2Pe 3 | TmfSC | STEP | Elialheng’a askellamelaiam, hanet astalhesekho ntak vakkahak anak asmahai’a aleltennasangkok kakpota nkolketamangkok apvalho’ok akto akpeivomo nke.

2 Peter 3

Apvekta ta mokhom Apveske engankok

1 Elialheng’a askellamelaiam, hanet astalhesekho ntak vakkahak anak asmahai’a aleltennasangkok kakpota nkolketamangkok apvalho’ok akto akpeivomo nke. 2 Kotlheianvakho no apvalho’ok apketlhekmosekamo lhnak nanek apkeleltennasemmap ania’a annenga apkelpokkenammap, kotlheianvakho ta nhan apvalho’ok apkellanemakha etnangkok apveske apto henvonkeskama tep, kakpota nhan apketlhekmosekamo alhta nema allapaskama. 3 Eltaqmelkaso ta apkellailhemo asmak’akha atnek alheianma, hata aimelhko ta ketsek aktemongvanlha nnelha aknem elvak hata enenlhet anmaikama aliaspongkomakha nak apvalho’ok meliamolhma, eliematkesama ta ketlhengkap ma’a, 4 hata etnangkok ellanak ketlhengkap heng: “Ieee, malha apmopvana ania’a aplheianma Cristo evatak hata, apkeletsepaiakmek eniapma’ak, nheklhe mota aktemakha nellaniemhaikama ampai’o lhnak nanek nemo alanei’o lhmankek ham akvakmo nenvanlha nak”, hata etnangkok apkelvannaikama m’a.

5 Koka apkeltaikama apankek ma’a, apkeliavek niekhe Eniapom Neten apto apkellanai’a neten kanhan nalhepop mok apaivoma lhnoka, aiseksek iemmen noka nteiapmak lhepop anak, akiennaktemo nhan ma’a aniem’o iemmen. 6 Netamen nak ma’a lhamakho qaselha nenvetai’o nak lhmankek ham aktevasekho lhnak na iemmen. 7 Apkaiangko nhan apaivoma Eniapom Neten apkeltemo nkoietnama sekhek neten anak kanhan nalhepop anak nelvetai’o nak ennengko’o kakpota nhan nkonmetek ma’a akvo’o ta aknem aliekpelkammalhkelha ta nentaiangkolha, nema aknaqtevasekha nhan apkelelto apkellanekamok ngkollatsekama.

8 Elialheng’a, askeltavek eliohok lhema qaselha, mok aktema aknem apankok apkelietsatema Eniapom Neten, have kto nak ennengko’o, mil anio nak malha lhema aknem apkelanei’o napaqtek ma’a, nlho ka la nhan lhema aknem anak nelanei’o ennengko’o nenvanlha nak, koka mil anio niekhe apkelanei’o napaqtek ma’a. 9 Moklhem’a ketlhengkap nketlhenkek apvalho’ok aholhek aknem ngkovomok hata apvektanlha apveske aktemakha lhta nhan apeneskamo apaivoma, have koka niekhe m’a, vanlha apkelailhek metka apekheskama aplhamakho ketlhengkap eliaqmongkasekhak mo’ok apvalho’ok, meltemo niekhe eletsepok lhema aphapak la m’a. 10 Koka nkotlapkesek hata apvekta m’a Apveske, malha ta etnek enenlhet la apmenielhma, nkotvasalhkak hata neten anak nkalhkak hata alpaklhaiam ma’a, ngkolhek hata nhan alvanlhakho qaselha aknaikamo nak neten, kakpota nhan lhamakho qaselha aknaikamo nak nalhepop. 11 Hai’, lhamakho qaselha ta nkonaqtevasalhkak ma’a, ka ngkanek na ketlhengkap ntasek eltaqmelkasakpo mota, eleliehekhok na Eniapom Neten. 12 Eliavenkaso ta apkelel·halhanma nkovak aknem apkeliekpelkemelha Eniapom Neten aplhamakho enenlhet’avok, nkonietek hata neten anak, nkolpaihekhak hata nhan qaselha aknaiangko nak ma’a aniem’o talha alpaiesekha’. 13 Ennengko’o koka mongeliaskakmok apeneskamo lhta apaivoma hengeleltennaskama Eniapom Neten aktemakha alhnankok neten kanhan nalhepop, etnangkokhak hata ma’a apkelpeivomo kanhan apkeliamolhma apankavo ie’.

14 Ketlhengkap elialheng’a askellamelaiam, neksa apkelel·halhanma nkovak aknem anak ma’a, eteniamok hata apiempeiok elloka metka akmaska, kanhan metka apkeltemengveiakmo lhma kakpota elvetangvetak Eniapom Neten apvaktamo ta m’a. 15 Askeltavek na eliohok ketlhengkap Eniapom Neten metka apekheskama eiaqmongkasekhak nentemakha m’a, apkeltave niekhe la angelvongkasalhkak tep ma’a nenlhamakho, apnaqtalheskeskangke lhta nhan engeliepma’ak nellamelaiam Pablo aktemakha nak ma’a akieplomo koka apiangveiakmo aniem’o m’a Eniapom Neten. 16 Lhamakho lhta mota vakkahak aptalheskama Pablo aktemakha mota m’a aklheianma m’a, nientelhe lhta niekhe aniangvomhok ma’a moklhem’a aptalheskama, koka apkelietnokhaskeiakme mota m’a enenlhet’avok anak malha metka apqatko’ok anak, kanhan apkellelto nak nkoliennaktema nak meliaskeiam, apkelietnokhaskeiakme mota nhan lhamakho aktemakha aklheianma nak Vakkahak Eniapom Neten Apaivoma, ka ngkanek elvetak hato ka akiaqmoiekha aniem’o meliamolhma apankavek ma’a.

Aktakha nnelha apaivoma Pedro

17 Ketlhengkap elialheng’a askellamelaiam, askelientemongkasavek askellaskama amanie apkenmahai’a elvak ma’a, ¡ellaho ta enenlhet’avok anak meliamolhma apkenmahai’a mota eliennengkesek kanhan meliennakteskesek meliaskeiam anak! 18 Ntasek koka elvanengkesek lhamakho aknem nengamelaiam anak kanhan nenianveiakmo apkellaikamo lhta apveske engankok kanhan apto henvonkeskama tep Jesucristo. ¡Angeltakneskasangko toka apvesai’a m’a nenvanlha nak kanhan emanie nak metka nnelha! Amen.