2Th 2 | TmfSC | STEP | Ketlhengkap elialheng’a, nengeleltavek angellapiosama angelleltennaksek aktemakha nak ma’a apvaktamo ta apveske engankok Jesucristo kakpota hengankesekhak ennengko’o m’a,

2 Thessalonians 2

Amanie apvekta ta Jesucristo, evak hata apmanie m’a enenlhet meihamolhma

1 Ketlhengkap elialheng’a, nengeleltavek angellapiosama angelleltennaksek aktemakha nak ma’a apvaktamo ta apveske engankok Jesucristo kakpota hengankesekhak ennengko’o m’a, 2 mellanko nkek ngkolhek aliennengkaso, mennelhtengankek na neten apkelleng’o ta ania’a akvai’a aknem apvekta apveske Jesús, apketlheno la m’a enenlhet’avok anak ania’a aniem’o apkelvetaskeskama apaqto’ok Espíritu Santo, kanhan eleltennaksek hata aktemakha nengetlhekmosekamok ennengko’o neliokho engankave kanhan vakkahak nennaktalheskeskama lhta. 3 Koka mellanko nkek eliennengkeskak ma’a, amanie apvekta ta Apveske elvak hata apkellammelhma Eniapom Neten kakpota ellammelhek ma’a, eiephongvak hata enenlhet meihamolhma nkolhek hata aktevaso m’a. 4 Koka apto m’a apkammelhaikama Eniapom Neten, eniammelhek hata nhan lhamakho qaselha akietemo apkellai’o alleniem’o m’a Eniapom Neten. Avanhek hata ngkotnek ngkolatsekama, epekkanvomok hata aptanema akieto Eniapom Neten apnemakha, elhenakpok hata apankek na apto Eniapom Neten ma’a. 5 ¡Nkotlheianvakho ta mota apvalho’ok, askeleltennaskamo lhta mota qaselha ngkolatsekama nak neksa asnema lhta ham! 6 Apkeliavek ketlhengkap malha nema akiennakteskai’a ntemak ma’a enenlhet anak meihamolhma, koka eiephongvak hata m’a akietemo m’a aknem akmak’akha ta ngkotnek. 7 Nkenavek apeneskamo apkellanekha aptakha ngkolatsekama akielhammalhka m’a, vanlha koka aimelhko m’a nema aklekkeskama la nema akmangvai’a m’a, 8 netamen eiephongvak hata m’a. Koka evatak hata nhan ma’a Apveske akieplomo apkapommatema, apvatepnapma ta nhan nkotvaksek ma’a, metka apiennaktema ta nhan etnek ma’a. 9 Ka enenlhet anak meihamolhma m’a nkoniemak hata akpasmoma Satanas, nkankok hata nhan akiavai’a nkek apmopvana kakpota ellanak qaselha mongenatkeskama kakpota nhan qaselha hempelapkeskama akmovana ania’a. 10 Elanekhak hata aptakha m’a lhamakho aktemakha qaselha ngkolatsekama kakpota eliennengkesek enenlhet’avok apkellelto ta apkenmaikamok ma’a akieto apkenmaskengvaianlha ngkanek mankonmahai’ak enmankok takha akto have niapak ankek, mellamelaikama nhan ma’a kakpota elvongkasakpok niekhe tep ma’a. 11 Ka ngkanek Eniapom Neten eniapaksek hata akmovana nkoliennenkesek kakpota meliaskamek akmovana ania’a nak. 12 Netamen hata m’a ngkolhek hata aleltangko m’a apketselhnanemmap apankavek ngkanek apkeliaskakmek akto haveniapak anke, nkelleklemavek na apvalho’ok qaselha ngkollatsekama nak.

Eniapom Neten apkeliekieskama ko Tesalonica kakpota elvongkesek tep

13 Ketlhengkap elialheng’a apkellamelaiakmek Apveske, vanlha mota ennengko’o nentaikamok gracias Eniapom ngkanek apkeliekiesaiangkek tep nak nanek apmaniaie apankavek ma’a kakpota elvongkesek tep aniem’o Espíritu apkeltemeskeskamo nhan apkelpokkenammap ma’a aniem’o lhta meliaskeiam ketlhengkap ma’a ania’a akto have niapak. 14 Apkellavekama lhta Eniapom Neten aniem’o nhan ania’a aktaqmanma neleltennaskama sekhe lhta kakpota elpasengvomok ma’a apientalhnemo apveske engankok Jesucristo. 15 Ka ngkanek ntasek etlhengkesek meliaskeiam akiennaktema, melvankamankek na nellanemmalhkelha nak antangkok aniem’o vakkahak nennaktalheskeskama lhta nlho ka la nhan neliokho engankave lhta. 16 Jesucristo apto apveske engankok, Eniapom Neten apto eniapma’ak apto nhan hengellamelaiam, apkelpaieskaiam amota engelvalho’ok, hengellaiangko nhan aktaqmanma nkoie’ alel·halhnekama engelvalho’ok qaselha nkovak hata. 17 Nelelmalhnema nhan ma’a Eniapom Neten eliennakteskesekhok apvalho’ok, ellangkok nak apkeliennaktema kakpota ellanangkok, etlhenek na mota altaqmelo qaselha.