2Th 3 | TmfSC | STEP | Engelialheng’a, nengeleltavek na ennengko’o hengellelmalhneskesek kakpota envanka’ak angelpaiaksek ania’a aplhenammap Apveske lhmankek ham kakpota ngkotnek na aktaqmanma apkenmaikamok takha enenlhet’avok ka aktemo lhta ketlhengkap ham apieseksek anak.

2 Thessalonians 3

Apkeltemo Pablo nkolhek anmalhneskaso

1 Engelialheng’a, nengeleltavek na ennengko’o hengellelmalhneskesek kakpota envanka’ak angelpaiaksek ania’a aplhenammap Apveske lhmankek ham kakpota ngkotnek na aktaqmanma apkenmaikamok takha enenlhet’avok ka aktemo lhta ketlhengkap ham apieseksek anak. 2 Hengellelmalhneskes nahan kakpota hengeltaqmelkesek Eniapom Neten neksa apkenmahai’a hennaqtevaksek enenlhet meliamolhma, apkeltemengvekho lhma la’a apkeliaskeiam la nhan Eniapom Neten. 3 Eniapom Neten apto have niapak ankek apaivoma, elpasmok hata m’a kakpota nkoliennak meliaskeiam ketlhengkap, enmeivok hata nhan neksa akmahai’a la nkovak ngkolatsekama. 4 Nengeliavek ennengko’o ketlhengkap apkelleliahakhave mota nengetlhekmosekamo lhta, etlhengkesek hata nhan mokhom ma’a nengetlhekmosekamo lhta aniem’o Apveske engankok. 5 Nengeleltavek na ennengko’o elpasmok Apveske Jesús kakpota ellasekhok po’ok ka aptemo nak ma’a Eniapom Neten apkellamelaiakmek aplhamakho enenlhet’avok, ellangkok na apkeliennaktema kakpota elvaskapok neksa akvai’a la akientalhnema.

Aktaqmanma enmakmama mota

6 Ketlhengkap elialheng’a, akieplomo apvesai’a apveske engankok Jesucristo mangeleltok eliepetkangvomok engelialheng’a nentemo lheme nak akhemo nak apkellangiemhaikama metka apkenmakmekama nak kanhan melieplavkeskama netlhekmosekamo lhta. 7 Ketlhengkap koka ntasek elvanangkok nentaiangkolha lhta ennengko’o hengelvetai’o lhta ham, akietemo nke lhta nentaiangkolha m’a, 8 ma lhta antoiangkok nentekamok pan metka akianmoma la’a, nientelhek anke lhta mota nenmakmekama lhamakho aknem kakpota mongelientalhneskesek apvalho’ok ketlhengkap ham hengellangko nlho mota nentekamok. 9 Envanka’a nlho lhta niekhe angellelmalhnama hengelpasmoma aniem’o nelemhama enmaniaie ennengko’o, koka montaiangkok ma’a kakpota nhan etnangkok ketlhengkap ma’a nentaiangkolha lhta ennengko’o. 10 Neksa nelloma lhta apieseksek anak ham nellangke lhta nhan ennengko’o lhema henganemakha, ka ntemak hengke’e, enenlhet mankonmahai’a la emakmamaha, mankoietok na elhkak aptoma. 11 Nkanek nellengai’ak koka apkelvesai’a moklhem’a apieseksek anak ketlhengkap akhemo lhna ntemak apkellangiemhaikama, mankonmahai’a enmakmamaha, vanlha lhna mota apketlheianveiakmo aptakha la po’ok temma aptakha la nhan apkelvetai’a m’a. 12 Koka nentangkok nellano ennengko’o enenlhet’avok anak ma’a ntasek enmakmama kakpota elvetak aptekamok, nengeleltavek ennengko’o m’a aniem’o apientalhnemo apveske engankok Jesucristo.

13 Koka ketlhengkap engelialheng’a nengeleltavek ellanangko mota qaselha altaqmelo. 14 Hata apkelvet’o ta po’ok meliehekho vakkahak nennaktalheskeskama nak, meliepetkamankek ma’a kakpota nhan enmankangvomok ma’a. 15 Koka mellammelhankek na m’a, ntasek koka ennavaksek ma’a metka apkelpalhengkasekama, malha aktonak apkelialheng’a apankavek la’a.

Aktakha nnelha apaivoma Pablo

16 Hai, askeltavek Apveske apto aktaqmelaikama engvalhok aniapom ellangkok metka altaikama apvalho’ok neska akvai’a lhamakho aktemakha akientalhnema, etnangkok hata mota apketlhelhma’ak ma’a.

17 Ko’o Pablo astalheskama ehenkek hengke’e nlhenkek evalhok ketlhengkap, akieplomo nhan astalheskama asvesai’a ka ntema mota lhamakho vakkahak astalheskama. 18 Askeltavek na Apveske engankok Jesucristo eltaqmelkeskesek apkellaniemhaikama aplhamakho ketlhengkap ham.