1Ti 4 | TmfSC | STEP | Aplheianmek Espíritu akto iokhalhmek ankek akmak’o ta nkovak aktemongvanlha nnelha aknem, moklhem’a elvatesangko ta aptaikamok meliaskeiam, elieplo’ok hata kasekapo av’alhok hengiennenkeskama kakpota nhan hengetlhekmoskama anko’ok kasekapok av‘alho’ok.

1 Timothy 4

Apkelvai’a ta ngkolatsekama hengetlhekmoskama

1 Aplheianmek Espíritu akto iokhalhmek ankek akmak’o ta nkovak aktemongvanlha nnelha aknem, moklhem’a elvatesangko ta aptaikamok meliaskeiam, elieplo’ok hata kasekapo av’alhok hengiennenkeskama kakpota nhan hengetlhekmoskama anko’ok kasekapok av‘alho’ok. 2 Eleliehekhok hata m’a hengetlhekmoskama apkeltemakha hanet apvalho’ok anak kakpota nhan apkenmopvanka ania’a nak, anmaskengvaiam anak atlheianma apvalho’ok ellanak aktaqmelo qaselha. 3 Ellaksek hata eteniangkok apnaqteiangka’a enenlhet’avok, ellaksek hata nhan etavangkok aptekamok moklhem’a nentomakha la’a, koka Eniapom Neten alhta niekhe apkellanai’a m’a lhamakho nentoma nak kakpota etavangkok apkellelto nak meliaskeiam, apkelioho nak akto have niapak anke, etnangkok na gracias Eniapom Neten. 4 – 5 Hai, lhamakho qaselha apkelentepkeskama lhta Eniapom Neten ntasek etavangkok enenlhet’avok ma’a, meltaqnevamankoie’, aplheianmek Eniapom Neten ma’a allelto alalhnai’o nkek ma’a lhamakho nentoma nak, apvanka’ak etavangkok akieplomo koka aptaikamok gracias Eniapom Neten.

6 Timoteo, askeltavek etlhekmoksek lheiap qaselha askeltennaso lhkek aplhamakho engelialheng’a ham, netamen nkovak hata aptema lheiap aptaqmanma apkasennaikama Cristo Jesús, apiennaktema aniem’o apkeliehekho mei’askeiam kanhan aktaqmanma apketlhekmoskama allaikamok malha nentoma al·haivekha apiempek kakpota nkankok apiennaktema.

7 Meniailho nkek ania’a lhennenga nema atlheianveiam alhma ammelhma nak Eniapom Neten, aniem’o koka enenlhet apanko’ok apankavek ma’a, lheiap koka elana mota qaselha akpeivomo malha nhan aptak apkeleivesammap la’a. 8 Aselhtek apkelvetai’a aktaqmanma apiempeiok ma’a apkellelto nak apkelleivesammap la’a, koka m’a akto neten ankek aktaqmanma apkellelto nak apkellanekamok la qaselha akpeivomo, apeneskangke lhta nhan lhema apaivoma Eniapom Neten ma’a eleltaqmelkeskesek neksa apkellangiemhaikama hengke’e nalhepop anak, kanhan alhaiek ma’a neten, 9 have niapak ankek astakha lhkek alheianma, nkelietave mangheliaskamek aplhamakho ketlhengkap. 10 Ka ngkanek na ennengko’o nenteniaiangkavek eniempeiok nenmakmeiangka, nellammelhmek na hengellammelhmakha la’a ngkanek nietnek alel·halhnekama engelvalho’ok hengelpasmok hata Eniapom Neten apto metnenvaiam annelha, apto nhan hengelvonkeskama tep aplhamakho enenlhet’avok, tep ankek ma’a apkellelto la meliaskeiam.

11 Etlhekmos hata lheiap hengke’e qaselha nak alheno lhkaiek, ellana ta m’a kakpota eleliehekhok enenlhet’avok ham. 12 Meniangko nkek na ngkolhek aktemeskesantamo koneng lheiap aniem’o apketkok ^{▼▼Apketkok mokhom aptaiangkolha apankavek judios 30 anio nak kanhan 40 anio la’a.} mokhom lheiap, eliatama toka akietemo nkek aplheianma, eltaqmelkasakpo ta nhan, elto ta nhan nkalhnok apvalhok anak, koiet hata nhan mei’askeiam kanhan apkasekhai’o po’ok kakpota aplhamakho enenlhet’avok elvanangkok aptemakha lheiap. 13 Neksa hel·halhanma ko’o lheiap ham ntasek elietsete mota napaqtavek Jesucristo apkennemolhema Vakkahak Eniapom Neten Apaivoma, eliatekho ta mota nhan ma’a, etlhekmosamo ta nhan. 14 Emama ta apmopvana aplhevai’a lhta neksa apnengkenaikamok apmeio’ok alhta takhaplhet metno apketko’ok aniemai’o lhtoka nhan ma’a Eniapom Neten aptema.

15 Etaqmelkaso ta apkellanei’o qaselha askeltakha lhkek elanhok lheiap kakpota elvetak enenlhet akiennakvaiam apvalhok. 16 Etaqmelkasakpo ta neksa apkaniemhaikama, elketnamok hata nhan kakpota metlhekmoksek mankoietemo. Ka apkeliahakho la astakha nak askano lheiap, evongkasakpok hata nhan tep lheiap, elvongkesek hata nhan tep apkellelto la apkelleliehekho apkeltennaikama lheiap.