1Cor 13 | TmfSC | STEP | Ka askapvanko la aliatama lhamakho aktemakha apkelpakmeiasma enenlhet’avok lhmankek ham kakpota nhan ángeles, koka mankoietnak ko’o askasekhai’o emo’ok, malha ta atnek ko’o m’a aktonak tava apak alleknaikamaha, nlho ka la nhan alleknaiekha nak ankok.

1 Corinthians 13

Nengamelaiam anak akto neten ankek akiaspommalhka

1 Ka askapvanko la aliatama lhamakho aktemakha apkelpakmeiasma enenlhet’avok lhmankek ham kakpota nhan ángeles, koka mankoietnak ko’o askasekhai’o emo’ok, malha ta atnek ko’o m’a aktonak tava apak alleknaikamaha, nlho ka la nhan alleknaiekha nak ankok. 2 Askapvanko la nhan alhenek aktakha la Eniapom Neten apaivoma, aihok na ania’a akielhammalhka akientalhnema nak aniangvomhok, ngkoitek na asiangveiakmo lhamakho qaselha. Akietno la nhan akiavai’a nkek moi’askeiam angvakteskesek akhaiam metaimong la akiavai’a, ¡aqhemo koka m’a, motnek ko’o asiaspommalhka m’a metko la m’a askasekhai’o emo’ok! 3 Nlho ka la nhan annaskok lhamakho asketsekama apieseksek anak metka nak apkelletsekamaha, angvangkok na asiokha nak kakpota avongkesek tep emo’ok, akhemo toka nha ngkotnek metko la askasekhai’o emo’ok ma’a.

4 Enenlhet akietno la apkasekhai’o po’ok, emankok apvalhok aptevasekpo la m’a, apiamo lhma apankek nahan, metka apiasepkeskama po’ok, metka aplhenaikama aktemakha apiangveiakmo kakpota nhan metka akiephesekama apkammakpo. 5 Metka nhan ngkollatsekama apatong la’a, metka nhan apteniai’a mota qaselha apankok apanke’. Metka aploma, metka apekkenaikama apvalhok aploma aniem’o aptevasemmap. 6 Have nhan nkopaiesekhak apvalhok apvet’o la mankopeivomo nak, koka akpaihekha apvalhok ma’a apvet’o la qaselha akpeivomo.

7 Enenlhet akietno la apkasekhai’o po’ok, metka astengangveiam apasmoma po’ok, mei’askeiam lhamakho m’a, apkelailhema qaselhaha, apmopvana nhan evaskapok neksa apieplavkeskama aplengangko la akientalhnema.

8 Mangkavankek nkomaskengvomok nengasekhai’o nak, koka nkomaskengvomok hata m’a nemmopvana nak anlhenek ania’a aniem’o Eniapom Neten, nkomaskengvomok hata nhan ma’a nenmopvana angeliatama mo’ok apkelpakmeiasma manioho nak mokhom, nkomaskengvomok hata nhan ma’a nenianveiakmo nak qaselhaha. 9 Malha nekhatkok ma’a nema neniamo nak kanhan nemmopvana nak anlhenek ania’a aniem’o Eniapom Neten, have aksavhommalhko nkek ma’a. 10 Nkonmaskengvomok hata nhan ma’a akvo’o ta qaselha aksavhommalhko nke ta nenlhevai’a.

11 Neksa astema nematka lhta ko’o, askeliatekama, nkelketamekama lhta nhan evalhok kakpota nhan asiekpelkemo malha lhta astemak nematka la’a, netamen aksavhommalhko astema nematka aniem’o asvanekamok. 12 Koka kolhvave nak nelvet’ak malha ieiam appok taiep, alhpanma la nhan nenvetai’a, nkovak hato ka aknem nenvetangveiakmo iokhalhmek ankek ma’a, malha metka la apma nenga’at hata nkotnek.

Hai, mankosavhommalhkok ma’a nema nenianveiakmo nak, nkovakha toka aknem nenianveiakmo aksavhommalhko nkoie’, ka aptemakha nak ma’a Eniapom Neten apiamo nentemakha.

13 Nietnek koka hanetolhem’a qaselha allelto mankonmaskengvaiam, ka kto nak alvesai’a mongiaskeiam, al·halhnekama engvalhok angvetak aktaqmanma kakpota nhan nengasekhai’o, koka aktema neten ankek ma’a nengasekhai’o nak.