1Jo 1 | TmfSC | STEP | Ka vakkahak anak nennaktalheskama aktemakha aklheianma apto nak ma’a Apaivoma hengaikamok akiennaktema enneniek, ka Apaivoma nak apnengkek tep nak nanek nemakha sekha allanei’o lhamakho qaselha lhmankek ham, nelvetai’a enganke lhta nhan ennengko’o m’a, nellengai’a lhta nhan akvakmo hengelmangvei’o lhta nhan ennengko’o m’a, have niapak ankek ma’a.

1 John 1

Apaivoma hengaikamok neniennaktema

1 Ka vakkahak anak nennaktalheskama aktemakha aklheianma apto nak ma’a Apaivoma ^{▼▼Aplheianmo lhta mota Juan apvesai’a Apaivoma, Jesús koka m’a.} hengaikamok akiennaktema enneniek, ka Apaivoma nak apnengkek tep nak nanek nemakha sekha allanei’o lhamakho qaselha lhmankek ham, nelvetai’a enganke lhta nhan ennengko’o m’a, nellengai’a lhta nhan akvakmo hengelmangvei’o lhta nhan ennengko’o m’a, have niapak ankek ma’a. 2 Koka akiennaktema nak enneniek mangkotnengvaiam annelha nnengkek nak nanek lhemek Eniapom, netamen na akvai’o hengke’e nenieseksa ennengko’o, nelvetai’a lhta akiokha nkek ma’a ka netlheianmo mota aktemakha m’a. 3 Hai, netlheianme mota aktemakha lhta nenvetai’a, nellengai’a nhan, kakpota ketlhengkap hengelpasmekhak ennengko’o m’a, ka ktemo nak ennengko’o hengelpasmekho Eniapom kanhan Apketka Jesucristo. 4 Nennaktalheskaskek ennengko’o aktemakha qaselha nelvetai’a kakpota nkolpaihekhok ankek na apvalho’ok lhemek ennengko’o.

Eniapom Neten apto malha apommatema

5 Neleltennaskek ennengko’o ania’a aktemakha lhta hengeleltennaskama Jesucristo, Eniapom Neten nak apto malha apommatema, mamma lhnak na ienaqtesakha la lhma m’a. 6 Ka netlhenalhko la engankavek ennengko’o nengelelto nelpasmekha Eniapom Neten, koka nelloka nhan malha ienaqtesakha lhma m’a, nenmopvana ania’a koka nhan m’a, mongellanak na iokhalhmek ankek ma’a. 7 Koka nellava la atsak’elha lhma ennengko’o, malha aptonak Eniapom Neten apnek nhan atsak’elha lhma m’a, nentangkek nelpasmekha engankavek nenieseksa ennengko’o m’a, kanhan apketka Jesucristo ema apankok alalhnaskama engelvalho’ok malha alpaiseiam aniem’o qaselha ngkollatsekama nellanekamok. 8 Ka netlhenalhko la engankavek ennengko’o metka nellanekamok qaselha ngkollatsekama, have nhan iokhalhmek nenlheianma, neniennenkaselhkek na engankek ma’a. 9 Koka netlheno la engankek nellanekamok qaselha ngkollatsekama napaqtek Eniapom Neten, have niapak anke hata nhan etneskesama apankek ngkollatsekama nak ma’a, hengellalhnaskesek hata nhan engelvalho’ok malha alpaiseiam aniem’o nellanekamok ngkollatsekama m’a. Hai’, etnek hata m’a aniem’o apieplavkeskama mota apaivoma m’a, apeivomo nhan. 10 Netlheno la metka nellanekamok ngkollatsekama, malha nhan nentemeskasak apmopvana ania’a Eniapom Neten, mang na anmak takha apaivoma.