Rut 1 | TUCT | STEP | Muuŋ kat, yes Israela lezi kinik mako, ve tamtamon toozi siriv timin daaba pazi ve tiŋgin zi. Saawe ee, pitool tiina ivot. Saawe tana, ŋeer ee ilepleep, eeza Elimelek, ve azaawa eeza Naimi. Ve natuzŋa zitamoot ru, ee eeza Malon, ve ite eeza Kilion. Rumei toozi Eprata. Nugh toozi, ene Betelem tau igheen ila taan sirivu to Yuda. Saawe tau pitool tiina tana ivot, Elimelek yesuru azaawa ve natuzŋa ru tipul Betelem, ve tila tileep izi taan sirivu to Moap. Tilepleep ta sewe irau ndaman siriv.

‏ Ruth 1

Elimelek yesuru azaawa ve natŋa tila tileep taan sirivu to Moap, ve pataŋani tiina ivot pazi

1 Muuŋ kat, yes Israela lezi kinik mako, ve tamtamon toozi siriv timin daaba pazi ve tiŋgin zi. Saawe ee, pitool tiina ivot. Saawe tana, ŋeer ee ilepleep, eeza Elimelek, ve azaawa eeza Naimi. Ve natuzŋa zitamoot ru, ee eeza Malon, ve ite eeza Kilion. Rumei toozi Eprata. Nugh toozi, ene Betelem tau igheen ila taan sirivu to Yuda. Saawe tau pitool tiina tana ivot, Elimelek yesuru azaawa ve natuzŋa ru tipul Betelem, ve tila tileep izi taan sirivu to Moap. Tilepleep ta sewe irau ndaman siriv. 3 Ra Elimelek imaat, ve Naimi tomania natŋa ru tana, yes mon tileep. 4 Naimi natŋa tivai Moap tinazi ru. Ee eeza Opa, ve ite eeza Rut. Yes tileep ta sewe irau ndaman saŋavul, ra Malon yesuru Kilion anazi timaat. Tauvene Naimi imin naar ve imin kakam. Le azaawa mako, ve le natŋa paam mako.

Naimi imuul ila pa nugh tooni puughu

6 Naimi ilepleep izi Moap, ve ilooŋ tighe Yoova iuul tamtamon tooni Israela gha igham mariri tiina ivot pazi. Tauvene Naimi tomania raulivaŋa ru tiburig tipul taan to Moap, ve tighe timuul tila pa nugh puughu to Naimi. 7 Tipul nugh tau tilepleep pani na, ve titaghon eez tau ila pa taan sirivu to Yuda. 8 Tilaghlaagh tila ve Naimi isaav pa raulivaŋa ru ighe: “Aa, yamru amuul ala pa tinamimŋa ve aleep tomani zi. Yamru tane lolomim isaghav ghau tomania zeran toit tau timaat ne, ve agham poghani ghei kat. Tauvene yau nasuŋ Yoova naghe i igham poghani gham paam. 9 I tauu pale iuul gham ve avai muul. Leso azuwamimŋa matazi payam ve aleep poia.” Naimi isavia saveeŋ tane le isov, ve tomania raulivaŋa tivasaghavu zi ve titaŋ tiina. Titaŋtaŋ le isov, ra raulivaŋa tisaav pani tighe: “Mako. Itiŋa tala pa ziiri waaro tsio.”

11 Eemon Naimi iyol aliŋazi ighe: “Natuglivaŋa, yamru amuul ala pa nugh tsiam. Azoornugh aghe itiŋa tala pasaa? Aghita. Yau irau napoop zitamoot ruta muul to tivai gham ne mako. 12 Amuul ala pa nugh tsiam. Pa yau namin olman tinazi wa. Irau navai muul mako. Isaav ighe yau navai pa mboŋ ta aazne ve napoop zitamoot ru, 13 irau yamru alepleep ve asasaŋan zi le timin zolman, o avai zi? Mako. Aa natuglivaŋa, yau lolog isaghat kat. Pasaa, pataŋani tiina tau Yoova igham payau, ene izaa tsiam paam.”

14 Yesuru tilooŋ saveeŋ tooni tane, ve tipaburigin taŋiiz muul. Titaŋtaŋ le isov, ra Opa isaghav rauliva, ve ipul zi, ve imuul ila pa nugh tooni. Eemon Rut loolo isaghav rauliva Naimi kat. Tauta loolo pa ipuli mako. 15 Tauvene Naimi isaav pani muul ighe: “Ughita! Tazimliva imuul ila pa tamtamon tooni ve maaron tooni wa. Utaghoni ula.”

Rut imbu saveeŋ ighe i irau ipul Naimi mako

16 Eemon Rut iyol aliiŋa ighe:

“Uzoornugh ughe napul ghom pasaa?
Yau irau napul ghom ve namuul nala mako.
Nugh sindei tau yo ughe ula pani, yau aat nala paam.
Ve nugh tau yo uleep pani, ene yau aat naleep pani paam.
Tamtamon tsio, ene yau tamtamon tsiau paam.
Ve Maaron tsio, ene Maaron tsiau paam.

17 Saa nugh tau yo uleep pani ve umaat, ene yau paam aat namaat ve titavi ghau tomani ghom izi ta sena.
Saveeŋ isov tau yau nasavia ne, isaav ighe nataghoni mako,
ene aat Yoova tauu ighur atuya izaa tsiau.
Tauvene mateegh mon ta pale irav motin ghiit.”

Naimi gha Rut tila tivot Betelem

18 Naimi ighita ighe Rut ŋgar tooni iyaryaaŋ kat ighe yesuru tila. Tauvene i le saveeŋ eta muul mako, ve iyok pani gha yesuru tila. 19 Yesuru tilaagh tila le tivot nugh Betelem. Eval tiina to Betelem tighit zi ve tisaŋeeŋ pazi. Ve zilivaa siriv tighason tighe: “Wai, aghita. Ewe Naimi?”

20 Eemon Naimi iyol aliŋazi ighe: “Yam awaat ezag Naimi muul sov. Awaat ezag ‘Mara.’ ^{▼▼(1:20) Eez Naimi puughu ene vene: ‘Paghuuna.’ Ve saveeŋ ‘Mara’, puughu ene: ‘Papaii’.}

Pa Maaron Saksaki Tau Iliiv Zimaronŋa Tisov na, igham lepoogh tsiau isaghat kat. 21 Saawe tau yau napul nugh tane ve nala, narao pa gabua ta naol ne. Eemon aazne, Yoova igham ghau namuul nalam toman nimag ŋginaaŋa. Tauta naghe awaat ezag Naimi sov. Pa Maaron Saksaki Tau Iliiv Zimaronŋa Tisov na ighur pataŋani tiina izaa tsiau ve ivaghamun ghau.”

22 Ene sinaiŋ to Naimi tau ipul taan to yes Moapa, ve yesuru rauliva Rut tau Moap tinazi na, ^{▼▼(1:22) Rut, i Moap tinazi. Yes Moapa tivot ila to Lot. Mose ibood tutuuŋ tau iŋgalsekin yes Israela pa vaiŋ yes Moapa (Ughita Lo 23:3). Eemon sinaiŋ to Rut itotoi ghiit ighe Maaron loolo pa nughmariŋ ve ighe igham zi timin tamtamon tooni.}

timuul tila pa Betelem. Saawe tana, ene saawe to tiyau aniiŋ bali anooŋa.