2Cor 6 | TUCT | STEP | Yeŋa Maaron niluplup ghei pa uraat tooni. Tauvene nighe nipalot gham tauvene: Poia to Maaron tau izaa tsiam na, aat ipaburigin gham pa taghoniiŋ Maaron ŋgar tooni. Leso poia tooni tana ighur anooŋa. Ighe mako, ene pale imin kaut sorok.

a2Kor 1:24, 5:20; Hib 12:15

bIs 49:8

cLu 4:18+; Hib 3:13

dRo 14:13; 1Kor 8:13, 10:32

e2Kor 4:9+

gMbaŋ 16:23; 2Kor 11:23+

hRo 12:9; 2Kor 4:2; Ga 5:22; Kol 3:12; 1Tim 4:12

i1Kor 2:4; 2Kor 10:4

jMbo 118:18; 2Kor 4:9+

k2Kor 7:4, 8:9; Pil 2:17

l1Kor 4:14

m1Kor 5:9+; Ep 5:6+,11; 1Yo 1:5+

o1Kor 10:20+

pWkp 26:12; Ezek 37:27; 1Kor 3:16; Syg 21:3

qWkp 5:2; Is 52:11; Syg 18:4

rRo 8:14; Syg 21:7

‏ 2 Corinthians 6

1 Yeŋa Maaron niluplup ghei pa uraat tooni. Tauvene nighe nipalot gham tauvene: Poia to Maaron tau izaa tsiam na, aat ipaburigin gham pa taghoniiŋ Maaron ŋgar tooni. Leso poia tooni tana ighur anooŋa. Ighe mako, ene pale imin kaut sorok. ^a

2 Maaron aliiŋa isaav tauvene:

“Yau taug naghur saawe to nagham mulin gham ve nagham poghani gham. Ve saawe tana duduuŋ, nalooŋ suŋuuŋ tsiam, ve nauul gham.” ^b
Alooŋ. Saawe to Maaron igham mulin ghiit ve igham poghani ghiit, tauta aazne tazaa pani wa. ^c

Lepoogh to besooŋa tauu to Krisi

3 Besooŋ tsiei tau nighamghamu pa Krisi ne, yei nighe nitaghon ŋgar tau iduduuŋ kat ila tamtamon matazi. Pa ighe nigham sosor eta, ve tamtamon tirere ghei, ene pale sosor tsiei tana ipoon zi ve tighur ila to Krisi mako. ^d

4 Ŋgar tsiei isov, ene itotoi ighe yei besooŋa tauu to Maaron. Pasaa, pataŋani maata maata ighamgham ghei, eemon niyooz ariaaŋ pa badooŋ zi. Monmon pataŋani izazaa tsiei, ve saawe siriv, nighita nighe lemai eez muul mako. ^e

5 Tamtamon tiloslos ghei, ve tighurghur ghei niloŋ nila ruum to yavyavuuŋ, ve nighamgham saghat ila malmal. Yei nirav taumai pa uraat to Krisi le tapirimai isov kat. Ve saawe naol, nighengheen poi mako, ve pitoltool ghei. ^{▼▼(6:5) Eez ite to tatoor ziiri tane, ene vene: “Saawe naol, yei nighengheen poi mako. Nimamaat ve niŋgun taumai pa ghaniiŋ aniiŋ, leso matamai iŋgal suŋuuŋ.”
,} ^g

6 Yei nigham ŋgar tau iŋgalaaŋ mon ila Maaron maata, ve nighazooŋ pa ŋgar tooni, ve nighamgham poghania tamtamon. Ve isaav ighe tigham saghatin ghei, ene niyai ghei ve nibaado mon. Avuvu Patabuyaaŋ ilepleep tomani ghei, ve nighur lolomai pa tamtamon kat. ^h

7 Yei nisavsavia saveeŋ onoon mon, ve Maaron tapiri ipapalot ghei. Gabua tsiei to malmal, ene ŋgar tau iduduuŋ ila Maaron maata. Ŋgar tane imin iiz tau nipaparav pani, ve imin sigheu tau niponpoon taumai pani. ⁱ

8 Saawe tau nigham uraat to Maaron, tamtamon siriv tipait ezamai, ve siriv tivelegh ghei tighe yei tamtamon sorok. Tamtamon siriv tipait varumai, ve siriv tivaghamunia ezamai. Tamtamon siriv tighit ghei tighe yei besooŋa tauu to Maaron, ve siriv tighe yei nigham karom ve nipaghau tamtamon pa eez to Maaron. 9 Tamtamon siriv tighazooŋ payei, ve siriv tikankaan payei. Saawe siriv, nigham ŋgar nighe paita nimaat. Eemon nimaat mako. Pataŋani siriv tau tivot payei, ene to ipaduduuŋ ghei. Eemon irav ghei nimaat mako. ^j

10 Onoon, pataŋani naol tau nibadbaad zi, ene igham ghei lolomai ipataŋan. Eemon Maaron igham ghei lolomai poia irau saawe. Yei nileep imin mbolaaŋa. Eemon niuluul eval tiina le tirau kat pa ghamuuŋ gabua popoia ila to Maaron. Yei lemai gabua eta mako. Eemon nirao pa gabua naol isov. ^k

Paulus ivotia loolo pa yes Korin

11 O yam Korin, yei lolomai igheen tsiam kat, tauta nisavia saveeŋ naol tane payam. Leso awatagh katin lolomai. Eemon nighita nighe yam aponpoon lolomim payei soone. 13 Yau nasaav payam imin natugŋa yam: Apoon lolomim payei muul sov. Aghur lolomim payei, imin yei nighur lolomai payam. ^l

Taghur muriin pa ŋgar sasaghati

14 Alooŋ. Yes tau tighur ila to Krisi mako na, yam apaak zi sov. Pa ŋgar toozi imin yam mako. Yes tau titaghon ŋgar duduuŋa ve yes tau timalaaŋ pa Maaron tutuuŋ tooni na, pale tilup zi pa uraat mindai? Ghazooŋa ve ndoroom irau tilup zi? Mako. ^m

15 Ma Krisi yesuru Sadan ^{▼▼(6:15) Paulus ibood Belial (o Beliar). Belial, ene Sadan eeza ite.}

tigham ŋgar raraate? Isaav ighe tamtamon ee ighur ila to Krisi, ve ite ighur ila mako, saa gabua irau ilup yesuru? Mako. ^o

16 Yam awatagh: Iit tamin Maaron maata yaryaare rumei tooni. Mindai, irau rumei tooni ipaak maaron karomŋa rumei toozi? Mako. Saveeŋa, Maaron isavia pataghaaŋ wa. Ighe:

“Yau pale naleep tomani zi, ve nalaghlaagh ila sosozi.
Ve yau pale namin Maaron toozi, ve yes timin tamtamon tsiau.” ^p
17 Tauta Maaron isaav muul ighe:

“Apul zeran sasaghati tana tileep, ve ala aleep soghan pazi.
Ve gabua tau ighe iŋgalaaŋ mako, na agharauu sov.
Leso nagham gham toman lolog poia. ^q
18 Ve yau namin tamamim,
ve yam amin natugŋa ve natug livaŋa.
Saveeŋ tane, ene Maaron saksaki tauu aliiŋa.” ^r