Luk 1 | TVK | STEP | Vanuvei ak bat minuk Teopolis, Okila xa moletin xil holu di lasak pisi xa ti latis usil naha xa testal mi xir.

‏ Luke 1

Sepinien xa Diamu

Luk 1:1-4

1 Vanuvei ak bat minuk Teopolis, ^{▼▼1:1 Koute te hisen ‘Teopolis’ be ‘moletin xa di ba ve kilakilen tengan vakil Hi.’}

Okila xa moletin xil holu di lasak pisi xa ti latis usil naha xa testal mi xir. 2 Ngan xil xa lateti kokot e latepus holesok xil xa Iesu tepol ni, xil latesep usil longeongen hos mi mosav. E xil xa latelonge, latetis usili. 3 Ma vengan xa inou mun nanggusil kuh holesok xil ngasen ak, di nanemi nabit bos tengan nitis mese ni holesok xil ngasen xa di testal minuk, eilep namem, Teopolis. 4 Napol ni mak vengan xa nabit ukil kuh reitinen te holesok xil xa di otelonge.

Masxaxa Tei Bit Kila xa Lipes Sion

Luk 1:5-25

5 Melele xa Herot tehe suv toto tahal Sudea, pris tei te Nim Eo teta, hisen Sakaraea, xa temos e vanut pris na Abitsa. ^{▼▼1:5 Pris xil ngasen langgo vatimol na Eron te tiamu. Eron, havneli xil labe hanutap tei e hat mun, e Abitsa tehe tei e xil. 1 Kron 24:1-19.} Atou nan, hisen Elsavet, xi mun be vatimol tei na pris Eron. 6 Xalu vus lumal e pe met Hi Suv e lunggusil vuol ni Rae nan xil. 7 Sakaraea be momatu ngamu e horamue nalu tovuol vengan xa tovolih nan be lumalum.

8 Vatei, Sakaraea ba tengan vapol vatel vanut pris xa xi mos en e Nim Eo na Hi. 9 Nggusil sexien matu na pris xil, xil latehosei Sakaraea tengan ihe Nim Eo e itin vokon e hor tengan iha mi Hi. 10 E melele xa Sakaraea de nim, moletin sav xil lasoh ladi hale e di lasis. 11 Vatakes, masxaxa tei na Hi Suv mei mistal mi Sakaraea e misoh de ri matu te hor ak. 12 Melele xa Sakaraea miketeh pusi, mesep e ulin mikan xa mikan. 13 E masxaxa bitene mini bitene, “!Sakaraea, ulum nakan ti! Hi milong sisen nam tuei. Atou nam Elsavet, veter mu ihur horamue tei namil, ihe malahos. Uling hisen ihe 'Sion'. 14 Poten nan isak ni xamil mulimaal, e moletin sav holu mun limaal. 15 Natumali ihe moletin xa eilep e pe met Hi Suv. Xi namu ti vari uaen mu oei te xeih sav mun. E melele xa ita tamu e vang ninen, Ninin Eo mei ipolu en. 16 E xi iaxa ileh mol Isrel xil ihe holu litilomun limei visal Hi Suv nae. 17 E xi itiamu ni Hi Suv itel xeihen ixoni ngan xa tete provet Ilaetsa te tiamu. Xi ileh vituei ni tiramue xil itel horamue nae xil. E ihiles ngan xil xa di lalong ras, mei lihusil suse na Hi xa momal. Xi isak ni moletin na Hi xil livue xat xil ve melengien xa Suv nae istal en.”

18 Ma Sakaraea misis masxaxa ak bitene, “?Inou nihur horamue itep? Nikil neta xa obiteni minou itep? Ven nabe mometu ngamu e atou navan mun be tovolih.”

19 E masxaxa bit rilomun ni mini bitene, “Inou Kavriel xa di nasoh sangas visal Hi. Xi misil nou tengan xa mei nihit mese ni longeongen hos ak minuk. 20 E vengan xa otake reitin ti e neta xa nabiteni, ma uhe vut. Onasepin ti ituxoh melengien xa holesok xil ak mei istal.”

21 E melele xa Sakaraea da tamu e Nim Eo, vanut moletin tei ladatili e di lanemi labit, “?Veneh ma ba da be nousav?” 22 Melele xa Sakaraea mistal, misakras vasepin mi xil. Ma lakila xa Hi pisen neta tei mini. Xi misepin pisi mi xil nggo hen vengan xa be vut dat mak.

23 E melele xa polien na Sakaraea bus e Nim Eo, xi dilomun be metimal nan. 24 Tavehi ti, atou nan Elsavet di ni tuvava. Ma xi minggus dat tim ba duxoh aveti nan be lim (5). 25 E biteni mi xi tasen bitene, “Bos xa taxeak Hi Suv dutou ni nou, xi misak ni nou ninave unoun ti pe met moletin xil.”

Masxaxa Tei Bit Kila xa Lipes Iesu

Luk 1:26-38

26 E melele xa aveti na Elsavet be tei e he sav (6), Hi misil masxaxa Kavriel be taon tahal Nasaret xa de provins tahal Kaleli. 27 Kavriel nggur sepinien tei tengan iha ihit mese ni mi ate maxoe tei, hisen Meri. Meri, latesikoe xole tuei xa ihur moletin tei, hisen Siosep, xa nggo vatimol na Suv Toto Deved te tiamu. 28 Ma masxaxa ak mei mistal mi Meri e bitene mini bitene, “!Bos minuk! !Hi Suv memaal pupu ve xouk e bosei xouk ra atou sav xil tengan ituxol xatuk!”

29 E melele xa Meri milonge mak, minexo pupu e di minem ves koute te sepinien ak. 30 Di, masxaxa biteni mi Meri bitene, “!Ulum nakan ti! Hi memaal pupu ve xouk, Meri. 31 Xouk uti ni tuvava tei e ulingi ihe horamue. Ti, uling hisen ihe 'Iesu'. ^{▼▼1:31 Koute te his 'Iesu' be 'Hi iteh meulien'.} 32 Xi ihe eilep tei xa likesi ni 'Nat Hi xa de ut nesao’. E Hi Suv ipol ni mei ihe suv toto ixoni avu nan Deved xa te tiamu. 33 Mol Isrel xil liti pe hen ha vuma hoxalite teni ihe tovuol.”

34 Meri biteni mi masxaxa bitene, “!Inou natakil ti mu tiramue! ?Sepinien nam mei istal minou itep?”

35 Ma masxaxa bit rilomun ni mi Meri bitene, “Ninin Eo imei iti e xouk, e xeihen na Hi ikapis xol xouk. Ve rin ak, horamue xa upesi ihe horamue eo, e likesi ni ‘Nat Hi’. 36 ?Okil tumahin Elsavet? Xi mun ihur horamue tei nan, tave ti neta xa xi be tovolih ngamu. !Reitin mak! Elsavet xa moletin xil labit be lumalum, taxeak, aveti nan be tei e he sav (6). 37 Mak, ma neta tovuol xa Hi misakras vapol ni.”

38 Ma Meri biteni mi masxaxa bitene, “Namaal tengan nipol ni naha xa Hi Suv bit nipol ni. Bos tang istal minou ixoni ngan taxa osepin ni minou.” Di, masxaxa belingi ba.

Meri ba Misao ni Elsavet

Luk 1:39-45

39 Tavehi ti, Meri mea e mitemanon be metimal tei e vathu xil tahal Sudea. 40 Melele xa duxoh metimal ak, xi be tim sa Sakeraea xalu e mikes Elsavet. 41 E melele xa Elsavet milong rae Meri, tuvava nan nggelial e vangen. Ninin Eo bemei e Elsavet, 42 misak ni mikei be nesao bitene, “!Tuxolxatien na Hi di minuk mili e atou sav xil e di mun mi tuvava xa de xouk! 43 ?Veneh ma neta xa bos mak mikila vastal e nou, xa nine suv navan mikila bemei visal nou? 44 Vengan melele xa nalong rae nam, tuvava navan memaal e nggelial e nou. 45 Tuxolxatien na Hi di e xouk vengan xa oteneket xa sepinien na Hi istal minuk ixoni ngan xa tesepin ni minuk.

Kikeien te Memesien na Meri

Luk 1:46-56

46 Meri bitene,

“Inou, napet rat his Hi.
47 Namaal pupu vengan xa Hi navan be Suv xa miteh meulien navan.
48 Xi en tabong ni nou ti xa nabe atou votei tang te polien nan.
Xosali iha, moletin xil ngasen ti lihithiteni xa Hi tetuxol xat nou.
49 Xi xa hisen be eo tepol ni holesok xil xa tellep minou texo xeihen nan.
50 Xi en isa e ngan xil xa di lamerere ni,
xil xa ladi taxeak e ngan xil xa ti limei itutou.
51 Nggo xeihen nan, Hi pol ni holesok xil tellep,
e di nggol rerat valkoai xil xa di laling xat lingxatien nae xil.
52 Xi mileh rerat suv toto xil ra von xeihen nae,
e pet rat moletin votei xil sung.
53 Hi misak ni ngan xil xa di mae nggat xil, langga vin xil ni anien xa,
e misil rerat ngan xil xa holesok nae holu, laka hon tang laba.
54 Xi bemei misa tutouen mi horamue xil xa langgo Isrel xa labe moletin nan.
Xi minem xat naha xa tehit xati, xa ipisen esaeen nan mi xil.
55 Xi di pol nggusil hitxatien xil xa tepol ni mi avu nar xil, mi Ebraham e mi vatimol nan xil, mol Isrel xil.
Hitxatien ak misakras vavus.”
56 E Meri de visal Elsavet aveti tol. Di, dilomun be tim.

Poten na Sion

Luk 1:57-66

57 Melengien bemei pipin xa Elsavet valing horamue nan, ma milingi be malahos. 58 Moletin sav xil xa ladi sangas visali del vatimol nan xil lalonge xa Hi Suv pol ni bos pupu mini, ma xil mun lamaal dela. 59 Melele xa melengien nan be tol e he sav (8), lamei tengan vahe vexaho. E labit laling his tamen, 'Sakaraea', vata en, 60 e Elsavet bit, “E-e! Hisen ihe 'Sion'.”

61 E xil labiteni mini labitene, “!His ak tovuol e vatimol nalu!” 62 Misak ni, lasak pisi di lasis Sakaraea ni he xil tang xa xi ien bei liling his eah en.

63 E Sakaraea bit lasa neta tova xa vakila vatis en. Ma midis, “Hisen be Sion.” Xil vus lamesep pupu ven. 64 E melele nen tak, Sakeraea mikila vasepin rilomun, e di pet rat his Hi. 65 Moletin xil vus xa ladi sangas latemanin. Ma longeongen usil holesok xil ak mikapis e rute xil xa hu di en e Sudea. 66 Ngan xil vus xa lalong sepinien xil ak di lanemi xa tuvava ak imeul imei itep. Lakila xa xeihen na Hi di e meulien nan.

Ninin Eo Mei Polu e Sakaraea

Luk 1:67-80

67 Ninin Eo bemei e Sakaraea ma xi bitehiteni bit,

68 “Rimes Hi Suv na moletin xil tahal Isrel.
Xi pol ni suse tengan moletin nan xil mei vexil vamase.
69 Hi isa 'Moletin teteh meulien en' xa nggur xeihen, mi xir.
Xi ixo vatimol na Deved xa tehe moletin na Hi.
70 Hi tehit xati texo provet eo xil te tiamu,
71 xa isa 'Moletin teteh meulien en' imei,
ileh rat xir ra he moletin xil xa di laketeh misa ni xir.
72 Xi tehit xati mun xa ipisen esaeen nan mi avu nar xil,
e minem xat hitxatien eo nan
73 xa tepol ni tetel avu nar Ebraham tetel sepinien tei xa nggeih.
74 Hi tehit xati xa ileh rat xir ra he ngan xil xa di laketeh misa ni xir,
tengan melele xa ranggusil Hi, ulixir nakan ti e,
75 e mikila riti e meulien tei xa ihe eo e imal e pe met Hi,
e melengien xil vus te meulien nar.”

76 Di, xi biteni mi tuvava nan bitene,

“E xouk, natuxuli, likesuk lihit obe provet tei na Hi xa be nesao.
E xouk utiamu ni Suv ha ti usak mese ni suse nan.
77 Upisen ni mi moletin nan xil xa Hi iteh meulien nae
e naketeh ti mun nasa mi xil.
78 Eheien e esaeen polu en.
Xi isa 'moletin te teh meulien en' mei istal mi xir,
ixoni eai xa mistal bemei nesao.
79 Xi ileluv xol ngan xil xa ladi ut te maluxoluk e di uli mikan ni maten;
e ileluv mun tengan ipisen suse te tomat mi xir tengan rihusili.”
80 Horamue ak meul, mei ven nggeih, e xeihen na Ninin Eo mei polu en. E melele xa xi be tiramue, xi da tasen e uruvuol be duxoh melengien xa xi pol kokot ni polien nan del moletin xil tahal Isrel.