to taan. Ve yes tau tamtamon to taan tighit zi tighe tapirizi imbool, tauta Maaron igham zi timin le, leso ipamayaŋin yes tau tapirizi tiina na. ^s

28 Ve yes tau lezi ezazi mako, ve tamtamon to taan matazi veleghin zi, ve tighit zi timin kaut sorok, tauta Maaron igham zi timin le. Leso ipaghazoŋai yes tau ezazi tintiina na ighe ezazi tawe, ene kaut sorok. Pasaa, i loolo pa tamtamon eta ipait tauu eeza ila i maata mako. ^t

30 Maaron tauu ta igham gham apaak Yesu Krisi ve aleep ila tooni. I ighur Yesu Krisi to ipaghazoŋai ghiit pa ŋgar tooni leso taleep poia. Ve Krisi ta igham ghiit taduduuŋ ila Maaron maata, ve igham ghiit tamin tamtamon tooni patabuyaaŋa, ve ipas ghiit pa saghati tapiri, leso tamin besooŋa pani muul sov. ^u

31 Tauvene tataghon saveeŋ tau tiboode pataghaaŋ na:

“Tamtamon tau loolo pa ŋgar to pakuruuŋ, na i aat ipakur Ŋeer Tiina pa ŋgar tau i ighamghamu.” ^v