1Th 4 | TmfSC | STEP | Ketlhengkap elialheng’a, neleltennaskek lhema nempaivoma akieplomo apvesai’a apveske engankok Jesús, eltaqmelkasakpo ta lhamakho aknem ngkanek apiaspongkomakha Eniapom Neten ma’a, ka nentaiangkolha lhta nhan nengetlhekmoseiangko ketlhengkap ma’a, kolhva apkelleliahakhavek na ketlhengkap ma’a.

1 Thessalonians 4

Apkeltemakha antek Eniapom Neten

1 Ketlhengkap elialheng’a, neleltennaskek lhema nempaivoma akieplomo apvesai’a apveske engankok Jesús, eltaqmelkasakpo ta lhamakho aknem ngkanek apiaspongkomakha Eniapom Neten ma’a, ka nentaiangkolha lhta nhan nengetlhekmoseiangko ketlhengkap ma’a, kolhva apkelleliahakhavek na ketlhengkap ma’a. 2 Apkeliavek ketlhengkap aktemakha lhta nengeleltennasekamok nellanemakha etnangkok aniemai’o lhtoka nhan apveske Jesús ma’a. 3 Vanlha koka apkeltemavek Eniapom Neten elieniekhak ma’a ngkollatsekama nak, menmensangvom anke lhma mellanemmakpelha nak etnangkok. 4 Ntasek koka moklhem’a ketlhengkap enmankok apkeliokha nak kakpota mellaniek ngkollatsekama qaselha, vanlha koka ntasek eltaqmelkasakpoho, ellahok na po’ok. 5 Melelto nkek na nkolhnangkok apvalho’ok alleltemo la enmensangvomo lhma, ka aptaiangkolha nak ma’a apkeliaskeiam Eniapom Neten. 6 Menaqtevaskamanke lhma, meliennengkes na po’ok aktemakha m’a qaselha ngkolatsekama lhkek, nellaskangke lhta ennengko’o m’a akiavai’a nkek la apiaqmongkasekhak Apveske. 7 Hengellavema ennengko’o Eniapom Neten kakpota angellanak qaselha altaqmelo, have qaselha alpaiseiam anak. 8 Lhema enenlhet la aptaqnongkoma hengetlhekmoskama nak, manghengeltaknevak ennengko’o, aptaqnevakke koka m’a Eniapom Neten apto hengellaikamok Espíritu Santo

9 Mankaimelhkak annaktalheskasangkok mokhom aktemakha apkellasekhammakpo apieseksek anak ketlhengkap ham, ngkanek apketlhekmosekamok apanke Eniapom Neten ketlhengkap, 10 apkellasekhai’avek na aplhamakho apkelialheng’a apkellava nak ma’a akieto Macedonia. Vanlha nengelelto elienlhanmankok lhamakho aknem apkellasekhai’o po’ok. 11 Nenmak’ak angelleltennasekhok mokhom neleltennaso lhta, ¡elienlhanmamok metka apkeltemengvekho lhma’! ¡mevhanengvomankek aptakha la po’ok, ellanho toka apanko’ok apankavek aptangkolha la’a! ¡Enmakmama koka motaha 12 kakpota melelmongkalhnamaha! Netamen ellahok hata mota apkellelto nak apkeliaskeiam Eniapom Neten.

Akmak’ak hata nkotnek apkellangiemhaikama apkeletsepma

13 Elialheng’a, nenmak’ak angelleltennaksek akmak’akha ta ngkotnek apkellangiemhaikama apkellelto nak apkeletsepma kakpota ketlhengkap mankollaiose apvalho’ok malha aptaiangkolha nak ma’a enenlhet’avok metka nak alel·halhnekama apvalho’ok elvetak hata aktaqmanma. 14 Mongeliaskeiakmok ennengko’o Jesús apketsepmo lhta kanhan aplhatekhangveiakmo lhta nhan, mang na angeliaskeiakmok Eniapom Neten elaqlakhak hata apkelelto nak apkeletsepma meliaskeiam la Jesús. 15 Nengeleltennaskek ennengko’o mota hengetlhekmoskama nak aniem’o Apveske, apmaniaie ta elaqlakhak apkellelto nak apkeletsepma meliaskeiam, netamen hata nhan m’a nengelelto nak enhalhnanko’ok apvaktamo ta hengke’e Apveske. 16 Nkolnalhkak hata akiennaktema apatong apkeliatekama, nkolnalhkak hata nhan ma’a apkeliatekama lhema ángel apveske, akpaivoma nhan iompa’at aniem’o Eniapom Neten, evaiventak hata Apveske akieto neten, apmaniaie ta enaklhatekhangvomok apkellelto lhta apkeletsepma meliaskeiam alhta Cristo, 17 netamen ennengko’o nentangko nak enhalhnankok mokhom ngkolhek hata henlaqlakho lhemek apkellelto lhta apkeletsepma aiseksek iephopai’a kakpota angelvetangvakhak Apveske m’a neten, hata angelloka mota lhemek metka nnelha m’a. 18 ¡Ntasek elpaqmetkesakpok apankavek apieseksek anak ketlhengkap ham ania’a nak kakpota nkoliennekho mota apvalho’ok!