‏ Genesis 4

1ఆదాము తన భార్య హవ్వను కలిసినప్పుడు ఆమె గర్భం ధరించి కయీనుకు జన్మనిచ్చింది. ఆమె, <<యెహోవా సహాయంతో నేనొక మగ బిడ్డకు జన్మనిచ్చాను>> అంది. 2తరువాత ఆమె అతని తమ్ముడు హేబెలుకు జన్మనిచ్చింది. హేబెలు గొర్రెల కాపరి. కయీను భూమిని సేద్యం చేసేవాడు.

3కొంతకాలం తరువాత కయీను సేద్యం ద్వారా వచ్చిన పంటలో కొంత యెహోవాకు అర్పణ ఇవ్వడానికి తెచ్చాడు. 4హేబెలు కూడా తన మందలో తొలుచూలులో పుట్టిన వాటిలో కొవ్విన వాటిని తెచ్చాడు. యెహోవా హేబెలును, అతని అర్పణను అంగీకరించాడు. 5కయీనును, అతని అర్పణను ఆయన అంగీకరించలేదు. కాబట్టి కయీనుకు చాలా కోపం వచ్చి అసూయతో రగిలిపోయాడు.

6యెహోవా కయీనుతో, <<ఎందుకు కోపగించుకున్నావు? ఎందుకు రుసరుసలాడుతున్నావు? 7నువ్వు సరైనది చేస్తే నీకు ఆమోదం లభిస్తుంది కదా, సరైనది చెయ్యకపోతే గుమ్మంలో పాపం పొంచి ఉంటుంది. అది నిన్ను స్వాధీపర్చుకోవాలని చూస్తుంది. అయితే, నువ్వు దాని మీద ఏలుబడి చెయ్యాలి>> అన్నాడు.

8కయీను తన తమ్ముడు హేబెలుతో మాట్లాడాడు. వాళ్ళు పొలంలో ఉన్నప్పుడు కయీను తన తమ్ముడు హేబెలు మీద దాడి చేసి అతణ్ణి చంపివేశాడు. 9అప్పుడు యెహోవా కయీనుతో, <<నీ తమ్ముడు హేబెలు ఎక్కడున్నాడు?>> అన్నాడు. అతను <<నాకు తెలియదు. నేను నా తమ్ముడికి కాపలావాడినా?>> అన్నాడు.

10దేవుడు, <<నువ్వు చేసిందేమిటి? నీ తమ్ముడి రక్తం నేలలో నుంచి నాకు మొర్రపెడుతూ ఉంది. 11ఇప్పుడు నీ మూలంగా ఒలికిన నీ తమ్ముడి రక్తాన్ని మింగడానికి నోరు తెరిచిన ఈ నేలమీద ఉండకుండా నువ్వు శాపానికి గురయ్యావు. 12నువ్వు నేలను సేద్యం చేసినప్పుడు అది తన సారాన్ని ఇకపై నీకు ఇవ్వదు. నువ్వు భూమి మీద నుంచి అస్తమానం పారిపోతూ, దేశదిమ్మరిగా ఉంటావు>> అన్నాడు.

13కయీను, <<నా శిక్ష నేను భరించలేనిది. 14ఈ రోజు ఈ ప్రదేశం నుంచి నువ్వు నన్ను వెళ్ళగొట్టావు. నీ సన్నిధిలోకి నేనిక రావడం కుదరదు. ఈ భూమి మీద పలాయనం అవుతూ, దేశదిమ్మరిగా ఉంటాను. నన్ను ఎవరు చూస్తే వాళ్ళు నన్ను చంపుతారు>> అన్నాడు.

15యెహోవా అతనితో, <<ఎవరైనా కయీనును చంపితే అతని మీద ఏడు రెట్లు ప్రతీకారం ఉంటుంది>> అన్నాడు. ఎవరైనా కయీనును చూసినప్పుడు అతణ్ణి చంపకుండా ఉండాలని యెహోవా కయీను మీద ఒక గుర్తు వేశాడు.

16అప్పుడు కయీను యెహోవా సన్నిధిలోనుంచి బయలుదేరి వెళ్ళి ఏదెనుకు తూర్పువైపు ఉన్న నోదు దేశంలో నివాసం ఉన్నాడు. 17కయీను తన భార్యను కలిసినప్పుడు ఆమె గర్భం ధరించి హనోకుకు జన్మనిచ్చింది. అతడు ఒక ఊరు కట్టించి దానికి తన కొడుకు పేర హనోకు అని పెట్టాడు.

18హనోకు ఈరాదుకు తండ్రి. ఈరాదు మహూయాయేలుకు తండ్రి. మహూయాయేలు మతూషాయేలుకు తండ్రి. మతూషాయేలు లెమెకుకు తండ్రి. 19లెమెకు ఇద్దరు స్త్రీలను పెళ్ళి చేసుకున్నాడు. వారిలో ఒకామె పేరు ఆదా, రెండవ ఆమె సిల్లా.

20ఆదా యాబాలుకు జన్మనిచ్చింది. అతను పశువులు పెంపకం చేస్తూ గుడారాల్లో నివాసం ఉండేవాళ్లకు మూలపురుషుడు. 21అతని తమ్ముడు యూబాలు. ఇతను తీగె వాయుద్యాలు, వేణువు వాయించే వాళ్ళందరికీ మూలపురుషుడు. 22సిల్లా తూబల్కయీనుకు జన్మనిచ్చింది. అతడు రాగి, ఇనుప పరికరాలు చేసేవాడు. తూబల్కయీను చెల్లి పేరు నయమా.

23లెమెకు తన భార్యలతో ఇలా అన్నాడు,

<<ఆదా, సిల్లా, నా స్వరం వినండి.
లెమెకు భార్యలారా, నా మాట ఆలకించండి.
నన్ను గాయపరచినందుకు నేను ఒక మనిషిని చంపాను.
కమిలిపోయేలా కొట్టినందుకు ఒక యువకుణ్ణి చంపాను.
24ఏడంతలు ప్రతీకారం కయీను కోసం వస్తే, లెమెకు కోసం డెబ్బై ఏడు రెట్లు వస్తుంది.>>

25ఆదాము మళ్ళీ తన భార్యను కలిసినప్పుడు ఆమె ఒక కొడుకును కన్నది. అతనికి షేతు అని పేరు పెట్టి, <<కయీను చంపిన హేబెలుకు బదులుగా దేవుడు నాకు మరొక కొడుకును ఇచ్చాడు>> అంది. షేతుకు ఒక కొడుకు పుట్టాడు. అతని పేరు ఎనోషు. అప్పటినుండి ప్రజలు యెహోవాకు ప్రార్థన చేయడం ఆరంభించారు.

26