1Pe 5 | TmfSC | STEP | Kolhva asmak’ak aleltennaksek metno apketko’ok anak apketlhengkeskeskama na mota apkaqnekha apieseksek anak ketlhengkap, ko’o nhan asto motno apketkok, asvetaiangko lhta nhan aplengaiangko Cristo, alhkak hata nhan qaselha altaqmelo akmo’o ta nkovak emanie nak.

1 Peter 5

Aktemakha apkellanemmakpelha etnangkok metno apketko’ok

1 Kolhva asmak’ak aleltennaksek metno apketko’ok anak apketlhengkeskeskama na mota apkaqnekha apieseksek anak ketlhengkap, ko’o nhan asto motno apketkok, asvetaiangko lhta nhan aplengaiangko Cristo, alhkak hata nhan qaselha altaqmelo akmo’o ta nkovak emanie nak. 2 Asmak’ak allangkok lhema aspaioma, eltaqmelkes hata enenlhet’avok apkeltemo lhta Eniapom Neten ellanamaha, malha la nepkesek ma’a. Eltaqmelkes hata nhan anmahai’o nkek apvalho’ok, have m’a kno la aliatengko ellanhok qaselha, have nhan akno la akianmoma patakkom, etnamok koka alleklemo nkek apvalho’ok. 3 Metnamo nkek na ellanhok aptemakha nak apveske apkellaikamo nak akientalhnema nke apkenmakmekama enenlhet, elvetaskesakpo ta nhan apankavek aptaikamok apkeltakmelkasemmakpo napaqtavek ma’a. 4 Netamen apvaktamo ta m’a Apveske apanko’ok apkellanekama nepkesek, etlhevangkok hata akianmoma apkennaksepma apkelelhnekha apkatko’ok metka aktepelkammalhka nhan ma’a.

Aktemakha apkellanemmakpelha etnangkok apketko’ok

5 Ketlhengkap apketko’ok eleliehekho ta metno apketko’ok anak, etnamok hata nhan nalhep’avek apvalho’ok apieseksek anak ham, ka aktemo nak na aktalhesammalhka vakkahak Eniapom Neten apaivoma hengke’e:

«Apkellammelhkek Eniapom Neten enenlhet’avok anak apkellammakpoho, apkeltakmelkaskaskek koka apkellangiemhaikama apkellelto nak nalhep’avek apvalho’ok».

6 Etnamok nalhep’avek, enmamok na takha etnangkok apveske apanko’ok Eniapom Neten aknema apmopvana, netamen hata nhan ma’a neten apankavek eltemeskasekhak na m’a. 7 Ellangkongvakha ta Eniapom Neten altaikama nak apvalho’ok ngkanek apkelpasme mota m’a. 8 Amanie la apkenmahai’a ellanangkok qaselhaha, nkaimelhkek nkolketmok apvalho’ok sekhe, elketnamok hata nhan ngkanek mankotno emmo’ok aveske keliaqhameio’ nloka motaha malha aktonak akmeiva la’a akielhaivekamaha akteniai’a mota akmak’akha la nkotvok akiokho nkoie. 9 Elammelh hata nhan akieplomo akiennaktema meliaskeiam ma’a, ka aliepkonma nak ketlhengkap nnavek na apkelvetai’a m’a apkelialheng’a aplhamakho lhmankek ham. 10 Koka apkelvaskapo la akiakvatakho nkek apkellengaiangko akientalhnema, eltemeskesek hata nhan apkelpeivomo Eniapom neten ma’a, eliennakteksek hata nhan, elteniaskesek hata nhan apiempeiok, ellangkok hata nhan apkeliangveiakmo aktemakha apkelvetai’a. Hai, etnek hata Eniapom Neten ma’a ngkanek avanhek apkellamelaiam ketlhengkap ma’a, apkeliekieskek na kakpota elpasengvomok aktakmelakha nkek nkotnengvaiam annelha apkelpasmekha Jesucristo. 11 ¡Ntasek hata etnek apveske Eniapom Neten mangkotnengvaiam annelha akieplomo apmopvana! Amen.

Aktakha nnelha apaivoma Pedro kanhan aklheianma apvalhok

12 Hai, akiakvatema nkek vakkahak anak astalheskama aniem’o nhan hepasmoma astema emo’ok nengaqtek eialheng Silvano, astalheskek vakkahak anak askellanemakha etnangkok, kakpota elvetaskesek qaselha altaqmelo alleniem’o Eniapom Neten akiavai’a apkellamelaiam ketlhengkap ma’a, etlhengkes hata nhan alpaihekha nak apvalho’ok aniem’o apkellamelaiam ma’a.

13 Nketlhenkek apvalho’ok apkellelto nak iglesia hengke’e Babilonia ketlhengkap ham, apkellelto nhan apkeliekieskama Eniapom Neten, nlhenkek na apvalhok eietka Marcos. 14 Ntasek etnangko mota apkelpaivesammap akieplomo apetsesma aniem’o apkellasekhammakpo ham, askeltavek na nkovaiventak aktaqmelaikama envalhok takhaplhet’ok apkelelto nak apkelpasmekha Cristo.