1Ti 3 | TmfSC | STEP | Alhenek hata ko’o iokhalhmek ankek, ntasek ankek etnek enenlhet apmak’o la etnek apkemhama apmanie apieseksek meliaskeiam.

1 Timothy 3

Apkellanemmakpelha etnangkok apkelemhama apmaniaie

1 Alhenek hata ko’o iokhalhmek ankek, ntasek ankek etnek enenlhet apmak’o la etnek apkemhama apmanie apieseksek meliaskeiam. 2 Ntasek etnek aktaqmanma aptemakha aplhengkeskama kakpota mankollapvankek enenlhet etlhenek apvesai’a m’a, vanlha nhan ntasek etnek lhema aptava, ntasek na eniapvanak enavaksek apvalhok apankek la’a, nkaimelhkek na nkolhenek apvalhok amanie apmak’akha la etnehek, etaqmelkasakpok nahan, emok na takha amaika’a la’a akieplomo akpaihekha apvalhok, apmopvana nhan etlhekmoksek po’ok. 3 Have apto nak anmen ato’, apkennapommap anak, ntasek koka etnek apiamolhma apanko ie, etenia mota metka akmaska, ntasek na etnek metka apiaspekamok apteniai’a patakkom. 4 Ntasek na etnek apmopvana ellanama apketkak kakpota nkotnangkok aleliehekho m’a, 5 koka mankapvanko la elanama apketkak, mankapvankek na elanama iglesia apankok Eniapom Neten. 6 Mankapvankek etnek metno apketkok aptema la kolhva mei’askeiam ngkanek mongkek kelha eniakpoho, netamen ngkolhek hata aktevaso m’a ka aktemo lhnak nanek aveske keliaqhameio’. 7 Ntasek na etnek metno apketkok apkellai’o m’a apieseksek anak metnangko nak Jesucristo apkennemolhema kakpota nhan metlhenek ngkollatsekama aptemakha enenlhet, ngkanek malha apteiam kelha ngkotnek aveske keliaqhameio’ al·hanma m’a.

Apkanemmakpelha etnehek nema asennaikama diaconos

8 Apkenmak’o la etnangkok diaconos nkaimelhkek na ngkotnek nema allai’o apieseksek enenlhet’avok, have nhan etnangkok mangiamo atlhenakha apvalho’ok la’a, have nhan etnangkok anmen ato’ok, have nhan eteniangkok akianmoma aniem’o apkeliennengkeskama enenlhet’avok. 9 Ntasek na eleliehekhok ania’a aktaqmanma apkelvetaskeskama lhta Eniapom neten aktemakha mongiaskeiam, ntasek na nkolietnama apaqto’ok alhnai’oho. 10 Amanie la akmahai’a ngkolhek aktemeskeso diaconos, ntasek sekhek ngkolhek aliepkono kakpota elvetakpok apkenmopvanka’a enmakmama. Ka metko la apketlhenammap nkolatsekama m’a, ntasek enmakmama m’a. 11 Nnavek na ngkelvana’ak la nkaimelhkek ngkolhek allak’o apieseksek enenlhet’avok, have nkotnangkok almalengioikama nkotlhenek mo’ok aktemakha, nkoliohok na nkonnavaksek aktemakha ngkollatsekama av‘alho’ok, nkoliohok na nkollanangkok lhamakho qaselha altaqmelo. 12 Lhema diacono ntasek etnek lhema aptava, eniapvanak na ellanama apketkak kakpota nhan apkennemolhema apankavek apnemakha. 13 Ka aktaqmelo la apmakmekama, nkovak hata aknem apkellai’o lhamakho enenlhet’avok ma’a, enietsevasama ta nhan aktaqmanma apnema aniem’o mei’askeiam Cristo Jesús.

14 – 15 Nleiave nak evalhok asmak’o atnama amaika’a kolhvave nak lheiap ham, koka akvangko ta movekta ham, ntasek angvapaksek amanie astalheskama vakkahak kakpota elietsetek lheiap, eihok nahan aptakha lheiap Eniapom Neten apnemakha ham, apkellelto nak iglesia apankok Eniapom Neten apto metnenvaiam annelha, apkellelto nak apkeltakmelkeskama kanhan apkenmopvanka’ak enmeivok ania’a aktaqmanma akto have niapak anke’. 16 Have niapak, qaselha akiemaskama engvalhok anak, nientelhek ankek aniangvomhok ma’a mongiaskeiam anak, ka aktonak ma’a Cristo nemo apaskamo nalhepop anak aptaiekho enenlhet apanke, netamen aplheianmo aktaqmanma aptemakha m’a Espíritu, apkelvetai’o nhan ángeles, nemo aleltennaseiangka nhan apvesai’a apieseksek metnangko nak judios, meliaskeiakmo nhan enenlhet’avok lhmankek ham, netamen na m’a apmammakpo takha neten akieplomo nemo ai’o kanhan nema aktaqmelkeskamo apvai’a.