2Cor 6 | TmfSC | STEP | Nenmakmesama ennengko’o Eniapom Neten, nellasnema nhan meltemeskesekhek koneng aktaqmanma nke nak apkellanei’o Eniapom Neten.

2 Corinthians 6

1 Nenmakmesama ennengko’o Eniapom Neten, nellasnema nhan meltemeskesekhek koneng aktaqmanma nke nak apkellanei’o Eniapom Neten. 2 Ka ktemo nak na aktalhesammalhka vakkahak Eniapom Neten Apaivoma hengke’e:

«Nietavek anke lhta asleng’o m’a, aspasmo nhan aknem ankok alhta songkek nenvongkasemmalhka nak tep ^{▼▼Isaias 49:8}», ntemak ma’a

¡Koka kolhvave nak nietavek ankek aknem ankok nenvongkasemmalhka nak tep!

Nellengaiangko akientalhnema

3 Mongeltemongvaiakmo lhma ennengko’o neksa nelpaieskama ania’a aktaqmanma kakpota melieniekhek aptaikamok meliaskeiam enenlhet’avok netlhekmosekamok alhta. 4 Ntasek nentaiangkolha, apvanka’ak elvetak enenlhet’avok nengelelto hengellasennaikama Eniapom Neten. Nelvaskapke lhta metka nempekheskama nelvetai’o akientalhnema, nelvaskapmek na neksa aimommalhka la qaselha enganko’ok, anmaiosak’a engelvalho’ok nahan. 5 Nelvaskapmek na m’a nengaqhengveiakmo nengaqlhengkasemmalhkelha, kakpota nhan apkeliepetkaseiam apieseksek enenlhet apkenmahai’a hennaqtevaksek, nelvaskapmek na m’a nenmakmekama akientalhnema metka nenteianma, metka nentoma nhan. 6 Apkeliave mota ketlhengkap neltaqmelkasemmalhkoho, neliave na akto have niapak anke iokhalhme, apkeliavek na ketlhengkap metka nelpekheskama kakpota nhan nalhep’avek engelvalho’ok angellanhok emmo’ok, apkeliavek na ketlhengkap apnaikamok engelvalho’ok Espíritu Santo, nengellasekhai’o nhan emmo’ok iokhalhmek engelvalho’ok. 7 Apkeliavek na nelpaieskama ania’a akto have niapak anke kakpota nhan hengaikamok nenmopvanka’a aniem’o Eniapom Neten. Nelapkaselhkek, nelammelhkek hengellammelhmakha la’a malha akieplomo nenmaikama nennapommalhka nak anko’ok akvesai’a akpeivomo.

8 Moklhem’a aknem hengeleliahakhave lhta mota, hengeltaqmelkaske lhta nhan, mo’ok aknem alhto ka hengeltaqnevak ma’a, hennaqtevaske lhta nhan ma’a, hengelleltaiangko lhta nhan nenmopvanka’a ania’a, koka iokhalhme mota netlheianma ennengko’o. 9 Hengeliekpelkavek niekhe ennengko’o m’a, koka mangkolatsema hengellanei’o m’a, malha aptaiangkok manghengeliekpelkemo la’a. Nketlhengkeskamave mota hengennapok ma’a, koka nkaqhok nheklhek nellaniemhaiangka mokhom, hengeltekpoikama nhan, man koka hengennapmak ma’a. 10 Malha anmaiosak’a engelvalho’ok hengeltemeskeskamak ma’a, koka avanhek ankek alpaihekha engelvalho’ok. Lhamakho aknem nellaniemhaikama metka qaselha engankok, koka nkaqhok nelpasmongkek enenlhet’avok kakpota etlhevangkok akiavai’a malha aknema apkelletsekama la’a aniem’o ania’a aktaqmanma nelpaieskama. Malha nhan nentaiangkok enenlhet la metka apkelletsekama, koka nnaiangkek niekhe qaselha alaimommalhkelha la’a ennengko’o.

11 Engelialheng’a ko Corinto, nelletsavhavek lhek neleltennasekama iokhalhmek ankek ma’a, malha nenmaieskama engvalho’ok la’a napaqtavek ketlhengkap. 12 Montangkok malha nellapekha la engvalho’ok napaqtavek ketlhengkap. Ketlhengkap koka apkellapakhak apvalho’ok nengaqtavek ennengko’o. 13 Askeleltavek na ketlhengkap etnangkok malha apkenmaiesaikamok apvalhok nehaqtek ko’o, ka astemakha nak ko’o, malha stemak na ko’o apiapma’ak la ketlhengkap.

Ngkolatsekama aniepetkangvomok mankolhno envalhok la’a

14 Meliepetkangvom ankek ketlhengkap apkeliaskeiam anak, mankapvankek epasmekhak apeivomo kakpota nhan mepeivomo, mankavankek na nkopasmekhak apommatema ka nhan ienaqtesa lhma nak. 15 Mangkavanke ngkoitek altakmanma apvalho’ok apieseksek anak ma’a Cristo kanhan Belial, nnavek na apieseksek enenlhet mei’askeiam la’a, kakpota nhan apiaskeiam la’a. 16 Mangkavanke nkolhnangkok qaselha akiokha la alanemmalhka akieto Eniapom Neten apnemakha, ketlhengkap na malha pa’at apnemakha Eniapom Neten apto memaskengvaiam. Lhnak nanek aptemak Eniapom Neten:

«Aloka ta, aiaihama ta nhan apieseksek ma’a, ko’o ta atnek Apveske ^▼▼Dios. pankok, etnangkok hata nhan askennemolhema».

17 Lhnak nane aptemak mokhom Apveske:

«Elentep hata apieseksek anak ham, elieniekha ta, menmangvomankek nan ma’a qaselha apanko’ok ma’a akmovana nak nkolpaisengkeskesek apvalho’ok. Netamen hata m’a anmok hata takha ko’o, 18 atnekhak hata apiapma’ak ketlhengkap, etnangkok na ketlhengkap eietkak apkelennava’ak kanhan ngkelvana’ak», lhnak nanek aptemak Apveske apto vanlha lhema aphapak aknema apmopvana apanke’.