2Pe 2 | TmfSC | STEP | Apkakhaiangkek nak nanek apkeleltennasemmap ania’a apkenmopvanka’a ania’a apieseksek israelitas, elvak hata nhan kolhvave nak apieseksek anak ketlhengkap ma’a, etlhekmosangkok hata apkelielhaskeskamo qaselha mankoietemo, akmovana hentevaksek nahan, nkolammelhek hata apkelpakmeiasma Apveske apto lhta apkel·hatsoskekha neksa anmaikama meliamolhma, nkotlapkesek hato ka nema apnaqtevaskama m’a.

2 Peter 2

Hengetlhekmoskama meliamolhma

1 Apkakhaiangkek nak nanek apkeleltennasemmap ania’a apkenmopvanka’a ania’a apieseksek israelitas, elvak hata nhan kolhvave nak apieseksek anak ketlhengkap ma’a, etlhekmosangkok hata apkelielhaskeskamo qaselha mankoietemo, akmovana hentevaksek nahan, nkolammelhek hata apkelpakmeiasma Apveske apto lhta apkel·hatsoskekha neksa anmaikama meliamolhma, nkotlapkesek hato ka nema apnaqtevaskama m’a. 2 Aplhaniek hata nhan Jesucristo apkennemolhema elpasengvomok apkeltemengveiakmo lhma m’a, hata nha nkoniemak apkeliaskama apatno’ok apketlheianma ngkolatsekama ania’a aktaqmanma akto have niapak anke nak. 3 Ka apketsekama ania’a nak avanhek ankek hata nha ngkotnek apteniaikamok patakkom, elvetak hata m’a aniem’o aptaikamok apkenmopvanka’a ania’a, koka nkovak hato ka nhan iokhalhmek ankek nema aliaqmongkaskesekha’ apkeltemakha ngkollatsekama, lhennenga nhan nema akpeneskeskamo ngkolhek hata aliaqmongkaskesakho apkeltemakha m’a. 4 Mang nak nanek enmekhok takha Eniapom Neten ángeles apkellanekamok ngkollatsekama, apkelhakhangveiakmo m’a akieto nkospanei’akha talha, apnaktangveiakmo nhan lhema av’alhok ienaqtesakha lhma, koka m’a apkelel·halhanmek nkovak aknem aliekpelkammalhkelha ta nentaiangkolha. 5 Mang nak nanek na enmekhok takha enenlhet’avok anak meliamolhma apkennemolhema lhnak nanek Noé, apiangkanmo lhnak nanek iemmen akiavai’a takhaplhet’ok ma’a, vanlha lhnak nanek Noé apvaiakmo tep ma’a ngkanek apto apeivomo, kanhan apkelvaiakmo tep 7 apketkak. 6 Apnaqtevasekho lhnak nanek na Eniapom Neten apiav’akha temma Sodoma kanhan Gomorra, apvanlhekho akvakmo aptangkokho tahap ma’a kakpota elvetak enenlhet’avok ma’a aktemakha apkelvetai’a enenlhet’avok apkellanekamok ngkollatsekama. 7 Koka vanlha lhnoka apvongkeskamo tep Eniapom Neten Lot ma’a ngkanek apto apeivomo, aiosek nak na nentemak apvalhok apvetai’o apkeltemakha apkellanekamok ngkollatsekama meltaqmelkasemmakpo’ apkennemolhema m’a. 8 Koka apeivomo nak ma’a avanhek nak aplengaiangko akientalhnema apvetai’a mota ngkollatsekama kanhan aplengai’o mota apkelpakmeiasma ngkollatsekama apkennemolhema m’a.

9 Hai, apvankek Apveske elvongkesek tep neksa aliepkonma apkellelto la apkellanekamok qaselha altaqmelo, apvankek na elpokkenek apkellelto la meliamolhma kakpota eliaqmongkaskesekhak hata apkeltemakha ngkollatsekama akvo’o ta aknem neniekpelkammalhkelha m’a, 10 avanhek hata ngkotnek na nema aliaqmongkaskesekha apkellelto la apkeliaspongkoma apkellanekamok aliaspongkomakha apvalho’ok, apkeltaknongkoma nhan etnangkok apveske apanko’ok Eniapom Neten. Aliennaktema apvalho’ok ma’a, apkellatemmoktemo apkelveskai’e apanko’ok, mellai’o nhan nkoltaqneva qaselha alientalhnemo m’a neten, 11 niekhe nhan ángeles aknaikamok anak neten ankek apkeliennaktema kanhan apkelientalhnemo, man koka nhan nkoliakvakmok eltaknevak ma’a alientalhnemo apnaiangko m’a neten napaqtek Apveske, metlhok ma’a enenlhet’avok anak meliamolhma mellak’ak ma’a.

12 Koka enenlhet’avok anak meliamolhma mankollapvanka’ak nkolketmok apvalho’ok, mankolatsema nhan apkelpakmeiasma apkellan’o neksa meliamo qaselhaha, ka ngkanek nkonnapekhok hata nkavek meliamolhma apankavek ma’a, malha kaselha nevhak la’a akieploma nak aktekhanekamok akmangkolha la’a ngvakmek ma’a al·hanemmalhkelha, mmatnek na m’a. 13 Nnavek na m’a enenlhet’avok anak meliamolhma ellengangkok hata akientalhnema malha kaselha nevhak anak aniem’o melpeivomo, alleklemo mota apvalho’ok ellanangkok apkenmak’akha la ellana’, qaselha ngkollatsekama nke napaqtavek enenlhet’avok. Alleklemo mota apvalho’ok ellanangkok qaselha henmankaskama akvakho m’a apkaqnekhelha apieseksek ketlhengkap neksa aktakmelaikama lhma apanko’ok. 14 Vanlha mota apkellanekama po’ok enenlhet la aptava apkenmahai’a ellanakteksek ma’a, metka apkenmangveianlha nhan apkenmahai’a ellanangkok ngkollatsekama. Apkeliatengkek na ellanangkok qaselha ngkollatsekama nkoliennaktema nak apvalho’ok, vanlha nha mota alletsepma apnenio’ok patakkom ka ngkanek ngkolhek aliemetkaso m’a. 15 Apkelhakhangvakmek apkelieploma amai aktaqmanma, apketlhenengvakmek ma’a malha aktemo lhnak nanek apkeltennasemmap ania’a Balaam, Bosor apketka, apteniai’o lhnak nanek nkeskama patakkom aniem’o qaselha ngkolatsekama apkelanai’a, 16 koka aktaknongveiakmo lhnak nanek na malekka m’a mangkoltemo elanak qaselha mankoietemo.

17 Ka enenlhet’avok anak meliamolhma malha iamelket la metka iemmen, malha nhan iephopai’a la aksekha alhkaiam akmak’akha la nkoi’asekha, apketlhenammakpo nhan eniakhengvomok hata akieto ienaqtesakha lhma mankotnengvaianlha nnelha. 18 Etlhenakpo apankavek apkelammakpo, koka aqhemo m’a, apkenmopvanka’a ania’a, apkeliennengkaskek ma’a atlhenkeskama nak apkelvatesaikamok meliamolhma kakpota etnokhak mokhom alleniem’o nak ma’a aliaspongkomakha nak apvalho’ok. 19 Apkeleltennaskek niekhe nhan lhema apaivoma have niapak ankek etnangkokhak hata metka anmaikama mokhom meliamolhma, koka anmaikama niekhe nhan mangiamolhma m’a, nenlhamakho nengelelto nema allasennaikama nema apkelianmoma anko nak qaselhaha akto nhan hengenmaikama m’a. 20 Lhennenga apkeliangveiakmo aptemakha Apveske engankok kanhan Hengvongkeskamo tep Jesucristo, alpaqnemekho nhan mangiamolhma, koka netamen ma’a apkellaiangko mokhom malha alpathetvekha la mokhom maniamolhma, aptaikokho mokhom na neten ankek meliamolhma, mangkolhnok ma’a sekhek anke lhta. 21 Apkeliangveiakme lhta niekhe amai anak akpeivomo, koka netamen apkelieniekhek ma’a, meleliehekho nhan henganemakha aktaqmelo allanemakha etnangko niekhe m’a, ntase lhta niekhe meliangvomhe’ amai anak ma’a. 22 Nnavek na m’a apketlheianma na mota enenlhet, ntemak hengke’e:

«Nieklhek semheng, netamen ntavakhek mokhom akieklhema lhkek».

Ka ntak na mo’ok heng:

«Ietapomap la kolhva nema akienieskama, netamen la m’a apietnakhek koka mokhom aiseksek nialpa».