Luk 5 | TVK | STEP | Vatei, Iesu misoh de suhon te Oei Kaleli sangas ni Keneseret e moletin xil labe holu pupu. Lamei lating xati tengan lalong ti sepinien na Hi.

‏ Luke 5

Iesu Mikes Kokot ni Moletin Hat xa Ti Lihusili

Luk 5:1-11

1 Vatei, Iesu misoh de suhon te Oei Kaleli sangas ni Keneseret e moletin xil labe holu pupu. Lamei lating xati tengan lalong ti sepinien na Hi. 2 Sangas e ut, Iesu mipus tuturil lu na moletin ngan xil te sar meseo en xa lateling xalu ludi. Moletin nen xil laba lakas moten net nae xil. 3 Di, Iesu peou be tuturil tei, xa be na Saemon Pita, e misisi tengan vativini valis luvoluv vahe ling ut. Di, Iesu dotan de tuturil ak, e di mipispisi mi moletin xil xa ladi ut.

4 Melele xa Iesu misetu mi xil bus, di misepin mi Saemon Pita bitene, “Xamitel, tohalis ni tuturil valis vahe huinep, e mutistokovein net namitel ihe tan tengan mutsar ti meseo xil.”

5 E Saemon Pita bit rilomun ni mi Iesu bitene, “Suv, e vongien, matbilao tova tang e mataxur ti meseo vari. E vengan xa obiteni minou mak, ma bos tang, matiso net namatel ihe tan.” 6 E melele xa xatel latso net be tan, meseo xil holu mei laba en vuma ... sangas langgur papas net. 7 Ma latokei ba ni tua natel xil xa ladi e tuturil sav mun tengan mei litutou ni xatel. Ma lamei lase tuturil xalu vus ni meseo vuma ... polu tova tang, sangas xa ti lalomarir. 8 Melele taxa Saemon Pita pusi mak, mot be tan mitingeiril pe met Iesu e biteni mini bitene, “!Suv, onamei ti sangas visal nou! Inou nabe moletin tesa tang.” 9 Pita biteni mak vengan xa xi del ngan xil vus xa ladi visali lamesep ni vanut meseo xa latesar xil.

10 Xalu xa lupol del Saemon Pita, hisealu Temis e Sion xa lube nat Sepeti, xalu mun lumesep. E Iesu biteni mi Saemon Pita bitene, “!Ulum nakan ti! Taxeak iha, onasar kes ti meseo tang, e ti usar moletin xil mun.”

11 Ma lalihi tuturil nae be ut, lastokovein holesok nae xil di, e laba langgusil Iesu.

Iesu Dal Rat Moletin Tei Ra Meseien Leporsi ^{▼▼5:12 Leporsi be meseien xa pol ni hilbe moletin di mat, misak ni menuk xa da en bo. Siu xil labit meseien leporsi misa mak mu mili meseien sav xil. Moletin xa ngguri natuxol ti moletin sav. Lalingi da sen nga tang.}

Luk 5:12-16

12 Vatei, Iesu temei tehe taon tei. E rute ak, moletin tei da en, meseien leporsi tehas pupu ni. E melele xa moletin ak pus Iesu, bemei visali e mot mitingeiril be tan pe valnaon. Xi midak kesi bitene, “!Suv, xosxa iem bei, xouk okila opol ni veok vamemese!”

13 Ma Iesu misa hen ba duxoli, e bitene, “Ieok bei napol ni. !Vem imase!” Vatei takes, meseien nan bus, relingi vari. 14 E Iesu misepin nggeih ba ni bitene, “Onahithiteni ti mi mosav xil, e uha mu, upisen xouk mi pris tova xa de Nim Eo tengan ipus kuh tenbom. Ti, usa sanien eo nam mini ihusil naha xa Rae xil na Mosis tehiteni. ^{▼▼5:14 Lev 14:1-32} Imak, ma moletin xil ngasen likila xa meseien nam bus, omemese ngamu.”

15 Mak toma, e longeongen usil naha xa Iesu pol ni di kapis miloh be ut sav xil mun. Ma, vanut moletin xil holu lamei tengan xa ti litaeong ni pispisien nan e ti ileh rerat meseien ra xil. 16 E vehakut, Iesu milang ni ut ngan tengan ha ti ita sen en e ti isis.

Iesu Pol ni Moletin Tei xa Rut Tenben Temat Mikakao

Luk 5:17-26

17 Melengien tei, Iesu di mipispisi mi moletin xil, e rut Parasi xil del tisa xil te Rae xil na Mosis mun latexo rut ut ngan xil e provins tahal Kaleli, e hal Serusalem e rut ut ngan mun e provins tahal Sudea. Xil ak mei latotan e di lataeong ni Iesu. E xeihen na Hi Suv bemei nggeih mu e Iesu tengan mikila di mileh rerat meseien ra moletin hao. 18 E melele nen ak, moletin ngan xil lamei lapo tei xa rut tenben mat de von paten nan. Lasak pisi lapoe vahe nim tengan vaha lalingi pe met Iesu. 19 E vengan xa vanut moletin xa de nim nggonaxon pupu, lasakras lave sangas visal Iesu. Mak toma, lapoe lapeou labe hilim nesao, ladal rerat rut hilim ak, e lapol ni mesal en. Di, lasae ni moletin ak del von paten nan nggo en, ba vari de hilaep te moletin xil, momal pe met Iesu. 20 Melele taxa Iesu mile kil neketen na termali, biteni mi moletin ak bitene, “Tua, xosali, nakas moten met Hi ve tesaen nam tengan iketeh ihos rilomun ni xouk.”

21 Melele xa Parasi xil del tisa xil te Rae xil na Mosis lalonge mak, di laseputut ni labitene, “!Ei! ?!Moletin ak di bit xi pipin mi Hi!? Hi kestang mikila ipol ni moletin imeluv ra tesaen xil nan.”

22 E Iesu mikil nenemien nae, ma biteni mi xil bitene, “?Veneh ma di munemi mak? 23 ?Midep? Be temale minou tang tengan xa namiteni mi moletin ak namitene, 'Omeluv ra tesaen xil nam,' mu namiteni mini namit, 'Mea soh e kakao'? 24 E taxeak mupusi xa Nat Moletin minggur xeihen e ut etan tengan vasak ni moletin vameluv ra tesaen xil nan.” Di, Iesu biteni mi moletin ak bitene, “!Mea soh! Po von paten nam e kakao he tim.”

25 Vatakes, moletin ak mitamea misomal e hilaep te moletin xil ak. Mipo von paten nan, e suse nan be tim di misa memesien ba mi Hi. 26 Xil vus latemanin ni e misak ni xil lanem pupu. Lames Hi ven e labitene, “!Xosali, rapus neta tei xa mahulong pupu!”

Iesu Mikes Livae Mei Ti Ihusili

Luk 5:27-32

27 Dutou ni ngan nen ak, Iesu mistal nggo nim ba, e pus mol Siu tei xa di pol mi kavmen, hisen Livae. Xi dotan de von polien nan tengan moletin xil ti laxal takis mini. Di, Iesu mikesi bitene, “!Amei, husil nou!” 28 Misak ni Livae be reling holesok nan xil di, e ba nggusil Iesu.

29 Dutou ni ngan ak, Livae pol ni anien tei xa mahulong mi Iesu e tim san. Ma misis moletin te takis xil del rut moletin sav ngan xil mun tengan lamei e lavanien vituei. 30 Parasi xil e rut tisa te Rae xil na Mosis di laseputut ni Iesu mi moletin xil nan labitene, “?Veneh ma di mungganien e di mumun del moletin xil te takis e del rut moletin tesa sav xil ak?”

31 Iesu biteni mi xil bitene, “Moletin xil xa di lanemi xa latamesei ti, iexil tavei ti tokta. E tokta be na ngan xil kestang xa lakila labit lamesei. 32 Inou natamei ti tengan xa ti nikes moletin xil xa labit meulien nae momal ngamu. E-e, natemei tengan ti nikes moletin tesa xil tengan ti lihiles meulien nae.”

Moletin Xil Lasis Pilei Iesu Usil Halen ni Anien ve Sisen

Luk 5:33-39

33 E melele Iesu da tamu e nim ma Livae, rut moletin ngan xil labiteni mini labitene, “Vehakut, moletin xil na Sion di lasis e di labal ni anien ven. E moletin na Parasi xil mun mak tang. E mapusi xa moletin nam xil latapol ni ti vamak. Vehakut, dit langganien e di lamun.”

34 Iesu biteni mi xil bitene, “E vong tetelien tei, moletin xil limei ve anien teni. Tamal ti tengan laval ni anien e melele xa moletin xa miteli del xat xil tamu ladi. 35 E melengien imei xa moletin tesa xil lihur rat nou ra moletin navan xil. Itutou ni melele nen ak, xil ti sung lihal ni anien.”

36 Di, Iesu dei vole mi xil bitene, “Moletin tovuol xa vatal pas eising hu tei nan e vahur rute tengan vatil xol eising matu nan xa mahoe ni. Maxani, ipurun eising hu nan, e samulit eising hu ak tamal ti mun ni eising matu. 37 Moletin tovuol xa vateh uaen hu vahe valite matu xa lapol ni ni hilbe sipsip vengan xa nggeih ngamu. Maxani, uaen hu ikaeo vuma ... isak ni valite matu iposou e imahoe. Iti, uaen imie vuma ... ivus, e valite mun isa vari. 38 E-e, uaen hu bos xa litehi ihe valite hu xa mavoh tang. 39 E moletin xil xa di lamu uaen matu, xil iexil tavei ti lamu uaen hu vengan xa xil lanemi labit, 'Uaen matu bos mak mu.'” ^{▼▼5:39 E vole ak, Iesu di biteni xa pispisien hu nan teisav ni pispisien matu na Siu xil.}