1Cor 9 | TmfSC | STEP | ¡Apkeliavek niekhe ketlhengkap asto nema heiapaskamo ko’o ngkanek asvetai’avek Apveske engankok Jesús! Ka astemeskesaiangko lhta nhan ketlhengkap Jesucristo apkennemolhema aniem’o aktemeskesaikamok asmakmekama lhta heiasennaikama Apveske, nietavek na alhkak akianmoma asmakmekama ka aptaiangko nak aplhamakha nema allapaskamo.

1 Corinthians 9

Akietemo aplhevai’a qaselha Pablo aniem’o nhan aptema nema apaskamo

1 ¡Apkeliavek niekhe ketlhengkap asto nema heiapaskamo ko’o ngkanek asvetai’avek Apveske engankok Jesús! Ka astemeskesaiangko lhta nhan ketlhengkap Jesucristo apkennemolhema aniem’o aktemeskesaikamok asmakmekama lhta heiasennaikama Apveske, nietavek na alhkak akianmoma asmakmekama ka aptaiangko nak aplhamakha nema allapaskamo. 2 Moklhem’a enenlhet hetlhenke mota motnema nema heiapaskamo ko’o, koka apkeliavek niekhe ketlhengkap astema nema heiapaskamo ko’o ngkanek aptaiangkek na Jesucristo apkennemolhema ketlhengkap aniem’o asmakmekama altemeskesaikamok, ngvetammalhkek asto have niapak anke astema nema heiapaskamo ko’o.

3 Moklhem’a enenlhet heliematkesama ko’o, koka angvasennalhko ta ehenkek ko’o lha, 4 nietavek ennengko’o angetlhevangkok nentoma, neniama akiaqmoiekha la nenmakmekama. 5 Nietavek na angeliantemok entava la Jesucristo aknemolhema nemmankolha la’a, ka aptaiangkolha lhta nha mota po’ok nema allapaskamo, kakpota nhan apkelialheng’a Apveske, ka nhan Cefas ^▼▼Pedro.. 6 Lhamakho apkellelto lhta nema alapaskamo nietavek etlhevangkok akianmoma apkenmakmekama la’a. ¿Se lha ntemak ko’o kakpota nhan Bernabe mankonmahai’o nak angetlhevangkok na akianmoma nenmakmekama, he? 7 Malha aptonak lhema soldado la’a, nietavek elhkak akianmoma apmakmekama, malha aktonak na enenlhet apkanmo nak aknema nak akielhna, netamen ma’a ntaqmelkaskaskek apkaniemhaikama aniem’o aptoma akielhna, malha aptonak na apkelanekama nepkesek, ntaqmelkaskaskek na apkaniemhaikama m’a aniem’o apiama neme pankok nepkesek, nietavek ankek ma’a. 8 Ka ley anak have ehenkok ehenkek, nietnek aktalhesammalhka ley apankok 9 Moises annenga, ka aktemo lhnak nanek aktalhesammalhka hengke’e:

«Meniapkesangkek atong buey neksa aptepelkekha trigo apelhkapkok», lhnak nane ntemak aktalhesammalhka m’a.

Ka ley anak aklheianma niekhe kakpota nkotaqmelkeskesek buey aniemhaikama, 10 koka have vanlha buey ma’a, ennengko’o nhan hengetlheianma kakpota nkoltaqmelek nellaniemhaikama ngkanek lhamakho henganemakha nak aklheianma altemo nkoltaqmelkesek nellaniemhaikama.

Hai, apto la apengkaiam lhepop aniep kakpota nhan apto la apkemposkai’a aiempeiok apkanma la aktek, nietavek na m’a elel·halhnek akianmoma m’a. 11 Nnavek na ennengko lha’, malha nenaikokha la aktek ania’a aktaqmanma apieseksek anak ketlhengkap, hengelietavek na angetlhevangkok lhamakho qaselha la akianmoma nenmakmekama. 12 Po’ok enenlhet apketlhevangkek na kolhvave nak akianmoma aniem’o apkelpasmoma ketlhengkap, tep ankek ennengko’o hengelietemo nhan angetlhevangkok akianmoma nenmakmekama apieseksek anak ketlhengkap, mang koka nkomak’ak angenmangkok takha m’a kakpota melpaqmetek hengellanho’ ennengko’o, malha hennaqtevaskesekha ta nhan etnangkok ania’a aktaqmanma nellengaskama. 13 ¡Apkeliave niekhe nhan ketlhengkap apkellelto nak apkenmakmekama Eniapom Neten apnemakha, apketlhevangke mota akianmoma m’a apkenmakmekama! ¡kakpota nhan apkellelto nak apkellasennaikama alvanlhemmalhkelha qaselhaha, aptavengkek na m’a akmatnama mota apnaqtoskama nema akpekkanvekha la m’a! 14 Apveske nhan apkeltemo etlhevangkok akianmoma apkellelto nak apkelpaieskama ania’a aktaqmanma. 15 Koka ehenkok ehenkek momak’ak amok takha akianmoma asmakmekama heietemo ko’o, ka vakkahak anak astalheskama have askeltemo hellangkok akianmoma, avanhek ko’o ammalhko evalhok aniem’o askeltennaikama ania’a aktaqmanma nak metka akianmoma, ntase niekhe nhan angvetsepok momek koka takha akianmoma asmakmekama nak.

16 Have askammalhko aniem’o askeltennaikama ania’a aktaqmanma, askanemmalhka moiekaksek ma’a, ¡ko’o la ta laie motno la m’a! 17 Asto la askeniemai’o ehenkek ko’o asmahai’a altennama ania’a aktaqmanma nak, ntasek na elianmongkesek asmakmekama m’a, koka have lhta ko’o askeniemai’o ehenkek ma’a, askanemmalhka lhtoka atnek aspaieskama ania’a aktaqmanma nak. 18 Koka nema akpaiesekha na mota evalhok ka malha akianmoma asmakmekama, nietave niekhe anmok akianmoma asmakmekama, koka momak’ak ko’o anmok takha m’a.

19 Have ko’o nema heiasennaikama nema apianmoma, astek koka malha nema heiasennaikama nema apianmoma kakpota alpasmok aplhamakho ketlhengkap nkolhnangkok na meliaskeiam Cristo alienlhanmok na alhamasekha la’a. 20 Neksa asnema lhta mota apieseksek anak judios, asieplavkaske lhta nhan ley apanko’ok, evanke lhta niekhe molvanankek ma’a, koka askeliehakhave lhta kakpota enmankok takha askeltennaikama. 21 Koka asno la apieseksek metnangko nak judios apkellelto nak metka ley Moises, astemengkek na aptaiangkolha m’a kakpota enmankok na takha askeltennaikama. Vanlha mota askeliehekho ley apankok Eniapom Neten, nnavek na ley apankok anak Cristo m’a. 22 Koka asnemo lhta apieseksek mankoliennaktema nak meliaskeiam Cristo, astemengkek na aptaiangkolha nak ma’a kakpota alpasmok meliaskamek na Cristo. Lhamakho apkellavakha lhma nkek ham asmangkelha la’a, astemengkek na aptaiangkolha m’a kakpota alpasmok elvongkasakpok na tep ma’a. 23 Lhamakho qaselha aktemakha nak askellanai’a kakpota nkotaqmelek ma’a ania’a aktaqmanma nak, kakpota nhan angvetsevaso ko’o aniem’o m’a.

24 Apkeliavek ketlhengkap aktonak nelpaivasemmalhka nak aplhaniek apkeniaikamok ma’a, koka lhema aphapak enaksepok akianmoma. ¡Eltaqmelkaso ta malha aptaikamok apkelpaivasemmap kakpota etlhevangkok akianmoma! 25 Hai, apkellelto la apkenmahai’a elpasengvomok apkelpaivasemmap, elpekkenekha aknaqtevaskama la apiempeiok kakpota ennaksepok ma’a, eteniamo ta apiempeiok kakpota ennaksepok akianmoma qaselha nelhanma nak empatek, koka nkomaskok hata nhan alatsengka m’a.

Ka nellaniemhaikama nak ennengko’o nengelelto Eniapom Neten apkennemolhema, malha nelpaivasemmalhka ntemak ma’a, koka akianmoma ta nentetema empatek anak mankavankek nkomaskengvomok ma’a. 26 Molpaivaselhkak ko’o malha metka apaqto’ok la’a, mang na altekpolhka neksa momopvana emeiok emo’ok. 27 Malha astekpoikama koka stak asiokha nak kakpota heliehekho, kakpota nhan mankolhek hetepkeso nhan malha nelpaivasemmalhka nak neksa askeleltennasekamok ko’o.