Exo 15 | TUCT | STEP | Ra Mose tomania yes Israela timbou mbouŋ tane to tipait Yoova. “Yau aat nambou to napait Yoova. I eeza tiina le tiina kat. I iparav ariaaŋ le iliiv koiŋa. I isik hos toozi tomania yes tau tilandoov zi na tizila te loolo gha tilalez.

aSyg 15:3

bMbo 118:14

cIgham 3:14

dIgham 8:10; Mbo 86:8; Syg 4:8

fMbo 78:54+, 80:8

hMbo 103:3

‏ Exodus 15

Yes Israela tipait Maaron eeza ila mbouŋ

1 Ra Mose tomania yes Israela timbou mbouŋ tane to tipait Yoova.

“Yau aat nambou to napait Yoova.
I eeza tiina le tiina kat.
I iparav ariaaŋ le iliiv koiŋa.
I isik hos toozi tomania yes tau tilandoov zi na tizila te loolo gha tilalez. ^a

2 Yoova ipapalot ghau, tauvene nambou mbouŋ to napaiti.
Yau irau nalaleg. Eemon i igham mulin ghau.
I mon ta Maaron tsiau.
Tauvene naghe napait eeza pa poia tooni.
Muuŋ, tamaŋ ibesbees pani.
Ve yau paam napakur eeza izala le izala kat. ^b

3 Tiina tsiau, i ŋeer ariaaŋa to malmal.
I eeza Yoova. I ilepleep irau saawe. ^c
4 I isik kinik to Isip zaaba tooni tomania karis toozi tisov tizila te loolo gha tilalez.
Ve yes daaba tau tirau kat pa ghamuuŋ malmal na, yes paam tighun te gha tisov timataar izi Te Siŋsiŋai.

5 Te itav zi ve tizal tizila imin maet.
Tizila kat ta mazavan belbeluuŋa loolo we.
6 O Yoova, nimam tapir, ene tapiri tiina le tiina kat.
Nimam tapir irav mbirisai koiamŋa le tilalez.

7 Yo ezam tiina kat. Uliiv gabua naol isov.
Koiamŋa tau tiburig tighe tizoor ghom na, yo ureu mbirisai zi.
Utotoi aatyavyav tsio pazi ve ivaghamun zi imin yav ighan kikiliiŋ gorgori.

8 Yo atem yavyav pazi kat. Tauta ugham yaghur tiina iburig ve ivalagh te. Sirivu ila pa ŋas, ve sirivu ila pa tapir.
Ziige ru tawe tigud tizaa ve tiyooz duduuŋ ve imin didiiŋ.
Te to mazavan iyooz le iyaryaaŋ.
9 Koiamaiŋa tigham tinizi tighe:
‘Yei aat nigham taghon yes Israela le nikis zi.
Mako niyauur saveeŋ mariŋ toozi ve nireii irau ghei.
Saa pataŋani tau nighe nigham pazi, ene aat nighamu mon.
Tauvene yei pale nipas mbuzaagh tsiei, ve nitotoi tapirimai pazi, ve nireu mbirisai zi.’
10 Eemon Yoova, yo uviv avuvum imin yaghur ve ivuvuur te.
Tauta itav zi le tisov tizal tizila mazavan loolo rekia mon imin maet tau pataŋani le pataŋani kat.
11 A Yoova, saa maaron ta irau ghom? Eta mako.
Yo paghunam ve patabuyaaŋ kat.
Ve ugham uraat tintiina tomania gabua ŋgeretazi.
Tauta tamtamon tiroi payo, ve tipait ezam. ^d

12 Yo urav koiamŋa pa nimam tapir,
ve ugham taan aavo ikaak, ve itoon zi tisov.
13 Yoova, yo lolom isaghav tamtamon tsio, ve uluul zi itaghon saveeŋ mbuaaŋ tsio.
Tauta uvool toozi, ve ugham mulin zi pa pataŋani toozi.
Ve yo umuuŋ ve utotoi eez pazi.
Tauvene yo aat uŋgin zi pa tapirim ve ugham pooz pazi le tila tivot izi niam patabuyaaŋ to lepoogh.

14 Yes nugh nugh tilooŋ uraat tsio vaaru, le tirur pani ve atezi iparav.
Yes Pilistia, roiŋ tiina igham zi ve tisaŋeeŋ.

15 Ve daaba tisov to Edom paam, tiroi tiina.
Yes pooza to Moap tilooŋ varum, le tinizi irur, ve lolozi bubu.
Ve yes Kanaana tapirizi isov kat ve tinizi imatmaat.

16 O Yoova, yes tiwatagh: Tapirim, ene tiina kat.
Tauta roiŋ tiina igham zi, ve atezi ipaparav.
Yo taum ugham mulin yei Israela gha nimin lem motot.
Tauvene nugh nugh tileep mon imin maet,
ve timarar ghei, ve nimbut naghozi gha nila nigham taan tsiei.
Irau tigham gabua eta payei mako.

17 O Yoova, yo ugham ghei nilam nileep poia izi loloz tsio. ^{▼▼(15:17) Maaron loloz tooni, ene loloz Zion tau nugh Yerusalem igheen izala na.}
Loloz tane, ene niam patabuyaaŋ to lepoogh.
Pasaa, yo upayooz rumei tsio izala. ^f
18 Yoova, i kinik tiina kat.
I pale igham pooz taghon gha ila.”

Mbouŋ to Miriam

19 Tauvene Yoova ivalagh Te Siŋsiŋai, gha sirivu ila pa ŋas ve sirivu ila pa tapir, ve yes Israela titaghon taan mamaasa tau igheen bodbodaaŋ na, ve tila tivool pa ziige ite. Eemon saawe tau zaaba to kinik tomania hos ve karis toozi titaghon zi, Yoova igham te ila ivool muul, ve itav zi. 20 Aron liivu Miriam, i propet livaa ee. I igham kakaap tooni gha imuuŋ, ve zilivaa tisov to Israel anazi tigham kakaap toozi ve titaghoni, ve yesŋa tigham narogho. 21 Ve Miriam iit mbouŋ tane pazi ighe:

“Ambou ve apait Yoova.
I eeza tiina le tiina kat.

I iparav ariaaŋ le iliiv koiŋa.
Hos toozi tomania yes tau tilandoov zi na, i ipazali zi tizila te loolo gha tilalez.”

Yaa papaii

22 Murei ra, Mose isaav pa yes Israela gha tiburig tilaagh muul. Tipul nari to Te Siŋsiŋai, ve tilaagh tiloŋ tila pa nugh ŋginaaŋa tau tiwaato tighe ‘Sur.’ Tilaagh izi ta sewe irau mboŋ tol, eemon tindeeŋ yaa eta mako. 23 Ra tivot nugh marani ee, eeza Mara. Nugh tawe, yaa igheen. Eemon yaa tawe papaii. Tauvene yes Israela irau tighunu mako. Puughu tane ta tiwaat nugh tawe eeza tighe ‘Mara.’ ^{▼▼(15:23) Saveeŋ ‘mara’, puughu tauvene: ‘papaii’.}

24 Yes Israela tiburig ve tiŋooŋ pa Mose tighe: “Ai, ŋgarsuamai igorgor kat wa. Pale nighun saa?”

25 Tauvene Mose itaŋ rarai Yoova pa uleeŋ, ve Yoova itotoi ai sirivu ee pani. Mose igham ai tawe ve isiki izila yaa, ra yaa ipapa muul mako, ve yes irau tighun.

Tilepleep ta sewe, ve Yoova ighur tutuuŋ siriv pazi ve ipaghazoŋai zi pa eez to titaghoni leso tilaagh duduuŋ ila i maata. I igham tauvene to itoov zi. Leso ighita: Pale titaghon duduŋai aliiŋa, ma mako? 26 I isaav pazi ighe: “Yau Yoova, Maaron tsiam. Alooŋ aliŋag ve ataghoni, ve agham ŋgar tau iduduuŋ mon ila yau matag. Isaav ighe aghur taliŋamim poi pa tutuuŋ tisov tau naghur zi na, ve ataghon duduŋai zi, ene yau irau naghur moroghooŋ saghati eta payam imin tau nagham pa yes Isipa ne mako. Pasaa, yau Yoova ta naghagharaat gham pa moroghooŋ tsiam gha tinimim popoia.” ^h

27 Ra yes Israela tilaagh tila tivot nugh Elim. Nugh tawe, le taan puura saŋavul ve ru tau yaa ivotvot pazi. Ve ai det tamoot tol saŋavul (70) titum ta sewe paam. Ai tawe anoŋazi poia pa ghaniiŋ. Tauvene tighur niazi ta sewe ve timariau.