1Ti 2 | TmfSC | STEP | Askeleltennaskek ko’o lhema aspaioma elelmalhna ta Eniapom Neten kakpota eltaqmelkeskesek apkellangiemhaikama aplhamakho enenlhet’avok, akieplomo apkellasnekama kanhan etnangko mota gracias Eniapom Neten.

1 Timothy 2

Aktaqmanma nengenmalhneskeskama aplhamakho enenlhet’avok

1 Askeleltennaskek ko’o lhema aspaioma elelmalhna ta Eniapom Neten kakpota eltaqmelkeskesek apkellangiemhaikama aplhamakho enenlhet’avok, akieplomo apkellasnekama kanhan etnangko mota gracias Eniapom Neten. 2 Elelmalhneskes hata nhan eltaqmelkeskesek apkellangiemhaikama gobernadores kanhan apkelveskai’e kakpota hengeltaqmelkeskesek na nengellaniemhaikama m’a, angelloka metka akmaska kanhan metka aktaikama engvalhok, angelleliehekho mota nhan Eniapom Neten, angeltakmelkasalhkok na akietemo nkoie nentaiangkolha. 3 Koka qaselha nak altaqmelo m’a, akleklemelha nhan apvalhok Eniapom Neten apto hengelvongkeskamo tep, 4 apkeltemo nhan angelvongkasalhkak tep nenlhamakho, angeliangvomhok na akto have niapak anke’. 5 Vanlha lhema aphapak Eniapom Neten, vanlha nhan lhema aphapak hengeliepetkaskekha Eniapom Neten, apvesai’a m’a Jesucristo aptaiekho lhta nhan enenlhet apankek ma’a, 6 apkaiangkave lhta nhan apmatnamo kakpota hengel·hatsoskakhak neksa hengenmaikamok maniamolhma nenlhamakho. Ka ania’a nak akvetammalhko m’a, apkelientemongkeskeskamo lhta nhan aplheianma Eniapom Neten ngkotnek hata aktaqmanma aknem aklheianmakha nhan apvalhok ma’a etnehek. 7 Ko’o lhta nhan nemo hetneskeskamo askeltennaikama ania’a kanhan nema heiapaskamo kakpota atlhekmoksek aktemakha mongiaskeiam akto have niapak ankek apieseksek anak metnangko nak judios. Have niapak ankek astakha nak alheianma, have asmopvana ania’a.

Apkellanemmakpelha etnangkok apkelennava’ak kanhan nkelvana’ak

8 Ka ngkanek ko’o askeltavek elelmalhnangkok Eniapom Neten aplhamakho apkelennava’ak akietnakha la apkaqnekhelha, akieplomo apkeliasekha neten apmeio’ok alalhnai’o, akieplomo nhan alalhnai’o apvalho’ok, metka nhan apkelloma kakpota nhan metka apkeliamenammap po’ok. 9 Askeltavek na ngkelvana’ak nkolentalhnekha alentalhnema metka anmangkaskama la apkellelto la apkelvetai’a, nkonnatnekha nhan annatanma have aliekaskeiakmo, ntasek na mankoliekaskamhek alalhnaskama ava’, metka nhan aliekaskeiakmo qaselha alienmomo oro kakpota nhan metaimong aktek altakmanma akmennave nke nak, metka nhan aliekaskeiakmo alentalhnema apmennave nak. 10 Ntasek koka nkolienlhanmangkok nkollanangkok qaselha altaqmelo ka nkeleltammalhkak nkotnangkok ngkelvana’ak la allai’o Eniapom Neten. 11 Ntasek na nkolvanmangkok neksa allailhemo la nema atlhekmosekamok la’a, nkonmangkok na takha. 12 Moltok na ngkelvana’ak nkotlhekmosangkok napaqtavek la enenlhet’avok, moltok na nkoientalhnama apieseksek apkelennava’ak la’a, ntasek koka nkolvanmak neksa allailheiangko m’a, 13 ngkanek Eniapom Neten apkelanai’a apmanie Adan, netamen akvakho nhan alhaiek Eva, 14 have lhta nhan apmanie Adan nema akiennengkeskama, vanlha lhta ngkelvana nemo akiennengkeskamo m’a, netamen akiekai’o lhta apaivoma Eniapom Neten ma’a. 15 Koka ngkelvana nkovongkasalhkak hata tep akvet’o la atka, aklhengkaso la nhan aktema nkoi’askeiam, asekhai’o la nhan mo’ok, alhnai’o la nhan av’alhok, alan’o la mota nhan aktemakha akpeivomo.