1 Corinthians 12

Aktemakha nenmaikama nenmopvana

1Ketlhengkap elialheng’a, ka sma alpeiveskasekhak na aktemakha nenmopvanka’a aniem’o Eniapom Neten. 2Meltaiankolha lhta ketlhengkap meliaskeiam apkellaiangkave lhta aliateiangko apvalho’ok kakpota eltakneskasangkok ma’a qaselha akiokha alanemmalhka metka akmovana nak kanhan mankoliatongkoma. 3Ka nkeniemak ma’a askelelto nak eliohok ketlhengkap enenlhet apto la apietnema apmopvana Espíritu apankok Eniapom Neten, mankapvankek na eihemetkesek apvesai’a Jesús. Vanlha koka apvankek enenlhet elhenek Jesús apto Apveske koka aniem’o m’a apmopvana Espíritu Santo

4Nietnek alpalhkammalhka apkenmopvanka’a apieseksek meliaskeiam aniem’o m’a vanlha lhema Espíritu. 5Nnankek na moklhem’a mo’ok aktemakha mota apkenmakmekama aniem’o m’a apvanlha lhema Apveske. 6Apvanka’ak na ellanangkok lhamakho qaselha moklhem’a nak ma’a, aniem’o nhan apvanlha lhema Eniapom Neten apkellaikamok ma’a. 7Moklhem’a koka ennengko’o nhan nnak hengellangko nenmopvanka’a aniem’o Espíritu kakpota angeltakmelkeskesek apkellangiemhaikama m’a emmo’ok. 8Napokha nhan apketlhevangkok apkenmopvanka’a kakpota elpaqmetek nema apkeliamo aniem’o m’a vanlha lhema Espíritu, napokha nhan apketlhevangkok apkenmopvanka’a kakpota elpaqmetek ngkeskama apkeliangveiakmo m’a aniem’o koka nhan nheklhek ma’a Espíritu. 9Napokha nhan apketlhevangkok ngkeskama meliaskeiam, napokha nhan apketlhevangkok apkenmopvanka’a eltaqmelkeskamok anmaska apiempeiok aniem’o koka nhan ma’a nheklhek Espíritu lhkek. 10Napokha koka apketlhevangkok apkenmopvanka’a ellanangkok qaselha hempelapkeskama, napokha nhan apketlhevangkok apkenmopvanka’a etlhenek ania’a aniem’o Eniapom Neten, napokha nhan apketlhevangkok apkenmopvanka’a eliekpelkok espíritus melatsekama kanhan Espíritu aptaqmanma. Napokha nhan apketlhevangkok apkenmopvanka’a elpaqmetama nempaivoma melioho nak mokhom, napokha nhan apketlhevangkok apkenmopvanka’a kakpota elpeivesekhak ma’a nempaivoma melioho nak mokhom. 11Koka lhamakho qaselha nak nenmopvanka’a aniem’o m’a vanlha lhema Espíritu, apkennaskek apmak’akha la eniangkok apieseksek ma’a meliaskeiam la’a.

12Lhema apiokha nak enenlhet nlhaniek alpasmekha lhamakho aktemakha aknaiangko nak ma’a apiokha, nnavek na m’a apiokha nak Cristo. 13Nenlhaniek ennengko’o nhan nengelelto nak Jesucristo apkennemolhema, judios, griegos, nema allasennaikama nema apkelianmoma, metnangko nema apkelianmoma, nenlhaniek ma’a. Nnengkek na hengellavkeskamo konne iemmen, malha lhema koka ntaiekhak neniokha m’a aniem’o vanlha nhan lhema Espíritu, nemo nhan hengellaiangko Espíritu nak ma’a.

14Apiokha nak enenlhet nlhaniek alpasmekha m’a apiokha nak, have lhema. 15Ka aktonak emmenek anak ma’a nkotnek kelha aklheianma hengke’e:

—Have nak ko asto nak ha’e emmek anak, have nhan aspasmekha ha’e apiokha nak —kelha ngkotnek emmenek anak.

Koka mankoietok nkotnek ma’a nkanek akto nhan alpasmekha m’a apiokha nak. 16Ka kto nak enghaikok anak nkotnek kelha nhan hengke’e:

—Have nak ko’o asto nak ha’e engaqtek anak, have nhan aspasmekha ha’e apiokha nak —kelha ngkotnek ma’a.

Koka mankoietok ma’a, alpasmekha niekhe nhan apiokha nak ma’a. 17Kelha akto la alpasmekha apiokha nak lhamakho vanlha engaqtek anak alpasmekha aksavhekho apiokha nak ma’a, koka mankapvankek ennalhma m’a. Kelha akto la nhan alpasmekha apiokha nak lhamakho vanlha enghaiko’ok anak alpasmekha aksavhekho apiokha nak ma’a, koka nhan mankapvankek etekhanek aimes aktapeiam la’a. 18Koka nlhaniek alpasmekha m’a neniokha nak, Eniapom Neten apnengkanma moklhem’a nak ma’a apmahai’akha la nhan enengkenek ma’a. 19Koka akto la vanlha lhema emmenek anak ma’a, have lhema neniokha m’a. 20Nlhanie niekhe alpasmekha m’a apiokha nak, koka malha lhema ntakhak ma’a aniem’o alpasmekha m’a. 21Kelha nkotnek nkanak engaqtek anak emmek heng:

—¡Hei emmek, mankaimelhkak hepasmoma la lheia’! Kelha nkotnek engaqtek. ¡Koka mankolatsema nkotnek ma’a!

Kelha nha nkotnek empatek anak nkanak emmenek heng:

—¡Hei emmenek, mankaimelhkak hepasmoma la lheia’! —kelha nkotnek ma’a. 22¡Koka mangkolatsema nhan ngkotnek ma’a nkanek nkaimelhke mota m’a akpasmoma! Niekhe malha nkoiennaktema la’a, koka neten ankek aimommalhka mota m’a akpasmoma neniokha nak. 23Ka aknangko nak neniokha nak moklhem’a malha nkotno nak neten ankek akiaspommalhka, nentaqmelkasavek koka nentaqmelkeskama m’a. Kanhan aknangko nak moklhem’a neniokha henmankasmama nak, neten ankek nentaqmelkeskama m’a, 24koneng ankek koka mongeltaqmelkeskama allelto nak manghengenmankaskama.

Hai’, Eniapom Neten apnengkanma m’a aknaiangko nak neniokha kakpota angeltaqmelkasok akmaselhte nak aktaikamok neten aliaspommalhka nak. 25Kakpota nkolpasmalhkok ma’a, akmovana nhan nkopasmok mo’ok aknaiangko nak moklhem’a m’a neniokha nak. 26Ka aklengangko la akmaska lhema m’a aknaiangko nak neniokha, nsavhakhavek na anmaska aknaiangko nak ma’a neniokha. Koka aktakmelakho la m’a lhema aknaiangko nak neniokha lhkek, nsavhakhavek na alpaihekha av‘alho’ok ma’a aknaiangko nak neniokha.

27Ka apkelpasmekha nak ketlhengkap malha ntakhak apiokha nak Cristo, moklhem’a annangkok mok aktema apkenmakmekama apketlhevai’a. 28Amanie ampai’akhasekha apkeliekieskama Eniapom Neten iglesia moklhem’a nema allapaskamo, netamen apkeleltennasemmap ania’a, netamen na hengeletlhekmoskama, apkenmopvanka’a ellanangkok qaselha hempelapkeskama, apkenmopvanka’a eltaqmelkasekhak anmaska apiempeiok la’a, apkenmopvanka’a nhan elpasmok po’ok, apkenmopvanka’a nhan etnangkok apkelemhama apmaniaie’, kakpota nhan apkenmopvanka’a elpaqmetama apkelpakmeiasma melioho mokhom. 29Hai, moklhem’a nietnak apkenmakmekama mok aktemakha moklhem’a, have aplhamakho aptaikamok nema allapaskamo mota, have nhan aplhamakho apkeleltennasemmap ania’a, have nhan aplhamakho hengetlhekmoskama, apkenmopvanka’a nhan ellanangkok qaselha hempelapkeskama. 30Have nhan aplhamakho apkenmopvanka’a eltaqmelkeskamok anmaska apiempeiok, elpaqmetek apkelpakmeiasma melioho mokhom, have nhan aplhamakho elpeivesekhak apkelpakmeiasma melioho mokhom. 31Elienlhanmamo ta apteniaikamok apkenmopvanka’a aktangko nak neten ankavek aliaspommalhka la’a. Kolhva koka asmak’ak atlhekmoksek ketlhengkap aktemakha lhema qaselha neten ankek aktaqmanma.