2 Corinthians 11

1Elvaskapekho hellanei’o ko mota, niekhe stema malha anema neksa askeliatekama mota. ¡Elvaskapekho ta! 2Have astema ehenkek askeliatekama nak, Eniapom Neten koka heiaikamok akiavai’a nkek askenmasmo mota altakmelkesek ketlhengkap kakpota meltemengvakhe lhma apankavek ham kakpota elpasmekhak na Cristo, malha kto nak ngkelvana atkok la metka nema akmangveiam alienlhaneiakmo nak akvakmo aliemhapo atava la aktema. 3Nkak’avek ko eneniek nkoliennenkeskak menasma nkolienieskasekhak Cristo aptaikamok apkelleliehekho iokhalhmek ankek, akiennengkeskamo lhnak nanek na Eva m’a. 4Asleng’a lhta nhan ko’o ania’a ketlhengkap apkenmaiangko lhna lhta takha alleklemo nkek apvalho’ok nema aleltennaskama ania’a mok aktemakha koka netlheianmo na mota apvesai’a Jesús. Hai, apkenmaiangko lhna lhta takha ania’a mok aktemakha nkek ania’a aktaqmanma, apkenmaiangko lhna lhta nhan takha lhema espíritu, have koka m’a Espíritu apketlhevaiangko lhta sekhe lhta. 5Malha neten apankavek la niekhe m’a nema allapaskama nak apketlheiam netamen ko’o, koka have ko koneng ankek ma’a. 6Niekhe moliatekama aktaqmanma ko’o, nietnek koka asiangveiakmo akiokho nkoie, apkeliavek ketlhengkap helvetai’ak na askelanei’o lhamakho qaselha 7¿Ma nlho ka la ngkoietemo’ askeleltennaskama ania’a aktaqmanma aniem’o Eniapom Neten monmamo akianmoma asmakmekama, he? Koneng apankek astaiekha kakpota etnangkok neten apankavek ketlhengkap. 8Malha askel·hatsoskaiam patakkom la akianmoma aplhamakha iglesias kakpota aniantak ham hellasennama ketlhengkap. 9Neksa aimommalhka lhta nhan qaselha ko’o ham, ma lhta alelmalhnekama helpasmoma la ketlhengkap. Macedonia lhtoka apkeleniem’ak elialheng’a hellangkok qaselha alaimommalhkelha la ko’o m’a. Ma lhta alelmalhnekama helpasmoma la ketlhengkap, molelmalhnekhek hata mokhom qaselha alaimelhko la ko’o, mankonmak’ak na allapsongkeskesek apvalho’ok ketlhengkap ham. 10Hai, nkalhkek ko evalhok ehenkok ehenkek ma’a, apkeliavek ketlhengkap have niapak ankek ma’a astakha nak, meltemo Cristo atnama asmopvana ania’a. 11Nkotlhenek hatelha apvalho’ok ketlhengkap mollasekhai’o ngkanek molelmalhnekama qaselha alaimommalhkelha la ko’o, koka apiavek Eniapom Neten avanhek askellasekhai’o ketlhengkap. 12Alhenkesek hata metka askelelmalhnekama qaselha la alaimommalhkelha ko’o kakpota elvetak apkeltemakha m’a apkellelto nak nema alapaskamo apkenmopvanka ania’a have stemo nak ko’o, ntasek astemakha, have aptangko nak ma’a. 13Apkenmopvanka ania’a m’a nema allapaskamo nak, apkeliennengkeskangkek enenlhet, apkelietkesakpek malha niekhe apkellapaskama apanko’ok anak Cristo. 14Aptaiangke mota m’a, nnavek na Satanas anak nkelietkesalhkek malha ángel aknema apkapommatema nak. 15Koka apkellelto nak apketsekama ania’a apkenmopvanka ania’a vanlha mota apkellasennaikama Satanas, apkelietkesakpek na enenlhet la apiamolhma apketlhekmoskama akpeivomo, koka etlhevangkok hato ka m’a nema akiaqmongkasekha apkeltemakha ngkollatsekama.

Anmalhko apvalhok Pablo aniem’o apmakmekama aktaqmanma

16Alhenekhok hata mokhom, moleltok heleltangkok malha anema lhnak heiephesekama aliata m’a. Hata aktangko la atlheianma apvalho’ok ketlhengkap ma’a, nkaqhok ma’a ntasek henmankok takha, ellangko ta alhenalhkok ehenkek iakvatakho la aktaqmanma asmakmekama. Nkalhkek ko evalhok askellano aktaqmanma asmakmekama lhta apieseksek anak ketlhengkap. 17Malha anema la asto nak askeliatekama ko’o, asiave koka nhan Apveske mankoleklemok apvalhok etakneskasangkok apankok apankek enenlhet la’a. 18Aplhaniek koka enenlhet alammalhko apvalho’ok aniem’o apkenmakmekama aktaqmanma apanko’ok apankavek, ko’o ta nhan nkalhkok evalhok aniem’o aktaqmanma asmakmekama.

19Apkellanek ketlhengkap nema apkeliamo apankavek, koka apkelvaskapak apkellan’o enenlhet’avok anak malha alanema. 20Kanhan apkelvaskapak enenlhet’avok anak apkeliateiangko nak ellasennama m’a, apkelianmongkeskangkek na ketsek kianmoma ngkeskama koka apkenmakmekamaha, apkeliennengkeskangkek nahan, koneng na apkeltemeskeskamak, apkeltekpoikama nhan napaqta’a, koka apkellaiangkavek ketlhengkap ma’a. 21Smangkakkek ko’o asmak’o alhenek kolhvave nak, ennengko’o nlho lhta nhan ntase lhta niekhe antangkok angellanhok aptaiangkolha nak ma’a. Apkelammakpek ma’a aniem’o apkenmakmekama lhta apieseksek anak ketlhengkap, ko’o ta nhan nkalhkok evalhok niekhe heleltaikamok malha anema. 22Apkelammakpek na aptaiangko Hebreos ma’a, ko’o nhan asto Hebreo, apkelammakpek na aptaiangko israelitas, ko’o nhan israelita, apkelammakpek na aptaiangko Abraham aptavana’ak neptamen, ko’o nhan asto m’a. 23Apketlhenakpavek na apankavek apkellelto apkenmakmesaikama Eniapom Neten, ko’o koka tep ankek asmakmesaikama Eniapom Neten. Niekhe malha anema askeliatekama, nkaqhok koka alhenkesek hata askeliatekama, tep ankek ko asmakmekama m’a enenlhet’avok anak, nlhaniek askaklhengkasemmalhka nenmammalhkelha, nlhanie lhta nhan nema heliaqpelhketaikama, nlhaniek na atlhengkeskama amatong. 245 aktaiekho nhan heleliaqpelhketaikama apkelientalhnemo nak judios, 39 nema heliaqpelhketekho mota akvakmo aksavhelhko 5. 25Hanetolhema aktaiekho nhan heltekpoikama iamet, lhema aktema koka heliaqnai’a metaimong. Hanetolhem’a nhan akvaivekamok loma nemmen neksa alhengama. Nketlhenkeskangkek na angvetsepok, lhema aknem, pelhasep na aspathetma nemmen iamet akpaihema akvakmo lhta apkelvo’o helpasmoma m’a. 26Alhengamo lhta nhan akvenaktema nkek, asiekai’o nhan alvata asketsepma kelha lhta niekhe, man na ntek atlhengkeskama ngkolhek henmenielhkaso qaselha ehenkok, aspaiomo lhema ehenkek na heleliaikama apkenmahai’a henaqtevaksek kakpota nhan metnangko nak judios. Aslengaiangkek akientalhnema apiav’akha temma nak, iokhalhma, alvata kakpota nhan apieseksek engelialheng’a apkeltaikama nak apankavek apkelpeivomo. 27Aslengaiangkek na akientalhnema asmakmekama, asiampei’o, metka asteianma, mek heiaqhema aimommalhka astoma, aknem na heiaqhema, aslengaiangkek na apmap semange, apkaimommap astalhnema apmokhetma la’a. 28Nlhaniek mokhom qaselha aslengaiangko, lhamakho knem na aktaikama evalhok akientalhnema aniem’o aklhenaikama evalhok aplhamakho iglesias. 29Asleng’o la lhema enialheng akmaska apiempek ma’a, ko’o nhan malha akmaska eiempek na stahak, asleng’o la nhan lhema enialheng apiepkonammap m’a, avanhe ntak na sloma m’a. 30Koka lhamakho qaselha nak asvetai’a, nkelvetaskaskek moiennaktema ko’o m’a, koka nkaqhok nkaqhama evalhok ko m’a.

31Eniapom Neten apto apiapom Apveske engankok Jesús, nietavek aniavenkaskesama apvesai’a m’a, apiavek na motnema asmopvana ania’a alheno lhkek.

32Asmak’ak aleltennasama ketlhengkap aktakha lhta asvetai’a m’a Damasco, gobernador apto apkasennaikama apiav’akha apveske Aretas apkapaso lhta guardias kakpota hepathetek ko’o akieto atong apiav’akha temma nak ma’a. 33Koka asketlhelhma’ak hellaqlhengkaske lhta lhema iama posak akiavai’a, helvaivesantamo lhta akieto atong atkok koneng nekha akhalhtemommalhka apiav’akha temma nak, ka askenio lhta nhan ma’a.