1 Peter 1

Aklheianma apvalhok Pedro

1Ko’o Pedro asto heiapaskama Jesucristo, nlhenkek evalhok ketlhengkap apkellelto apkellenteiapma apkellavakha apanke, apkelhpanmo nhan apkenmaiangko apkeliav’akha temma Ponto, Galacia, Capadocia, Asia kanhan Bitinia. 2Eniapom Neten apkeliekiesaikamok ketlhengkap kakpota etnangkok apkennemolhema apankavek ma’a, Espíritu lhta apkelpokkanma m’a kakpota eleliehekhok ma’a, nkolalhnaksek na ema apankok Jesucristo. Askeltavek na ko’o Eniapom Neten eiavenkasok apkeltakmelkeskeskama apkellaniemhaikama, ellangkok na altaqmelaikama apvalho’ok ketlhengkap ham.

3Angeliavenkaskesama ta apvesai’a Eniapom Neten apto apiapom apveske engankok Jesucristo ngkanek apietnai’avek nengaqta’a ennengko’o m’a, hengeltemeskesekho nhan malha la nempalleiam alhnankok aniem’o nhan aplhatekhangveiam Jesucristo. Kolhva nhan nnaiangkok ennengko’o alel·halhnekama engelvalho’ok have niapak anke 4angetlhevangkok hata qaselhaha aplheianmo lhta Eniapom Neten hengellangkok, apkeltakmelkeskamo m’a qaselha nak akieto neten, mamma aknaktevasemmalhka, mamma alpaiseianlha la nhan, mankomaskengvomek na m’a. 5Meliaskeiakmok ketlhengkap Eniapom Neten ka nkeniemai’ak apkeltakmelkeskamo m’a akieplomo apmopvana kakpota etlhevangkok hata lhema qaselha apeneskamo akietnaikama apaqtek ellangkok hata akvakmo ta aktakha nnelha aknem, akvesai’a nak ma’a nenvongkasemmalhka tep.

6Avanhek alpaiesekha apvalho’ok ketlhengkap ania’a nak, niekhe apkelvetai’a moklhem’a aknem aliepkonma, koka iakvatakho nkek ma’a. 7Koka aliepkonma nak akmahai’a nkotalhka aknangko nlho aliennaktema meliaskeiam, nlho ka la nkoliennaktema meliaskeiam. Malha talha nak akmahai’a nkoiekpelkok oro nke nlho ka la nhan have oro nke.

Hai, apkelvaskapo la ketlhengkap neksa akvai’a aliepkonma, koka nnankek ketlhengkap meliaskeiam akto neten ankek akmennave nkoie’ mangkolhnok ma’a oro nak akmovana nkomaskengvomok. Hata apvaktamo ta Jesucristo eliavenkeskasama ta apkelvesai’a ketlhengkap, eltemeskesek hata nhan neten apankavek, ellahok hata nhan ma’a.

8Melvetai’ok ketlhengkap Jesucristo, apkellasekhai’o koka m’a, mang na eliaskeiakmok nahan, avanhek ankek na alpaihekha apvalho’ok aliekangveiakmo 9ngkanek apkeliavek ngkolhek hata alvongkaso tep.

10Apkeleltennasemmap ania’a annenga apkelleliaikama lhnak nanek apkenmahai’a eliohok aklhenammalhka apmaniaie m’a, netamen apkeleltennaseiangke lhnak nanek enenlhet’avok ma’a nkovak hata qaselha metka akianmoma nema akpeneskamo, ka apketlhevaiangko nak ketlhengkap nenvanlha nak ma’a akvesai’a nak nenvongkasemmalhka tep. 11Cristo Espíritu apanko nak alientemongkeskamo lhnak nanek aleltemeskeskama elioho apkeleltennasemmap ania’a aktemakha aplengaiangko ta akientalhnema Cristo, aktemakha nhan qaselha hempelapkeskama nkovak hata netamen hata aplengaiangko m’a.

Apkelienlhanmeiangkave lhnak nanek ania’a niapma’ak annenga apkenmahai’a eliohok aknem nkovak hata, kanhan aktemakha qaselha akvetammalhka ta m’a. Koka Espíritu 12nkelvetaskeskangkek nak nanek ma’a mang koka elvetaiangkok ma’a, ennengko’o koka nenvanlha nak nelvet’a ie ania’a aktaqmanma nengvaiam tep anak. Hai, apkellengai’o nak ketlhengkap ania’a nak apkeleltennaikama aknema apkenmopvanka’a aniem’o Espíritu Santo nema apaskama aniem’o neten. ¡Ka nenvanlha nak akto aktaqmanma nkoie qaselha apkelvetaiangko nak ketlhengkap, akvakho niekhe nhan ángeles apkenmahai’a elpalhakvak ma’a!

13Ka nkeniemai’ak na ntasek nkolketamangkok apvalho’ok aktaqmelo kakpota ellanangkok qaselha akpeivomo, mellankek na nkonmama aliaspongkomakha nak apvalho’ok, elel·halhnama nhan apvektanlha ta Jesucristo avanhek hata nkotnek apkeltakmelkeskeskama apkellaniemhaikama.

Apkeltemo Eniapom Neten angellanangkok aktaqmanma

14Eniapom Neten apketkak ketlhengkap, ka ngkanek ntasek eleliehekho mota ma’a, melieplavkesek mokhom aliaspongkomakha lhta apvalho’ok aptaiangkolha lhta mota nhan lhennenga meliamelha lhta Eniapom Neten. 15Apkellavekama lhta Eniapom Neten ketlhengkap kakpota etnangkok apkeliamolhma apankek, ellanangkok qaselha altaqmelo, ka aptemo nak ma’a apiamolhma apankek ma’a. 16Ka aktemo nak na aktalhesammalhka vakkahak Eniapom Neten apaivoma hengke’e:

«Etnamo ta apkeliamolhma apanke, ka astemakha nak ko’o asiamolhma ehenkoie’ ▼

▼Levitico 11:45

».

17Eliekpelkok hata Eniapom Neten aptangkolha la enenlhet apkellanekamok aktaqmanma nlho ka la ngkolatsekama. Mellanhe’ aptemakha enenlhet, apneskamo po’ok koka apkellanei’o m’a. Ka apketlheno la ketlhengkap apiapma’ak Eniapom Neten, nkaimelhkek na ellahok ma’a neksa apkellangiemhaikama hengke’e nalhepop anak, 18ngkanek apkel·hatsoskakhe lhta neksa apkeltemakha lhennenga malha alpathetma la’a alleniem’o lhta m’a apkeltemakha apkelieihengka’a. Nkaimommalhke lhtoka sekhek ei’anmongkesek ma’a kakpota elienioskakhak ma’a, have koka oro nak kanhan patakkom alienmomo plata apianmongkeskamo m’a ngkanek apavok ngkotnek ma’a, 19koka apianmongkeskamak ma’a ema apankok aknema akmovana Cristo, nemo lhta angkongvaiakmo kakpota ematong malha aktemo nak nepkesek apketkok la’a metka nkek apiaqteikamaha. 20Tep nak nek Eniapom Neten apeneskamo aklhenaikama apvalhok eniapaksek hata Cristo, mellaneiakha lhnak lhamakho qaselha lhmankek ham, koka nenvanlha nak apvai’ak ma’a kakpota hengeltaqmelkeskesek nellaniemhaikama, ketsek na nkaimelhkak aknem aktemakha ta nnelha. 21Eniapom Neten aplhatekhaskeiam Cristo, aptemeskeskamo nhan neten apankek ma’a, ka meliaskeiakmo nhan ketlhengkap Eniapom Neten aniem’o nhan apkeltemeskeskama Cristo, nnankek na alel·halhnekama apvalho’ok eltaqmelkeskeskamok hata apkellangiemhaikama m’a Eniapom Neten.

22Kolhva koka ketlhengkap malha alalhnai’o apvalho’ok aniem’o apkeleliehekho ania’a akto have niapak anke, apvanka’ak na ellasekhok apkelialheng’a iokhalhmek ankek.

Hai, ellasekhakpo mota apankavek ketlhengkap 23ngkanek malha apalleiam la alhnankok mokhom, have aktonak ma’a engken anak hentengkeskama, ketlhengkap koka apalleiam aniem’o Eniapom Neten apaivoma nak akto akietnema aktema alhnankok, mangkotnengvaiam na nnelha. 24Ka aktemo nak na aktalhesammalhka Eniapom Neten apaivoma hengke’e:

«Enenlhet la’a akiakvatakho nkek aptaqmanma, malha aktonak panaktema amhamakha nke nak iokhalhma, iakvatakho nhan aktaqmanma, niemak’ak na elhnemok anak kakpota nkopallemmak ma’a, 25koka Eniapom Neten apaivoma nak metka aktemongvaiam annelha ▼

▼Isaias 40:6-8

».

Ka apaivoma nak akvesai’a ania’a aktaqmanma nema aleltennaskama lhta mota ketlhengkap.