1Jo 4 | TmfSC | STEP | Ketlhengkap apkellelto nak askellamelaiam, menmamonkek takha aptakha la aplhenammakpo pankek la enenlhet apietnema Eniapom Neten Apvalhok ma’a. Koka eltaqmelkaso ta sekhek apkellailheiangko apketlhekmoskama apankok aptakha la m’a, kakpota nkotlhenek apvalho’ok apkeniemo m’a Eniapom Neten nlho ka la mma’. Ngkanek aplhaniek lhmankek ham apkeleltennasemmap ania’a apkenmopvanka ania’a.

1 John 4

Espíritu apkeniemo Eniapom Neten kanhan av’alhok ankok ammelhmakha nak Cristo

1 Ketlhengkap apkellelto nak askellamelaiam, menmamonkek takha aptakha la aplhenammakpo pankek la enenlhet apietnema Eniapom Neten Apvalhok ma’a. Koka eltaqmelkaso ta sekhek apkellailheiangko apketlhekmoskama apankok aptakha la m’a, kakpota nkotlhenek apvalho’ok apkeniemo m’a Eniapom Neten nlho ka la mma’. Ngkanek aplhaniek lhmankek ham apkeleltennasemmap ania’a apkenmopvanka ania’a. 2 Asmak’ak aleltennaksek ketlhengkap kakpota eliohok apietnema la Espíritu apankok Eniapom Neten. Koka enenlhet apto la aplheianma napaqtavek enenlhet’avok Jesucristo aptaiekho lhta enenlhet apanke, apvai’o lhta nhan nalhepop anak, koka enenlhet ma’a apietnema Espíritu apankok Eniapom Neten. 3 Koka enenlhet la melheianma m’a, meietnak na Espíritu apankok Eniapom Neten, nietnek koka av’alhok apvalhok ma’a ammelhmakha nak Cristo. Apkellengai’a lhta ketlhengkap ma’a nkovak hata hengke’e nalhepop anak av’alhok anak ma’a, ngvai’ak koka nhan ma’a.

4 Eietkak apketkok, apkelpasmekhak Eniapom Neten ketlhengkap, apkeltemeskesentamo lhta koneng apketsekama ania’a nak apkenmopvanka ania’a, ngkanek nnankek apvalho’ok apto aknema nak apmopvana metlhok aknaiangko nak apvalho’ok meliekpelko nak mokhom Eniapom Neten. 5 Meliekpelkak Eniapom Neten apketsekama ania’a nak apkenmopvanka ania’a, apketlhengke mota apkellammelhma Eniapom Neten, apkellailhave mota enenlhet anak ma’a apkellelto nhan apkellammelhma Eniapom Neten. 6 Ennengko’o koka nelleniem’o Eniapom Neten, hengellailhave mota m’a apkellelto la apkeliekpelkemo Eniapom Neten. Koka mankonmak’ak hengellailhok ma’a apkellelto nak melleniem’o nak Eniapom Neten. Netamen envanka’ak angelvetak apnaikamok la Espíritu akto have niapak anke nak niapom, nlho ka la nhan apnangko la av’alhok hengiennenkeskama ngken.

Nengamelaiam anak nkeniemai’ak ma’a Eniapom Neten

7 Ketlhengkap elialheng’a askellasekhai’o ntasek angellasekhalhko mota ennengko’o, ngkanek nengasekhai’o nak nkeniemai’ak ma’a Eniapom Neten. Enenlhet apto la apkasekhai’o mota po’ok, apto nhan Eniapom Neten apketka m’a, apiekpelkek nahan. 8 Koka apto la meniasekhai’o po’ok, meiekpelkak na Eniapom Neten, ngkanek Eniapom Neten apto nengasekhai’o niapom. 9 Hengelvetaskaske ennengko’o hengamelaiam Eniapom Neten, apkapaskamo lhta apketka vanlha apankek lhema nalhepop anak kakpota angelloka mota aniem’o m’a. 10 Nellasekhavek ennengko’o Eniapom Neten, koka akto have nengasekhai’o akiokho nkek ma’a. Koka Eniapom Neten hengellamelakmek ennengko’o akiokho nkek ma’a, ka ngkanek apkapaskamo lhta apketka kakpota enietsepok hengiaqmoiekha, aniem’o lhta nellanekamok ngkollatsekama ennengko’o.

11 ¡Ketlhengkap askellasekhai’o, akiavai’a nkek hengellamelaiam Eniapom Neten, nkaimelhkek na angellasekhalhkok ennengko’o! 12 Mamma enenlhet apvetai’o Eniapom Neten, koka nellasekhalhko la ennengko’o, eloka nhan nenieseksa ennengko’o, nkovenke pankok na hengasekhai’o m’a akvakmo aktakha nnelha akvanekamok. 13 Neliavek ennengko’o nengelpasmekha engankavek Eniapom Neten ngkanek hengellaiangke lhta Espíritu apankok. 14 Nelvetai’o lhta ennengko’o m’a, nelpaieskamo mota nhan ania’a aktemakha apkapaskamo lhta Eniapom apketka, kakpota elvongkesek tep aplhamakho enenlhet’avok lhmankek ham. 15 Apto la enenlhet aplheianma napaqtavek enenlhet’avok Jesús apto Eniapom Neten apketka, apasmekha nhan Eniapom Neten ma’a, Eniapom Neten na apasmekha m’a enenlhet anak.

16 Nelvetai’a lhta mota ennengko’o hengamelaiam Eniapom Neten, mongeliaskeiakmo lhta nhan hengellamelaiam ma’a, ngkanek Apto hengamelaiam aniapom. Enenlhet apto la apkasekhai’o mota po’ok, apto nhan nengaqtek ankek apasmekha Eniapom Neten ma’a, Eniapom Neten na apasmekha m’a enenlhet anak. 17 Ka ngkanek nkovomo nnelha akvanekamok nengasekhai’o nak. Netamen ma’a metka nhan nellai’a akvo’o ta aknem aliekpelkammalhkelha nentemakha ngkanek malha ennengko’o nengelelto Jesucristo takhalhet lhepop anak. 18 Enenlhet akietno la nengasekhai’o nak, mamma nhan apkai’akha m’a ngkanek ngvaneniek akiokho nkek nengasekhai’o nak, ntepkaskek apvalhok ma’a apkai’akha la nema akiaqmongkasekha ta aptemakha. Apto la enenlhet akietnema apkai’a aniem’o mankovanemok akiokho nkek nengasekhai’o nak.

19 Nengellamelakmek ennengko’o Eniapom Neten ngkanek apmanie pankek hengellamelaiam ma’a. 20 Apto la enenlhet aplheianma mota apkasekhai’o Eniapom Neten, koka aptaqnevakke mota enialheng la’a, apmopvana ania’a m’a. Apto la enenlhet apvetai’a mota enialheng man koka eniasekhak ma’a, mankapvankek na eniasekhok Eniapom Neten ma’a nkanek meta’ak ma’a. 21 Apkanemakha antangkok Jesucristo hengke’e: Enenlhet apto la apkasekhai’o Eniapom Neten, nkaimelhkek na eniasekhok enialheng la’a.