2Cor 2 | TmfSC | STEP | Ka nkeniemai’ak nkolheianmo nak evalhok, motnaiento ko’o amaika ham kakpota molaioseskakhek apvalho’ok ketlhengkap ham.

2 Corinthians 2

1 Ka nkeniemai’ak nkolheianmo nak evalhok, motnaiento ko’o amaika ham kakpota molaioseskakhek apvalho’ok ketlhengkap ham. 2 Lhta askelaioseskeskakho la apvalho’ok, melpaiesekhe lhta nhan evalhok allanhok ketlhengkap ma’a. 3 Vanlha lhta askellapaskaso vakkahak alhta ham astalheskama kakpota mellaioseskasek evalhok asvaktamo la ham. Ntasek koka elpaiesekha mota evalhok ketlhengkap, asiavek na ko’o alpaihekho mota apvalho’ok ketlhengkap helvet’o la akpaihekha evalhok asvaktamo la ko’o ham. 4 Neksa astalheskama lhta vakkahak alhta avanhe lhta aktaikama evalhok akvakmo asveno nhan ngkanek ma lhta nkomak’ak allaioseskesek apvalho’ok ketlhengkap aniem’o askeliennai’o aspaioma astalheskama vakkahak, vanlha koka askeltemo allelpeiveskasekhak kakpota ellapvanak etnangkok apkelpeivomo aniem’o nhan ko’o askellasekhai’o ketlhengkap.

Apkasekhekho mokhom Pablo apkammelhma enenlhet

5 Ka enenlhet alhta apkaioseskeskamo nak evalhok, malha lhta nha ntak apkellaioseskeskama apvalho’ok na ketlhengkap ma’a. 6 Apkeliaqmongkaskesekhek koka ketlhengkap aptemakha m’a enenlhet alhta, metka toka mokhom aptaikokha m’a. 7 Kolhva koka ntasek eltemeskesama apankavek meihamolhma m’a, elpaieskeskamok na apvalhok kakpota nkomaskok akiavekamok akiaqhapma akmaiose apvalhok ma’a. 8 Hai, askapiosema askeleltemo eltaqmelkeskesek apkaniemhaikama m’a kakpota etak apkellasekhai’o ketlhengkap ma’a. 9 Ka vakkahak alhta astalheskeskama asmahai’a aliepkonek ketlhengkap apkelleliehekhavek kelhaha, nlho ka la mma’. 10 Koka apkeltangka la apankavek ketlhengkap qaselha ngkolatsekama lhta apkelaneskasekamok enenlhet alhta, ko’o ta nhan atneskesama ehenkek ma’a, malha napaqtek na Cristo, kakpota nkovak na aktaqmanma apkellangiemhaikama aplhamakho pankavek ketlhengkap ham. 11 Etnamok hata ketlhengkap astakha lhkek kakpota mankoltemeskesantek koneng Satanas, neliavek ennengko’o akmak’akha la nkolana mota ngkolatsekama.

Aktaikama apvalhok Pablo akieto m’a Troade

12 Smak’ak aleltennasama ketlhengkap asmeiakho lhta akieto natemma Troade kakpota altennama ania’a aktaqmanma aplhenammap Cristo apto Apveske, apkelpenesave lhtoka apkenmahai’a ellailhok askeltennaikama m’a. 13 Koka ntama lhta evalhok ko’o m’a ngkanek ma lhta atak stema eialheng Tito, ka askelpaivesangko lhta m’a, asmeiakho lhta Macedonia.

14 – 15 Hai, gracias stak ko Eniapom Neten ngkanek hengeltemeskeskama hengeliephongveskaiakmo mota aniem’o nhan nelpasmekha Cristo, hengenmaiangka nhan kakpota angelpaiaksek ania’a aktaqmanma aplhenammap Cristo lhmankek ham.

Ennengko’o nengelelto napaqtek Eniapom Neten malha aktonak akmases aimes la nentekhanma, akpaihekha lhmankek ham apieseksek apkellelto ta apkelvonkasemmap tep, apieseksek na apkellelto melvongkasemmap hata tep. 16 Koka m’a ntakhek nkomases aimes nkennapkek nahan apieseksek ma’a apkellelto nak melvongkasemmap hata tep, koka m’a ntakhek akmases aimes hengaikamok na akiennaktema enneniek apieseksek apkellelto nak apkelvonkasemmap hata tep. ¡Nientelhek ankek nenmakmekama hengelpekkenkasekho Eniapom Neten ennengko’o! ¿Se lha enenlhet eniapvanak ma ie, he? 17 Moklhem’a enenlhet apkeleltennama ania’a aktaqmanma apkeleltema nkoltaqmelkeskesek apkellangiemhaikama apanko’ok apankavek, ennengko’o koka mantangkok ma’a. Eniapom Neten hengellapaskama, apiavek nahan metka nenteniaikamok enganko’ok engankavek qaselha altakmelkeskama la nellaniemhaikama, netlhenke mota qaselha have niapak ankek aniem’o nelpasmekha mota Cristo.