1Cor 3 | TmfSC | STEP | Ketlhengkap elialheng’a, ka asnemo lhta apieseksek anak ketlhengkap ham, asmak’a lhta niekhe atnek atlhekmoksek aktemakha nak angetlhekmoksek alvanekamo nak apvalho’ok, koka ma lhta amopvanak ma’a ngkanek mankolvanemok mokhom apvalhok, mankoliehek aptemakha nak Cristo. Malha lhta nematka

1 Corinthians 3

Mankolhnemo mo’ok apvalho’ok apieseksek Corintios

1 Ketlhengkap elialheng’a, ka asnemo lhta apieseksek anak ketlhengkap ham, asmak’a lhta niekhe atnek atlhekmoksek aktemakha nak angetlhekmoksek alvanekamo nak apvalho’ok, koka ma lhta amopvanak ma’a ngkanek mankolvanemok mokhom apvalhok, mankoliehek aptemakha nak Cristo. Malha lhta nematka 2 apketkok aikamok anak neme nkok la ngken ketlhengkap. Ma lhta nkonmopvanka’ak etavangkok aptekamok la aliennaktema, kolhva nenvanlha nak mankollapvanka’ak mokhom 3 ngkanek nheklhek apketlhengkeskama mokhom aliaspongkomakha nak apvalho’ok. Apkeliasepkeskama po’ok, apkeliamenammap nahan, malha enenlhet la aplhengkeskama akiaspongkomakha nak apvalhok. 4 Moklhem’a lhna lhta mota aptaiangkok apketlheianma hengke’e:

—Ennengko’o nelieplavkaskek hengetlhekmoskama Pablo.

Koka napokha lhna lhta aptaiangkok:

—Ennengko’o nelieplavkaske hengetlhekmoskama Apolos —lhna lhta aptaiangkok ma’a.

Apkeliamenammakpek na lhta ketlhengkap apkenmahai’akha la elieplavkesek nengetlhekmosekamo lhta aniem’o nheklhek apketlhengkeskama aliaspongkomakha nak apvalho’ok. 5 Koka Apolos kanhan ko’o Pablo nengelelto vanlha mota hengellasennaikama Eniapom Neten kakpota angetlhekmosangkok ketlhengkap meliaskamek Cristo. Moklhem’a lhta ennengko’o nellan’ak nenmakmekama apkeltakha la Apveske engankok. 6 Malha askanma lhta ko’o aktek, netamen Apolos alhto ka apiaskesaikamok, Eniapom Neten alhto ka nhan apkaktengkeskama m’a. 7 Koka have apto neten apankek apiaspommap apto lhta apkanma, apto lhta nhan apiaskesaikamok ma’a, koka m’a Eniapom Neten apto neten apankek apiaspommap ngkanek apkaktengkaskek anammalhka la’a. 8 Apto apkanma nak kakpota nhan apto apiaskesaikamok apnemo po’ok ma’a, moklhem’a etlhevangko ta akianmoma aktemakha la apkenmakmekama. 9 Hai, ennengko’o nengelelto nenmakmesaikama Eniapom Neten, ketlhengkap koka malha aniep, malha nhan pa’at la akiavai’a Eniapom Neten apankok. 10 Hetaqmelkeskaskek ko’o askaniemhaikama Eniapom Neten heliekieskama kakpota atnek pa’at aniapom, askellan’ak ko’o akiennakteskama avhak pa’at, po’ok koka apto apkakheskama ietaphaimakko’ok. ¡Ellaho ta m’a eltaqmelkaso ta apkellanai’a pa’at! 11 Mankolatsekama ngkolhek akiaqmongkasakho mo’ok aktemakha nema alanai’a lhta akiennakteskamakha pa’at, Jesucristo koka apvesai’a m’a. 12 Ka takhalhet anak akiennakteskama envankek nenmak’akha la angellanak anmama oro, alienmomo akmopai’a, metaimong altakmanma anmennave nkoie’, iamet nekha’ak alpaihema, av’ok, iompa’at aliavai’a, lhamakho qaselha envankek angellanak ma’a. 13 Netamen, akvo’o ta aknem neliekpelkammalhkelha, talha ta nkoliekpelkok aktemakha apkellanekamok pa’at anak ma’a, aktaqmanma alanemmalhka, nlho ka la ngkolatsekama. 14 Ka alianmolhko la’a pa’at alanemmalhka, elhkak hata akianmoma apto apkelanai’a. 15 Koka mankolianmolhko la’a pa’at anak ma’a, melhkek hata akianmoma apto apkelanai’a m’a, nkotlhengkesek hata nhan mevongkasakpek tep ma’a.

16 Kotlhen hata apvalho’ok ketlhengkap elialheng’a, malha Eniapom Neten apnemakha ketlhengkap, apnek Espíritu apankok Eniapom Neten apvalho’ok ketlhengkap. 17 Hai, ketlhengkap apkellelto malha lhema pa’at alpokkenammalhka aniem’o Eniapom Neten, ka akno la aktevaskesko pa’at anak, etvaksek hata nhan Eniapom Neten ma’a.

18 Apno la apieseksek ketlhengkap apkanema la nkoietnak apiangveiakmo apankok apanke’, apiennengkasekpe pankek na m’a enenlhet anak, ntasek eihangvakhok apankok apanke apto meihangveiakmo, netamen hata m’a nkovak aptema apiangveiakmo m’a. 19 Aktaikama nkek ma’a napaqtek Eniapom Neten nenianveiakmo nak aniem’o engankok enganke. Ka ktemo nak aktalhesammalhka Eniapom Neten apaivoma hengke’e:

«Aptemeskaskek Eniapom Neten nema nak apkeliangveiakmo nkonmok al·hanemmalhka aniem’o apkeliangveiakmo apanko’ok apankave ^{▼▼Job 5:13}».

20 Ka ntemak na mokhom aktalhesammalhka vakkahak Eniapom Neten apaivoma:

«Apiavek Eniapom Neten aktaikama nkek ma’a alietnaikama apaqto’ok nema nak apkeliangveiakmo apanko’ok apankavek ^{▼▼Salmos 94:11}».

21 Ka ngkanek ntasek mellakpek etlhenama enenlhet apankek la’a, nkanek apanko’ok ketlhengkap lhamakho qaselha. 22 Ko’o Pablo, Apolos kakpota nhan Cefas nengelelto nhan malha enganko’ok ketlhengkap. Kanhan ma’a nenganiemhaikama nak, nengetsepma nak, qaselha nenvetai’a nenvanlha nak, ka nhan emmanie ta, lhamakho qaselha nak malha apanko’ok na ketlhengkap ma’a. 23 Cristo nhan apanko’ok ketlhengkap, Cristo nhan apto apankok Eniapom Neten ma’a.