2Cor 3 | TmfSC | STEP | Nentangkolha lhta ennengko’o netlhenammalhko engankavek nengeliamolhma, man koka nkomahai’ak angetlhenalhkok enganko’ok engankavek ma’a, apkeliavek na enenlhet’avok nenmangkolha la’a nentaiangkolha nak. Mankaimelhkak angelletsoma vakkahak nema aktalheskama la aktemakha akvetammalhka neliamolhma kakpota angelvetaskeske ketlhengkap, nlho ka la mo’ok iokhalhma nenmak’akha la angenmangkok, mankaimelhkak angelletsoma vakkahak anak nema aktalheskama ngkanek hengeliekpelkavek enenlhet’avok ma’a.

2 Corinthians 3

Nelpaieskama alhnankok apaivoma aniem’o Eniapom Neten

1 Nentangkolha lhta ennengko’o netlhenammalhko engankavek nengeliamolhma, man koka nkomahai’ak angetlhenalhkok enganko’ok engankavek ma’a, apkeliavek na enenlhet’avok nenmangkolha la’a nentaiangkolha nak. Mankaimelhkak angelletsoma vakkahak nema aktalheskama la aktemakha akvetammalhka neliamolhma kakpota angelvetaskeske ketlhengkap, nlho ka la mo’ok iokhalhma nenmak’akha la angenmangkok, mankaimelhkak angelletsoma vakkahak anak nema aktalheskama ngkanek hengeliekpelkavek enenlhet’avok ma’a. 2 Ketlhengkap na apkellelto malha vakkahak nema aktalheskama aklheianma neliamolhma, neksa apkelvetai’a enenlhet’avok apkeltemakha apkeltakmelkasemmakpo ketlhengkap, nkotlhenek na apvalho’ok ennengko’o aktaqmanma nenmakmekama m’a. 3 Hai, ketlhengkap malha vakkahak la aptalheskama Cristo kakpota angellankongvomo mota enenlhet’avok. Ka vakkahak anak have aktonak aimenek anak alanemmalhka kakpota ngkolhek aktalheso, vanlha koka niekhe Espíritu apankok Eniapom Neten mangkotnengvaiam annelha apkaniemhaikama, ka malha nema aktalheskama m’a, have nhan nema aktalheskama la metaimong nema alanai’a la’a, vanlha koka nema aknaktalheskamo m’a apvalho’ok anak enenlhet’avok.

4 Nengeliavek na ennengko’o Eniapom Neten hengelpasmoma lhta kakpota angellanangkok aktaqmanma nenmakmekama apieseksek anak ketlhengkap ham aniem’o nhan ma’a Cristo. 5 Lhta nhan metko la hengelpasmoma Eniapom Neten, mongellapvanke nlho lhta nhan angellanangkok nenmakmekama nak enganko’ok engankavek. 6 Hengellangke lhta nhan Eniapom Neten nenmopvanka’a angelpaiaksek hata ania’a aktemakha alhnankok annemo mo’ok apvalho’ok apkenmahai’akha etnangkok ma’a aniem’o nhan Espíritu apto nhan hengaikamok akiennaktema enneniek, koka have aniem’o m’a ley henlheianma nak ammatong hata.

7 Aktaqmanma nkek apommatma annemo mo’ok apvalho’ok lhennenga akto nak altema ngkolhek hengaqhaqho, nema aktalheskama koka metaimong nekha m’a, mang nak nanek na nkonmopvanka’ak enenlhet ellanhok napa’at Moises aniem’o apommatma m’a, koka ntaqmelkeskamavek nak na aksepanei’o m’a. 8 Koka tep ankek aktaqmanma apommatema m’a alhnankok annemo mo’ok engvalho’ok aplheianmo Eniapom Neten hengellangkok hata Espíritu apankok. 9 Aktaqmanma aknem nak apketlhevaiangko lhnak nanek lhennenga annemo mo’ok apvalho’ok ma’a altema nak ammatong, koka akto nhan neten ankek aktaqmanma aplheianmo Eniapom Neten hengeltemeskesek hata nengelpeivomo. 10 Aktaqmanma nhan ma’a lhennenga, koka akto nhan neten ankek aktaqmanma m’a alhnankok qaselha annemo mo’ok engvalho’ok anak. 11 Aktaqmanma nhan ma’a qaselha lhennenga akmak’o ta nkomaskengvomok, koka neten ankek aktaqmanma qaselha alhnankok metka akmaskengvaiam hata.

12 Ka nkanek alel·halhnekama engelvalho’ok angelvetak hata aktaqmanma, angetlhenek na qaselha nak metka nellai’a napaqtavek ketlhengkap ham. 13 Have aktemo lhnak nanek Moises apkapmo lhnak nanek napa’at ietamopai’a napokha, meltemo elvetak israelitas kakpota melvetankek nkomaskok apommatema napa’at ma’a. 14 Koka mang nak nanek nkomahai’ak eliohok ma’a, ka nenvanlha nak na aptavana’ak neptamen apkelietsatengko la vakkahak aktalhesammalhka lhennenga annemo mo’ok apvalho’ok apkenmahai’akha etnangkok, man na eliamok ma’a, malha niekhe nhan apkelapma la napaqta’a ietamopai’a napokha, apkeliaseiangke lhma m’a kakpota melvetie lhma m’a, meliehek nahan, vanlha koka nhan Cristo apto apmopvana el·hatsoskasangkok ma’a. 15 Akvakmo nhan nenvanlha nak apkelietsatengkek niekhe vakkahak apankok Moises, malha koka ntemak meliamo la’a ngkanek nietnek malha apkelapkeskama napaqta’a ietamopai’a napokha. 16 Koka apkelelpengkakmo la apvalho’ok akieto apnakha Apveske, el·hatsoskasangkok na m’a apkelapkeskama napaqta’a ietamopai’a napokha. 17 Nkanek Apveske kanhan Espíritu malha lhema m’a, enenlhet apietno la Espíritu, mamma nema akmaikama m’a. 18 Ennengko’o nhan nnengkek hengel·hatsoskeskamo malha ietamopai’a nengelapma nengaqta’ak, malha nhan ennengko’o akto nak ieiam appok nelanei’o nak nenga’at, apkelvet’o la ieiam appok lhaiek apkelvet’ak na apiavai’a apankek Eniapom Neten ma’a, niavengkek na aklhamakho aknem nennekho m’a aniem’o Espíritu.