Luk 3 | TVK | STEP | E melele xa Taeberius tehe Sisa tahal Rom duxoh huram le tei bus (15), moletin hat iaxa di latetutou ni lelaxatien nan: Herot Antipas tehe suv toto tahal Kaleli; tunali Pilip, tehe suv toto tahal Ituria tetel Trakonaetas; Lisanias tehe suv toto tahal Abilin; e Pontias Paelet tehe vat te kavmen tahal Sudea.

‏ Luke 3

Setutuen na Sion xa Di Mikas Moletin Xil

Luk 3:1-20

1 E melele xa Taeberius tehe Sisa tahal Rom duxoh huram le tei bus (15), moletin hat iaxa di latetutou ni lelaxatien nan: Herot Antipas tehe suv toto tahal Kaleli; tunali Pilip, tehe suv toto tahal Ituria tetel Trakonaetas; Lisanias tehe suv toto tahal Abilin; e Pontias Paelet tehe vat te kavmen tahal Sudea. 2 E melele nen ak, Anas xal Kaeapas lunggur polien te Vatixar na pris xil.

E melele ak, Hi misa sepinien tei mi Sion, nat Sakaraea, e uruvuol. 3 Ma Sion mikakao e ut ngasen xa di sangas visal Oeisal Sodan e di misetu mi moletin xil bitene, “!Muhiles meulien namim ra tesaen! Ti, mei nikas xamim tengan ipisen ni mi moletin xil xa Hi iketeh ihos mi xamim!” 4 Provet Aesea tetis usil setutuen na Sion e melele xa tehiteni tehit,

“E uruvuol, moletin tei di mikei,
'Musak mese ni suse na Hi Suv;
muserep suse nan.
5 Mutihin sesale xil,
e muhil lelen hu xil.
Mumal ni suse xil xa mikavui,
e mutihin suse xil xa misa.
6 !E moletin xil vus lipus xeihen na Hi
xa mei iteh meulien e xil!' ^{▼▼3:6 Is 40:3-5}”

7 Moletin xil holu lamei tengan Sion vakas xil e oei, e xi biteni mi xil bitene, “!Xamim munggoni vanut tetal tesa xa di langas vin moletin ni vulonge! ?Visi bit xamim mukila mulesae ra longpangasien xa Hi isa ni imei? 8 Mupol ni sexien xil xa ipisen ni xa mubiles meulien namim reitin. E ti munahiteni ti munahit Ebraham be avu namim, ma Hi ti imaal ve xamim vehakut. !E-e! Nabiteni mi xamim, Hi mikila vahiles hat xil ak mei laxoles xamim e lave vatimol na Ebraham xil. 9 Akis mese tuei da tengan itei amulut vatiei xil ngasen xa tataxao kuhi ti. Hi itei xotehi e iso ni ihe upang.”

10 E moletin xil ak lasis Sion, “?Ma xamem mupol ni naha vari?”

11 Sion biteni mi xil bitene, “Xosxa tei xamim eising nan lu, ma isa tei mi mosav xa nan tovuol. Xosxa anien amim di, ma musa rute mi mosav xil.”

12 Di, moletin xil xa di laleh vatu te takis lamei tengan vakas xil, e xil lasis Sion labit, “?Tisa, xamem muhiles meulien namem itep?”

13 Ma Sion biteni mi xil bitene, “Munaleh vatu te takis ti nali naha xa rae mae ni.”

14 E rut moletin xil te vaeen mun lasisi labit, “?E itep mi xamem? ?Xamem muhiles meulien namem itep?”

Ma Sion biteni mi xil bitene, “Munaxeih xat moletin xil ti tengan lasa vatu mi xamim. E munahur ti vatu naxo suse xa muluvos mosav e kot en. Mulonge ihos tang ve vatu xa di mungguri.”

15 Xil ngasen labesi xil, e di lanem vesi labit, “Xos Sion iaxa be Kristo xa Hi tehit xati tehit imei mi xir.”

16 Misak ni Sion bit rilomun ni mi xil bitene, “Nikas xamim ni oei tang. E tei xa itutou imei, ihur xeihen mu ili nou. E inou natapin ti xa nalal rat sandel nan. Xi ikas e xamim ni Ninin Eo e ni upang. ^{▼▼3:16 Upang ak ia moten ngan xil xa langgusil Iesu, e ia pangas ngan xil xa latahusil xi ti.} 17 Xi bue xat xi tengan valepis moletin xil ngasen, ixoni moletin xa di po savel tengan vaseti utut uit ra valite. Utut uit xa bos, ileh xati iha ihe e nim teni; e valite, iso ni ihe upang xa misakras vamat.” 18 E sexien nen tak, Sion misetu ni longeongen hos mi moletin xil e misel xat xil tengan lihiles meulien nae.

Suv Toto Herot Miling Sion e Nim te Xeih

Luk 3:19-20

19 Di, Sion sepin nggeih mun mi Suv Toto Herot vengan xa tehur atou na tunali tehe atou nan, hisen Herotias. E Sion di tehithiten holesok hao mun xa tamal ti xa Herot tepol ni. 20 Misak ni, Herot pol ni neta tei xa misa pupu mili sexien sav xil nan, xi biteni mi moletin nan xil tengan lital xat Sion e lilingi e nim te xeih.

Sion Mikas Iesu ni Oei ^{▼▼3:20-21 Matbiles tumulen ak be diamu ni Luk 3:19-20 vengan xa testal diamu ni melele xa Sion be nim te xeih.}

Luk 3:21-22

21 Melele xa Sion di tamu mikas moletin xil, xi mikas Iesu mun ni oei. E melele xa Iesu di misis, tilang hat misaha. 22 Ninin Eo bemei e tan nggoni mae, mei dotan en. E rae tei nggo ut nesao bitene, “Xouk obe natuxuli reitin e eheien navan di e xouk. Inou, namaal pupu ve xouk.”

Avu Xil te Vatimol na Iesu

Luk 3:23-38

23 Melele xa Iesu tepol kokot ni polien nan, huram nan tehe hanutap tei e hexalu mun (30). Xil vus lanemi labit xi be nat Siosep. E avu na vatimol na Siosep xil, hise xil temak:

Siosep tehe nat Heli, 24 xa tehe nat Matat, xa tehe nat Livae, xa tehe nat Melki, xa tehe nat Sanae, xa tehe nat Iosep, 25 xa tehe nat Matataeas, xa tehe nat Amos, xa tehe nat Neham, xa tehe nat Esli, xa tehe nat Nanggae.

26 E Nanggae tehe nat Mahat, xa tehe nat Matataeas, xa tehe nat Semein, xa tehe nat Sosek, xa tehe nat Soda, 27 xa tehe nat Soanan, xa tehe nat Resa, xa tehe nat Serubabel, xa tehe nat Seltiel, xa tehe nat Neri.

28 E Neri tehe nat Melki, xa tehe nat Adi, xa tehe nat Kosam, xa tehe nat Elmadam, xa tehe nat Er, 29 xa tehe nat Sosua, xa tehe nat Eliesar, xa tehe nat Sorim, xa tehe nat Matat, xa tehe nat Livae.

30 E Livae tehe nat Simeon, xa tehe nat Sudah, xa tehe nat Siosep, xa tehe nat Sonam, xa tehe nat Eliakim, 31 xa tehe nat Melea, xa tehe nat Mena, xa tehe nat Matataha, xa tehe nat Netan, xa tehe nat Deved.

32 E Deved tehe nat Tiese, xa tehe nat Ovet, xa tehe nat Boas, xa tehe nat Salmon, xa tehe nat Nason, 33 xa tehe nat Aminatap, xa tehe nat Atmin, xa tehe nat Arni, xa tehe nat Hesron, xa tehe nat Peres, xa tehe nat Sudah.

34 E Sudah tehe nat Siakop, xa tehe nat Aesak, xa tehe nat Ebraham, xa tehe nat Terah, xa tehe nat Nahor, 35 xa tehe nat Seruk, xa tehe nat Rehu, xa tehe nat Pelek, xa tehe nat Eber, xa tehe nat Sela.

36 E Sela tehe nat Kenan, xa tehe nat Arpaksat, xa tehe nat Sem, xa tehe nat Noah, xa tehe nat Lamek, 37 xa tehe nat Metusela, xa tehe nat Inok, xa tehe nat Saret, xa tehe nat Mahalalil, xa tehe nat Kenan,

38 E Kenan tehe nat Enos, xa tehe nat Set, xa tehe nat Adam, xa tehe nat Hi.