2Cor 10 | TmfSC | STEP

2 Corinthians 10

Apkammelhma Pablo nema aktepkesaikama apvesai’a

1 – 2 Moklhem’a ketlhengkap apnaqtevaskangkek asvesai’a, apketlheianmo lhnak ngkolatsekama astemakha, lhnak asno la ham apieseksek anak ketlhengkap askeliatekama lhnak nkoiennaktema aspaioma, koka lhnak askapaso la astalheskeskama vakkahak ketlhengkap ham, nkoihek nak aspaioma astalheskama. Hata apketlhengkaso la apkellentepkasekama asvesai’a ham, metka asiekaskama ta aknem alammelhek ma’a apkellelto nak mok apatno’ok. Askelasnema askeltema elvatesangkok apkelentepkasekama asvesai’a, askeltavek na akieplomo apvesai’a Jesús, apto apiamolhma, hengellamelaiam nahan. 3 Niekhe nellaniemhaikama apieseksek enenlhet apkellelto nak meleliehekhok Eniapom Neten, ennengko’o koka mok aktema nentaiangkolha. 4 Apkenmak’a mota elammelhek akientalhnema akieplomo apkeliennaktema apanko’ok apankavek, ennengko’o koka nelammelhkek akientalhnema akieplomo apmopvana Eniapom Neten, apmopvana enaqtevaskesek na aliennaktema kasekapok av‘alho’ok. 5 Apmopvana nhan enaqtevaskesek akpaivoma akmovana ania’a akmahai’a la nkoiennenkesek enenlhet, apmopvana nhan enaqtevaskesek apkelammakpo apankavek enenlhet’avok apkeliasekamo na lhma enenlhet apkenmahai’a nak eliekpelkok Eniapom Neten. Apvankek na eliaqmongkaskesekhak alketamekama apvalho’ok apkellammelhma la Cristo, eltemeskasekhak atlhenaikama apvalho’ok eleliehekhok Cristo m’a. 6 Nellanakhek ennengko’o nentangkolha kakpota angeliaqmongkaskesekhak hata m’a aptaiangkolha apkellelto nak meleliehekhok, koka amanie nkek sekhek nkaimelhkek ketlhengkap eleliehekhok akiokho nkoie.

7 Moklhem’a lhna mota ketlhengkap apketlheianme mota have niapak apkelpasmekha Cristo, ennengko’o nhan nelpasmekha m’a, iokhalhmek ma’a, nkotlheianvakho ta mota apvalho’ok ma’a. 8 Ka nkanek smak’ak atnek mokhom allanak ketlhengkap, Eniapom Neten hengellangkek nelientalhnemo kakpota angeleltennasangkok ketlhengkap etnangkok na m’a, have niapak ankek ma’a, askeliatema metka askammalhko, metka nhan asmangkaktema.

Mankonmahai’ak na annaqtevaksek ketlhengkap, vanlha koka nengeleltemavek angeltakmelkeskesek apkellaniemhaikamaha. 9 Have asmahai’a annelhtengkesek neten ketlhengkap asnaktalheskeskamo nak, motlhenanke apvalho’ok aktonak ma’a. 10 Moklhem’a lhna mota hetlheianmak aliennai’o astalheskama, akiennaktema nhan, lhnoka napaqtavek la’a moiennaktema lhnak, moientalhnemo lhnak na. 11 Koka stak ko askellano ham, hata nelvakho ta ham nkoihek hata aspaioma allanho, ka ktemo nak akpaivoma vakkahak asnaktalheskeskama ketlhengkap.

12 Moklhem’a ketlhengkap apkelietkesakpek po’ok melhnemo, apketlhenkek na aptangko neten apankavek, koka malha metka apqatko’ok la ketlhengkap ma’a, ennengko’o koka manghengeliaqvakmok antangkok ma’a. 13 Mangelalhkok ennengko’o metka neliekaskeiakmo, vanlha nelalhkek apkeltakha la nnelha Eniapom Neten aniem’o nenmakmekama lhamakho apkellavakha, kanhan apieseksek anak ketlhengkap. 14 Lhta mongetlhekmosengko la ketlhengkap, akhemo lhta ngkotnek nelammalhko, koka netlhekmoseiangkek ma’a, emmaniaie lhta nhan nelletsavkeskama ania’a aktaqmanma aplhenammap Cristo. 15 Askeleltennaskek lhek mangeleltemo angellalhkok angetlhenek nenmakmekama, po’ok enenlhet la apmakmekama, mankoietok antek ma’a. Vanlha toka angelleltok hata ngkeskama la nenmakmekama apieseksek anak ketlhengkap akvengke panko ta aptaikamok meliaskeiam ketlhengkap ham, metka koka neliekai’a apkenmakmekama po’ok enenlhet la’a. 16 Ka nhan nenmak’ak angetso’ok angelpaiaksek ania’a aktaqmanma m’a tep apkakhaiangkolha nak ketlhengkap, metka koka neliekai’a apkenmakmekama po’ok enenlhet la’a, mangeleltok nkolalhkok engelvalho’ok nenmakmekama po’ok enenlhet la apkenmakmekama.

17 Enenlhet apmak’o la eniakpoho, ntasek eniakpok aniem’o Eniapom Neten. 18 Koka akhemo m’a angelalhkok enganko’ok engankavek, ntasek koka Apveske nak nkalhkok apvalhok aniem’o nenmakmesaikama m’a.