2Cor 1 | TmfSC | STEP | Ko’o Pablo asto heiapaskama Cristo Jesús aniem’o nhan aptema Eniapom Neten, alhelhma koka ko’o Timoteo hengke’e. Nengenmak’ak angellapaksek atlheianma engvalho’ok apkellelto iglesia apankok Eniapom Neten ham na temma Corinto, kakpota nhan aplhamakho apkelpokkenammap apkakhangko m’a iokhalhma Acaya.

2 Corinthians 1

Aklheianma apvalhok Pablo Corintios

1 Ko’o Pablo asto heiapaskama Cristo Jesús aniem’o nhan aptema Eniapom Neten, alhelhma koka ko’o Timoteo hengke’e. Nengenmak’ak angellapaksek atlheianma engvalho’ok apkellelto iglesia apankok Eniapom Neten ham na temma Corinto, kakpota nhan aplhamakho apkelpokkenammap apkakhangko m’a iokhalhma Acaya. 2 Nengeleltavek ennengko’o Eniapom Neten kakpota nhan Apveske engankok Jesucristo eltaqmelkeskesek apkellaniemhaikama, ellangkok na altaqmelaikama apvalho’ok ketlhengkap ma’a.

Aplengaiangko akientalhnema Pablo

3 Eliavenkaskesama ta mota apvesai’a Eniapom Neten, Apiapom ma’a Apveske engankok Jesucristo, apto nhan ma’a niapom nenietnai’o nenga’at kakpota nhan akpaihengvaiam engvalhok. 4 Hai, apaieskakmek engelvalho’ok neksa akvai’a la akientalhnema m’a kakpota nhan envanka’ak ennengko’o angelpaieskamok apvalho’ok emmo’ok la’a neksa akientalhnema, ka aktemo lhta nhan ennengko’o alpaihengvaiakmo engvalho’ok aniem’o Eniapom Neten. 5 Avanhek ankek nellengaiangko akientalhnema aniem’o nelieplekama Cristo, have niapak ankek ma’a, avanhek koka nhan hengelpaieskeskaiam engelvalho’ok Eniapom Neten aniem’o nhan Cristo. 6 Hai, avanhek ankek hengelengaskesaiangko akientalhnema aniem’o enenlhet, koka nelvaskapkek na m’a ngkanek nengeleltavek etlhevangkok ketlhengkap ania’a akmovana nak nkopaieskamok engvalho’ok kakpota nhan hengvongkesek tep. Hengelpasmek koka nhan Eniapom Neten, hengelpaieskeskakmek na engelvalho’ok ma’a neksa akvai’a la akientalhnema kakpota angellapvanak angelpaieskeskamok na apvalho’ok ketlhengkap ma’a neksa akvai’a la akientalhnema m’a, kakpota nhan ketlhengkap ellapvanak na elvaskapok ma’a ka nentaiangkolha nak ennengko’o. 7 Neliavek na ennengko’o apkellengaiangko akientalhnema ketlhengkap ham, nnavek na ennengko lha’, koka nkelel·halhnek engvalho’ok ngkolhek hata alpaieskeskakmo apvalho’ok ketlhengkap, nnavek na ennengko lha’ m’a.

8 Engelialheng’a, nengeleltavek ennengko’o angeleltennasama ania’a aktemakha lhta nellengaiangko akientalhnema akieto m’a iokhalhma Asia, nientelhek anke lhta m’a, mmaske lhta nelelhievaso, nketlhenke lhta engelvalho’ok angenmaskengvomok kelhaha. 9 Malha lhta ntak netlhenammalhka la antekio’ok ma’a, ma lhta nhan angellapvanka’ak angelpasmalhkok engankave ennengko’o m’a, vanlha lhtoka nellailhak hengelvongkeskama la tep Eniapom Neten apto akietnema apmopvana akvakmo nhan henlhatekhaskamok neksa nengetsepma la’a. 10 Hai, nengelvongkaselhke lhta tep ma’a akiavai’a nemmahai’a antekievekhak niekhe, neliavek na ngkotnekhak hata mokhom hengelvongkeskama tep ma’a. 11 Nengeleltavek ennengko’o hengelpasmok hengelelmalhneskesek ketlhengkap, aplhamo la hengellelmalhneskeskama ham, aplhaniek hata nhan etnangkok gracias Eniapom Neten aniem’o hengelpasmoma m’a.

Apkeleltennasekho Pablo meniekho Corinto

12 Avanhek ennengko’o alammalhko engelvalho’ok ngkanek neltaqmelkaselhkek akietemo nkek, iokhalhmek ankek na nempaivoma nentangkok napaqtavek enenlhet’avok lhmankek ham, tep ankek na napaqtavek ketlhengkap. Have koka aniem’o nenianveiakmo enganko’ok engankave nak, aniem’o koka m’a aktaqmanma nke nak hengellanei’o Eniapom Neten. 13 – 14 Nennaktalheske mota ennengko’o vakkahak alhievai’a nkek akpaivoma kakpota eliohok, kolhva koka nekha tkok apkeliavek ketlhengkap, netamen nkosavhalhkok ankek hata apkeliangveiakmo apvaktamo ta Apveske engankok. Nkolalhkok hata nhan apvalho’ok hengellanei’o ennengko’o, ennengko’o ta nhan nkolalhkok engelvalho’ok aniem’o ketlhengkap.

15 Ka nkanek mankotnama evalhok astaienta la amaika’a mokhom ham kakpota nkotnek hanet aktaiekho altakmelekha apvalho’ok ketlhengkap ham. 16 Nlhenke lhta niekhe nhan evalhok neksa alhengama la Macedonia, nalhet amai angvaivongvakhak sekhek ham, netamen angvempekhok mokhom alhengama m’a Macedonia. Netamen avatamok mokhom ham apieseksek anak ketlhengkap, kakpota alpasmok angvempekhok alhengama m’a Judea, lhta ntak aklheianma evalhok ko’o m’a. 17 Koka mongvopvanak asmahai’o eniakhak ma’a, nkotlhenek hatelha apvalho’ok ketlhengkap ngkolatsekama akietnaikama ehaqtek, nkolhenek evalhok alhong nlho ka la mma’. 18 ¡Koka have ennengko’o nentaiangkolha aktonak ma’a, hai, nlho ka la mma’! Apiavek Eniapom Neten have niapak ankek astakha nak alheianma. 19 Ennengko’o Silvano, Timoteo kakpota nhan ko’o have nentaiangkolha alpengkammalhka atlheianma engelvalho’ok, nelieplavkaskek ennengko’o aptemakha lhta mota Eniapom Neten, metka aptema hai, nlho ka la mma’. Vanlha aptema hai’ ma’a aplheianmo mota aptemakha Apketka Jesucristo. 20 Apieplavkaskek na Eniapom Neten aptemakha lhta apeneskamo apkeltennaskama apaivoma apkapaskamo m’a Cristo, ka ngkanek ennengko’o nentaiangko mota “amen” neksa neltaqneskasekamok la Eniapom Neten aniem’o nhan Jesucristo. 21 Hengeliennakteske’ ennengko’o Eniapom Neten kanhan ketlhengkap neksa neliepetkangvekha m’a Cristo, hengeliekieskek nahan. 22 Hennaktalheskamo nhan mongenatkeskama apankok engvalho’ok apvesai’a Espíritu Santo, akto aktemeskeskama have niapak ma’a apanko’ok ennengko’o Eniapom Neten.

23 Kolhva nhan asmak’ak alleltennaksek ketlhengkap se kla ktemo ko’o moniekho lhta ham Corinto sekhe lhta, ngkanek nkoihe lhta ngkotnek aspaioma askellaikamok asvakho la ko’o ham, have niapak ankek astakha nak, Eniapom Neten kelha heiaqhek asto la asmopvana ania’a. 24 Mankonmahai’ak ennengko’o antangkok malha apkelveskai’e la’a angellelpalhengkasama kakpota etnangkok meliaskeiam ketlhengkap, vanlha koka nengeleltavek angelpasmok kakpota nkolpaihekhak apvalho’ok ketlhengkap ham nkanek melleihaie’ aniem’o meliaskeiam.