1Jo 3 | TmfSC | STEP | Avanhek ankek hengamelaiam Eniapom, ka nkeniemai’ak hengeltemeskeskama nelvesai’a Eniapom Neten apketkak ma’a. Manghengeliekpelkak ma’a apkellelto nak apkellanekamok ngkollatsekama ngkanek meliekpelkak na Eniapom Neten.

1 John 3

Nengelelto Eniapom Neten apketkak

1 Avanhek ankek hengamelaiam Eniapom, ka nkeniemai’ak hengeltemeskeskama nelvesai’a Eniapom Neten apketkak ma’a. Manghengeliekpelkak ma’a apkellelto nak apkellanekamok ngkollatsekama ngkanek meliekpelkak na Eniapom Neten. 2 Ketlhengkap apkellelto nak askellamelaiam, kolhva koka nentaiangkok Eniapom Neten apketkak, mangeliohok akiokho nkek nkotnek hata nellaniemhaikama, vanlha nekha atketsek neliohok ma’a. Koka nengeliavek angennekhok hata malha apiokha nak ma’a apvaktamo ta. 3 Koka apkellelto nak alel·halhnekama apvalho’ok elvetak hata m’a, malha apkelalhnasekpe pankavek kakpota etnangkok malha apkennemo m’a apto apkelalhnasemmap ma’a.

4 Koka apkellelto nak apkellanekamok qaselha ngkollatsekama, apkelieka’a mota ley apankok anak Eniapom Neten, ¡mangkolatsekama nkek ma’a apkellanekamok! 5 Apkeliavek ketlhengkap Jesucristo apvai’o lhta hengke’e kakpota hengel·hatsoskasangkok ngkollatsekama malha nelpatmekama ennengko’o, kanhan mamma nke lhta apkelanai’a la ngkollatsekama m’a. 6 Ka nkeniemai’ak na m’a aplhamakho apkellelto la apkelpasmekha m’a mellanengko mota lhamakho knem ngkollatsekama, koka apkellelto nak apkellanekamok ngkollatsekama, melvetak, meliekpelkak nahan. 7 Ketlhengkap eietkak apketkok, mellanko nkek eliennengkeskak ma’a. Enenlhet apto la apkelanai’a mota qaselha akpeivomo, koka apto apeivomo pankek ma’a malha nhan ma’a apto apeivomo. 8 Koka apto la enenlhet apkelanai’a mota ngkolatsekama, aniem’o nhan aveske keliaqhameio m’a, vanlha mota alanai’a ngkolatsekama m’a ampai’o lhnak nanek tep nak nanek alanemmalhko sekha lhmankek ham. Ka nkeniemai’ak apvai’o nhan Eniapom Neten Apketka kakpota etvaskesek na aktemakha alanai’a mota lhamakho qaselha ngkolatsekama m’a.

9 Mamma nkek na apkellanekamok ngkollatsekama m’a apkellelto nak Eniapom Neten apketkak, nnaiangkek apvalho’ok qaselha nepiava nak aktemakha apkellangiemhaikama aniem’o m’a Eniapom Neten, ka nkeniemai’ak na m’a metlhenkesek apkellanekamok ngkollatsekama ngkanek Eniapom Neten apketkak ma’a. 10 ¿Ko la aptemakha anioho’ apto la Eniapom Neten apketka, kanhan atka la keliaqhameio aveske, he? Nkaimelhkek hata ellanama sekhe’ apkellangiemhaikama m’a, ka melan’o la qaselha altaqmelo m’a, meniasekhek na enialheng, have Eniapom Neten apketka m’a.

Aktemakha nellamelammalhka

11 Ampai’o lhta sekhek ankek aptaikamok meliaskeiam ketlhengkap, nheklhe mota ania’a apkellengai’a aktemakha nellasekhammalhkoho. 12 Metnamo nkek na aktemakha lhnak nanek Cain, aniem’o lhnak nanek akmaikama keliaqhameio m’a akvakmo apkaqhekho lhnak apialheng apankek ma’a. Apkelanai’a mota ngkollatsekama, melhnok ma’a aptemakha apialheng vanlha lhnak nane mota apkelanai’a akpeivomo. 13 Ketlhengkap elialheng’a, hata nhan eltaknevak ma’a enenlhet’avok lhmankek ham, koka molpelapkesangkek ketlhengkap ma’a akvo’o la apkeltaknommap.

14 Ennengko’o lhennenga nellomaka lhta malha neletsepma, kolhva koka neliavek nentaikokhok mokhom enhalhnanko’ok ngkanek nellasekhavek engelialheng’a. Enenlhet meniasekhai’o la po’ok, malha apketsepma ntak m’a. 15 Enenlhet apto aptaqnongkoma enialheng, koka malha ntekioma niapom ma’a, mankoiennak na akiennaktema apneniek mankotnengvaianlha nnelha m’a aniem’o aptema ntekioma niapom. 16 Hengelvetaskaske lhta Jesús nentemakha nengasekhai’o emmo’ok neksa apketsepma lhta m’a henianmoma ennengko’o, ntasek na ennengko’o angankoho aklhamakho aimommalhkelha la’a akvakmo nhan nengetsepo akiaqmoiekha m’a emmo’ok. 17 Lhema enenlhet la nema apketsekama etak enialheng aimommalhka la nema akpasmoma, man koka epasmak ma’a aniem’o anmasmo qaselha apvalhok, mankoietnak na songkek nengasekhai’o nak aniem’o Eniapom Neten. 18 Eietkak apketko’ok, mangkolatsema etnangkok mok apatno’ok apkellasekhai’o po’ok, ntasek koka elpasmok ma’a. 19 Ka nelpasmo la mota emmo’ok, nkotlheianvakhok hata mota engelvalho’ok nengelelto nelpasmekha Eniapom Neten apto haveniapak ma’a. Envanka’ak hata nhan angelteteskakhok napaqtek ma’a metka altaikama engelvalho’ok. 20 Niekhe alketamekama nak engvalho’ok hengetlhenkeskekho nengellanekamok qaselha ngkollatsekama, Eniapom Neten koka apto neten apankek nema apiamo, mangkolhnok alketamekama nak engvalho’ok, apiavek na lhamakho qaselha. 21 Ketlhengkap apkellelto nak askellamelaiam, ka alketamekama nak engelvalho’ok manghengetlhenkeskekho la nellanekamok qaselha ngkollatsekama, koka envanka’a angelteteskakhak metka altaikama engelvalho’ok napaqtek Eniapom Neten ma’a. 22 Hengellangkok hata nhan ma’a qaselha nenmalhnengkolha la m’a ngkanek neleliehekhave mota m’a apkanemakha antangkok, nellaneiangkek na akleklemelha la apvalhok ma’a. 23 Ka hengke’e apkanemakha nak antangkok Eniapom Neten: Mangeliaskamek apvesai’a Apketka Jesucristo, kakpota nhan angellasekhalhkok na nenieseksa nak ennengko’o ngkanek apkanemakha antangkok ma’a. 24 Enenlhet apkellelto la apkelleliehekho apkellanemakha etnangkok Eniapom Neten, apkelpasmekha nhan ma’a, Eniapom Neten na apkelpasmakhak ma’a. Ka ngkanek nengeliavek na ennengko’o apnek engelvalhok Eniapom Neten aniem’o Espíritu apankok hengellaikamo lhta.