1Cor 6 | TmfSC | STEP | Ketlhengkap elialheng’a, ¡meteniamo nkek hengiekpelkemo niapom meiho nak Eniapom Neten kakpota enmaskeskesek apkelammelhammap akietno la apieseksek anak ham! Ntasek koka ellanekha apankavek ketlhengkap apkelpokkenammap asongke.

1 Corinthians 6

Nellanekha engankave nellammelhammalhka nenieseksa

1 Ketlhengkap elialheng’a, ¡meteniamo nkek hengiekpelkemo niapom meiho nak Eniapom Neten kakpota enmaskeskesek apkelammelhammap akietno la apieseksek anak ham! Ntasek koka ellanekha apankavek ketlhengkap apkelpokkenammap asongke. 2 ¡Ketlhengkap hata nhan etnangkok apkeliekpelkemo apkellanekamok ngkollatsekama nlho ka la aktaqmanma aplhamakho enenlhet’avok alhma nkek ham! ¡Nkelietavek na eliekpelkok ketsek la apkellammelhammap apieseksek anak ketlhengkap ham! 3 Angeliekpelkok hata nhan ángeles ma’a, tep anke lhmok mankomanieme angeliekpelkok nelammelhammalhka la hengke’e nalhepop anak. 4 Mankaimelhkak eteniangkok ketlhengkap hengiekpelkemo niapom nkotno iglesia ankok ma’a kakpota ellaneskasekhak apkellammelhammap la ham. 5 Enmankangvom koka aptaiangkolha nak ¿Mamma nlho apieseksek anak ketlhengkap lhema enialheng apmopvana la eiekpelkok apkelanai’a ngkolatsekama nlho ka la aktaqmanma kakpota emaskeksek ma’a, he? 6 Mangkolatsema apkellammelhammakpo apankavek apieseksek anak ham, netamen tep ankek na ngkolatsekama nkek apkelioiakmo mota hengiekpelkemo niapom metno Jesucristo apnemolhema kakpota enmaskeskesek ma’a. 7 Mangkolatsema nkek apkellammelhammakpo mok apankavek apieseksek anak ketlhengkap ham. ¿Ntase nlho elvaskapekho ketlhengkap mankoietemo la nema allanei’o, he? ¿Ntase nlho nhan elvaskapekho kno la almenielhkaso qaselha apanko’ok, he? 8 Ketlhengkap koka apkeliaqmongkasakhek aktakha la nema allanei’o ngkolatsekama, apkellan’ak nkoietemo m’a, apkenmenielhkeskaskek na qaselha apanko’ok po’ok apiesekek anak ham. 9 – 10 ¡Ellaho ta m’a melietehek aptangkolha! Enenlhet la apkeltemengveiakmo lhma metnangkek hata apkennemolhema akieto nak aptemakha Apveske Eniapom Neten, apkellelto la apkellanaktema, apkeltakneskasekamok qaselha akiokha alanemmalhka, apnaqtevaskamo la aliemhapekamok, aptaikamok iama ngkelvana’ak, apkenmekha apkenno lheme’, apkenmenielhaikamok, apkenmasmo qaselha apanko’ok, anmen ato’ok, apkeltaknevaikamaha, apkenmopvanka’a eliennengkesek po’ok. Ka lhamakho nak hengke’e metnangkek hata apkennemolhema akieto nak ma’a aptemakha Apveske Eniapom Neten. 11 Ka aptaiangkelha lhta nhan moklhem’a ketlhengkap lhennenga qaselha ngkolatsekama nak, kolhva koka nnengkek aknalhvateskamo iemmen, kno nhan alpokkenkaso Eniapom Neten la apanko’ok, nnengkek na altemeskeskamo apkelpeivomo aniem’o Apveske Jesucristo kakpota nhan Espíritu apankok Eniapom Neten.

Manganemmalhka anmama neniokha nelanaktema ankok

12 Ka aptaiangko mota enenlhet:

—Evankek ko alanak asmak’akha la alanak —ka aptaiangko mota m’a.

Have kelha niapak, koka mankolatsama ta m’a apkelan’o ta apkenmak’akha la ellana, mellanko nkek nkonmama anmahai’elha la apvalho’ok. 13 Ka aptaiangkok na apketlheianma enenlhet’avok:

—Nentoma ankok ankek envakmo, kakpota nhan envakmo’ ankok ankek nentoma —ka aptaiangko mota m’a.

Koka Eniapom Neten hato ka enaqtevasekhak ma’a hanet anak.

Koka neniokha nak have antek ankok nenmensangveiam alhma’, koka neniokha nak ankok ma’a Apveske, kanhan Apveske apankok neniokha nak. 14 Aptemakha lhta Eniapom Neten aptemeskasekho lhta aphalhnankok apieseksek apkenmaskengvaiakmo Apveske, hata nha ngkotnek ennengko’o m’a aniem’o apmopvana.

15 Askeltavek eliangvomhok ketlhengkap apkeliokha nak malha nhan Cristo apiokha. ¿Ntase nlho nkoipetkak apkeliokha nak, aliokha ngkelvana’ak allanaktema, he? ¡Ma, mangkolatsema m’a! 16 Ngkanek apkeliepetkangvakmo la m’a, malha lhema ntokhak aliokha m’a. Ka ktemo nak na aktalhesammalhka vakkahak Eniapom Neten apaivoma hengke’e:

«Ka hanet anak ntakhek malha lhema aliokha ^{▼▼Genesis 2:24}».

17 Ka apkellelto nak apkelpasmekha Apveske, malha lhema ntokhak na apvalho’ok ma’a.

18 Enieniamo ta m’a naqtek nelanaktema nak, ngkanek apnaqtevaskama apankek apkeliokha aniem’o m’a, mangkolhnok aklhamakha nak ngkollatsekama apkellanekamok mankonaqtevaskasak apkeliokha nak ma’a. 19 Apkeliavek ketlhengkap apkeliokha nak malha pa’at apnemakha Espíritu Santo apkellaikamo lhta Eniapom Neten, have apanko’ok apankavek apkeliokha nak ketlhengkap, koka apto apanko’ok ma’a Eniapom Neten, 20 apto lhta nhan apkenmama nema akianmoma. Ka nkanek ntasek eltaqmelkese mota apkeliokha nak aniem’o apkeliehekho Eniapom Neten.