2Cor 7 | TmfSC | STEP | Elialheng’a askellamelaiam, ka nkeniemai’ak ma’a apneskamo aplheianma hengellangkok hata Eniapom Neten, ntasek hengellalhnaskesek neliokha kanhan engvalho’ok aniem’o altamekha ngkollatsekama, antangkok neliokho engankavek nelalhnai’o aniem’o nellai’o Eniapom Neten.

2 Corinthians 7

1 Elialheng’a askellamelaiam, ka nkeniemai’ak ma’a apneskamo aplheianma hengellangkok hata Eniapom Neten, ntasek hengellalhnaskesek neliokha kanhan engvalho’ok aniem’o altamekha ngkollatsekama, antangkok neliokho engankavek nelalhnai’o aniem’o nellai’o Eniapom Neten.

Akpaihekha apvalhok Pablo apkeliaqmongkasekha mo’ok apvalho’ok Corintios

2 Elialheng’a, hengenmekho ta takha mokhom ketlhengkap ennengko’o, mongellaneiangkok ennengko’o nkoietemo napaqtavek ketlhengkap, man na annaktevaskamak ma’a, monnaqtevaskamok na angenmakmesamaha. 3 Momak’ak ko atlhenek apketselhnanemmap ketlhengkap, nkaqhok koka m’a nellamelakmek akno la mo’ok engelvalho’ok atlheianma, nlho ka la nkolhnemo mo’ok engelvalho’ok. 4 Iokhalhmek ankek alheianma nak avanhek ankek ammalhko evalhok askellan’o ketlhengkap ammelhanto evalhok ham. Niekhe nellengaiangko akiavai’a akientalhnema, avanhek ankek koka nhan asvaskapekho kanhan akpaihekha evalhok.

5 Avanhe lhta nellengaiangko ampo’o lhta nelvai’o nak hengke’e Macedonia, ma lhta angeliamposammalhka, nellammelhke lhta qaselha akmahai’a hennaqtevaksek ma’a kanhan ai’a engelvalho’ok. 6 Eniapom Neten koka apto hengiatekho niapom, apkapaskama Tito hengke’e kakpota antangkok netlhelhma’ak hengeliatekhok nahan. 7 Atse lhta apvalhok apvo’o Tito hengke’e, apsantamo ania’a apkelvesai’a ketlhengkap, apkenmahai’o lhna lhta hengelvetak ennengko’o. Nkellaioseskeskangkek na lhta apvalho’ok ketlhengkap aniem’o atlheianma mota apvalho’ok ko’o, avanhek na lhta nhan altaikama apvalho’ok aniem’o ko’o m’a. Koka avanhek na akpaihekha evalhok asleng’o ania’a apsenta Tito.

8 Asleng’a lhta anmaiosak’a apvalho’ok ketlhengkap aniem’o vakkahak alhta asnaktalheskeskama askellapaskeskama lhta ketlhengkap ham, hetneskaso lhta nhan ko’o akmaiose evalhok hengke’e. Kolhva koka nlheianvakhok evalhok ntasek askelapaskeskamo vakkahak alhta, amanie m’a altemeskeskamo lhna lhta anmaiosak’a apvalho’ok ma’a, koka iakvatakho lhna lhta ntemak ma’a. 9 Netamen atlheianvekho lhna lhta apvalho’ok mankolietemo aptaiangkolha, ka apkeliaqmongkasekho lhna lhta nhan mo’ok apvalho’ok ketlhengkap ham. Mpaiesakhe lhta nhan evalhok ko’o m’a anmaiosei’o lhna lhta apvalho’ok, aniemai’o koka m’a Eniapom Neten kakpota eliaqmongkasekhak na mo’ok apvalho’ok ketlhengkap ham, mannaqtevaskamak ennengko’o ketlhengkap. 10 Ntasek nkotaqmelkasok engvalho’ok nenvet’o la akmaoise nak envalhok aniem’o la Eniapom Neten, nkanek hengiaqmongkaskesakhek mo’ok engvalho’ok ma’a, angelvongkasalhkak hata nhan tep ma’a. Koka akmaiose nak envalhok aniem’o nak nalhepop hengaqhak ma’a. 11 Allaiosei’o lhna lhta apvalho’ok ketlhengkap neksa apkelietsatekamok vakkahak alhta astalheskama akiennaktema aspaioma askellaikamok, koka aniem’o nhan Eniapom Neten anmaiosak’a apvalho’ok ketlhengkap kakpota eliaqmongkasekhak mo’ok apvalho’ok neksa apnaqtevaskama asvesai’a hetlheianma ko’o, nketlheianvekhek na lhta nhan apvalho’ok asiamolhma ko’o, ka helatemmokkeskamo lhna lhta nhan alhenammalhka ko’o meleltemo alhenalhkak mokhom, apkellai’avek na lhta nhan ketlhengkap ma’a. Apkenmahai’avek nak helvet’ak, henmasmek nahan napokha, apkeliaqmongkaskesekho lhna lhta apkellelto apkenmahai’a henaqtevaksek. Kolhva koka nlheianvakhak evalhok melvanekhok ketlhengkap ma’a qaselha ngkolatsekama nak.

12 Ka asnaktalheskaso lhta vakkahak have asmahai’a angvammelhek ma’a apto apkammelhma, have nhan asmahai’a anio’ok apto nema ammelhma. Asnaktalheskaske lhtoka kakpota elvetak ketlhengkap vanlha mota neleltema nkoltaqmelek apkellangiemhaikama ketlhengkap ham napaqtek Eniapom Neten. 13 Kolhva koka nnek alpaieskakmo engelvalho’ok hengke’e aniem’o nhan nenlengai’a nema alpaieskeskaiam apvalho’ok ketlhengkap ham, nkelpaihakhek engelvalho’ok nelleng’o ania’a ketlhengkap apkelpaieskeskaiam apvalhok Tito neksa apnema ham.

14 Askeltennaske lhta ko’o Tito akhaikama ko evalhok ketlhengkap, neksa apvekha lhna lhta nhan Tito ham apkelvetangvektamo lhna lhta have niapak ankek lhamakho aktemakha astakha lhta askeltennasekama ania’a asketlheianma ketlhengkap apkelvesai’a ham. 15 Nketlheianvakhek na apvalhok Tito akieplomo apkellamelaiam ketlhengkap neksa aptaikama lhta amaika’a ham, avanhek na lhta nhan apkellai’o m’a, apkelleliehekho lhna lhta nhan. 16 Avanhek ko’o nhan akpaihekha evalhok nkanek avanhek moliaskeiam ketlhengkap.