2Jo | TmfSC | STEP |

2 John

Nema aklheianma envalhok

1 Ko’o asto metno apketkok nlhenkek evalhok lheia ^{▼▼Moklhem’a aklhenammalhka mota lhema ngkelvana, mo’ok koka nhan aklhenammalhka have ngkelvana, akietkesammalhka koka m’a iglesia.} akto amhama amanie kanhan atkak, Eniapom Neten apkeliekieskama lheia. Have niapak ankek askellamelaiam ketlhengka, have vanlha nhan ko’o askellamelaiam lheia, apkellamelaiakmek na ha’e aplhamakho apkellelto nhan apkeliangveiakmo akto nak have niapak anke. 2 Askellamelaiakmek aniem’o heietnema akto have niapak ankek engelvalho’ok, nkolhnangkok hata mota engelvalho’ok nengamelaiam anak. 3 Askeltavek ko’o Eniapom Neten kanhan Apketka Jesucristo eltaqmelkeskesek apkellangiemhaikama ketlhengkap ham, elietnahok na napaqta’a, ellangkok na altaqmelaikama apvalho’ok alleniem’o m’a aktonak haveniapak ankek kanhan nengasekhai’o.

Apkellanemmap melieniekhe apketlhekmoskama Cristo

4 Avanhek ankek lhta akpaihekha evalhok askelvetangvaktamo lhta moklhem’a atkak ham apkellaneiangko akto have niapak anke, apkanemakha nhan antangkok ennengko’o Eniapom ma’a. 5 Lheia ngkelvana amhama amanie, kolhva smak’ak altennaksek akieplomo askapiosekama naqtek lheia aktemakha nak hengellanemakha antangkok henganemakha: “Angellasekhalhkok na lhta mota ennengko’o”.

Have henganemakha alhnankok hengke’e astakha nak, nengetlhevaiangkek ennengko’o m’a sekhek anke lhta. 6 Enenlhet akietnema apkasekhai’o po’ok, apkeliehekho nhan asongkek apkanemakha Eniapom Neten ma’a. Apkellengai’a lhta ketlhengkap sekhek anke lhta apkanemakha Eniapom Neten ntasek ellasekhok po’ok.

7 Ka ngkanek ko’o asto lhkek askellano, mantek hengeliennengkeskama niapma’ak apkenmaikamok lhmankek ham, mankonmak’ak na etlhenek apvai’o Jesucristo hengke’e, aptaiekho nhan enenlhet apanke’. ¡Hengeliennengkeskama niapma’ak ma’a, apkellammelhma nhan Cristo! 8 ¡Ellaho ta m’a kakpota menaqtevasekhek qaselha altaqmanma apketlhevaikamo lhta aniem’o nenmakmekama lhta nhan ennengko’o m’a! Kakpota etlhevangkok hata nhan aksavhommalhko nkek nema akianmongkeskama akianmoma.

9 Enenlhet apto la apmahai’a eiaqmongkasekhak mo’ok hengetlhekmoskama lhta Cristo, have nhan nengaqtek Eniapom Neten ma’a. Koka apto la aptaqmelkeskama hengetlhekmoskama Cristo, koka apto apnemo lhemek Eniapom kanhan Apketka. 10 Ka apvo’o ta lhema enenlhet ham apsoiam la mo’ok aktemakha hengetlhekmoskama, ¡menmamonkek takha m’a, metnamo nkek na aktaqmanma apvai’a m’a! 11 Koka apto la nhan apmama takha m’a, etnek na aktaqmanma apvai’a m’a. ¡Apvanekho nhan meihamolhma m’a!

Aktakha nnelha apaivoma kanhan aklheianma apvalhok

12 Hai, ntase, mantek niekhe mokhom asmahai’a aleltennaksek ketlhengkap ma’a, man koka nkomak’ak allapaskesek astalheskama vakkahak. Ntasek koka aniakha ehenkek ham kakpota alpaqmetkeskakha asiokho ehenkek napaqtavek ketlhengkap ham, kakpota hensavhok alpaihekhak engelvalho’ok nelpasmekha m’a.

13 Nketlhenkek apvalho’ok atkak anak nialheng lheia, akto Eniapom Neten apkeliekieskama. Amen.