2Pe 3 | Tausug | STEP | Manga taymanghud ku kalasahan, amuna ini in sulat ku hikaruwa mawn kaniyu. Ha karuwa sulat ku ini mawn kaniyu tiyuyuan ku tuud hipatumtum kaniyu in pasal sin hindu' kasabunnalan bakas niyu diyungug ha supaya tumaptap in pamikil niyu marayaw.

‏ 2 Peter 3

Jimanji' in Almasi Magbalik pa Dunya

1 Manga taymanghud ku kalasahan, amuna ini in sulat ku hikaruwa mawn kaniyu. Ha karuwa sulat ku ini mawn kaniyu tiyuyuan ku tuud hipatumtum kaniyu in pasal sin hindu' kasabunnalan bakas niyu diyungug ha supaya tumaptap in pamikil niyu marayaw. 2 Mabaya' ku hipatumtum kaniyu in manga lapal-kabtangan kiyapamung sin manga kanabihan sin masa nakauna yadtu, iban sin manga daakan sin Panghu' natu' Īsa Almasi, amu in manglalappas kātu'niyu. In katān daakan sin Almasi kiyabayta' na kaniyu sin manga kiyawakilan niya.

3 Muna-muna subay niyu tuud kahātihan marayaw sin ha susūngun ha kahinapusan sin masa awn manga tau amu in magparūl sadja sin hawa-napsu sin baran nila. Udju'-udjuun nila kamu pasal sin pag'agad niyu ha Almasi. 4 Laung nila kaniyu, “Bukun ka jimanji' in Almasi sin magbalik siya mari pa dunya? Na, haunu na siya bihaun? In manga kamaasan natu' yadtu amu in nagkahagad pasal sin pagbalik sin Almasi, sampay sadja sila miyatay in unu-unu katān wala' da napinda dayn sin tagna' kaawn sin dunya!” 5 Sagawa' bukun bunnal in bichara nila yan. Tiyuud liyupa sin manga tau yan, sin ubus mayan limabay pila masa, hiyansul sin Tuhan in dunya, amu in tagna' piyapanjari niya. Dayn ha Parman sin Tuhan naawn in langit iban lupa'. In lupa' gimuwa' dayn ha tubig, iban in tubig, amu in makarihil kabuhi' ha unu-unu katān piyaawn. 6 Damikkiyan tubig da isab in piyanghansul sin Tuhan ha dunya ha waktu sin pag'umbak-tawpan. 7 Lāgi' nagparman da isab in Tuhan sin in langit iban dunya ini bihaun, ha susūngun hansulun niya da sin kāyu. Bang maabut na in waktu paghukum niya ha manga mānusiya' amu in way buga' nila ha Tuhan, hansulun niya da in langit iban dunya. Lāg'i in tau di' magmabuga' kaniya pagmulkaan ha lawm narka'.

8 Sagawa' manga taymanghud ku kalasahan, ini in tumtuma niyu tuud. Bang ha Tuhan in lugay sin hangka-adlaw biya' da sin lugay sin hangibu tahun, iban in lugay sin hangibu tahun biya' da sin lugay sin hangka-adlaw. Hāti niya bang ha Tuhan sibu' da in lugay sin hangka-adlaw iban sin hangibu tahun. 9 Na, in Tuhan bukun malallay huminang sin unu-unu na kiyajanji' niya biya' na sin pikil sin tau kaibanan. Sagawa' in Tuhan mapasinsiya kaniyu, sabab in kabayaan niya wayruun mānusiya' in magmula ha adlaw mahuli. Hangkan dīrihilan niya pa waktu in mānusiya' katān magtawbat sin manga dusa nila iban humundung na dayn ha manga hinang nila mangī'.

10 Malayngkan, tantu tuud dumatung in adlaw, amu in pagtawagun Adlaw sin Panghu'. Lāgi' in adlaw yan di' tuud kaalimatahan sin tau sabab in pagbalik niya biya' yan sapantun sin pagsūd sin sugarul pa lawm bāy. Di' kaingatan sin tau in waktu bang ku'nu. Na, bang dumatung na in waktu yan, karungugan na sin manga tau in lagublub makusug sarta' in langit malanyap na iban sin unu-unu katān ha taas langit malanyap na hansulun sin kāyu. Damikkiyan in dunya iban sin katān luun niya, malanyap da isab hansulun sin kāyu.

11 Na, pagga niyu kaingatan na sin in unu-unu katān ha langit iban dunya malanyap da hansulun sin kāyu, na subay niyu pabuntulun in addat-tabīat niyu. Subay suchi in pangatayan niyu iban subay kamu magad sadja ha kabayaan sin Tuhan. 12 Yan in subay hinangun niyu ha salugay niyu nagtatagad sin adlaw pagtawagun Adlaw sin Tuhan. Tuyui niyu tuud hinanga in daakan sin Tuhan kaniyu ha supaya sumamut na in pagdatung sin adlaw niya, sabab ha Adlaw sin Tuhan, amuna isab in adlaw malanyap na mahansul sin kāyu in langit iban sin unu-unu katān ha taas langit. 13 Sagawa' jiyanjian da isab kitaniyu sin Tuhan dihilan langit ba'gu iban dunya ba'gu, amu in wayruun na unu-unu mangī' ha lawm niya. Na, amu yan in tiyatagaran natu'.

14 Na, hangkan manga taymanghud ku kalasahan, ha salugay niyu nagtatagad sin waktu yan, pagtuyu' tuud kamu magpabuntul sin addat-tabīat niyu ha supaya pagbalik sin Almasi, suchi in pangatayan niyu iban wayruun unu-unu mangī' kabaakan niya duun kaniyu, iban ha supaya siya kasulutan kaniyu. 15 Na, amu sadja in tumtuma niyu in pasinsiya sin Panghu' natu' Īsa Almasi. Hangkan siya di' pa magtūy magbalik mari pa dunya, sabab dīrihilan niya pa waktu in mānusiya' katān magtawbat sin manga dusa nila, ha supaya sila makabaak kalappasan. Biya' da isab ha ini in manga palihālan nasabbut ha lawm sulat piyasampay mawn kaniyu hi Paul, hambuuk taymanghud taniyu kalasahan. In pamikil dīhil kaniya sin Tuhan, amuna in siyulat niya piyasampay mawn kaniyu. 16 Na, in manga palihālan nasabbut ku ini kaniyu amuna isab in siyabbut hi Paul ha manga sulat niya. Awn manga palihālan kaibanan nasabbut niya ha sulat, amu in mahunit kahātihan. Hangkan in manga himumūngan niya dihilan dugaing maana sin manga tau, amu in way panghāti pasal sin manga palihālan ini, iban sin manga tau amu in hangkaray' magkahagad sin manga hindu' way kasabunnalan. Biya' ha yan da isab in hinang nila ha kaibanan sulat ha lawm Kitab. Na, in manga tau yan amuna in dimihil kamulahan pa baran nila.

17 Sagawa' in kamu manga taymanghud ku kalasahan, asal niyu na kaingatan in manga palihālan ini. Hangkan ayad kamu ha supaya kamu di' marā pa kalawngan kaagi sin manga tau limalanggal sin sara' sin Tuhan, iban bat kamu di' makasiha' dayn ha hindu' kasabunnalan. 18 Sagawa' pasūnga niyu in pangandul niyu ha tulung-tabang sin Panghu' natu' Īsa Almasi, iban pasūnga in ingat niyu pasal sin unu-unu katān pasal niya. Siya in Manglalappas kātu', lāgi' siya in lagguun natu' kasaumulan. Amin.

Wassalam.