2Ti 4 | TmfSC | STEP | Askeltavek ko etnek lheiap napaqtek Eniapom Neten kanhan Cristo Jesús apto ta nhan apvekta kakpota etnek apveske, eliekpelkok hata nhan aktemakha apkellanekamok aktaqmanma nlho ka la ngkollatsekama apkellelto nak aphalhnanko’ok kakpota nhan apkenmaskengvaiakmo,

2 Timothy 4

1 Askeltavek ko etnek lheiap napaqtek Eniapom Neten kanhan Cristo Jesús apto ta nhan apvekta kakpota etnek apveske, eliekpelkok hata nhan aktemakha apkellanekamok aktaqmanma nlho ka la ngkollatsekama apkellelto nak aphalhnanko’ok kakpota nhan apkenmaskengvaiakmo, 2 askeltavek na ko’o eltennaksek ania’a metka apkelvateskaiam lheiap ma’a, niekhe apvetai’a ngkolatsekama, aktaqmanma, nheklhek hato ka etnek aplhengkeskama m’a. Etneskes hata nhan malha apkeliangveskeskekho meliamolhma m’a, ennaves hata nhan, eleliatekho ta nhan etlhekmosangkok metka apkelpekheskama lheiap ma’a. 3 Nkanek nkovak hatelha aknem mankonmahai’a ellailhok hengetlhekmoskama akto have niapak anke, eliavenkasangkok hatelha nhan apkenmahai’akha la eteniangkok apanko’ok apankavek, elteniangkok hata nhan hengetlhekmoskama apketlhekmosekamok la’a aleklemelha la apvalho’ok ellailhok ma’a. 4 Apqapto’ok hata nhan ellangkokhak ania’a aktaqmanma nak akto have niapak anke, nkonmahak hata nhan ellailhok ania’a nema altennaikama lhennenga. 5 Koka lheiap etne ta apmopvana emankok apvalhok apvet’o la lhamakho qaselha ngkolatsekama, evaskap hata nhan neksa akvai’a akientalhnema, etne ta mota aptema evangelista lheiap, elana ta mota nhan aktaqmelo apkasennaikama Eniapom Neten.

6 Ko’o koka ketsek nkaimelhkak asketsepmakha, atnek hata kto nak malha nentoskama nak apmatnama nengaikamok la Eniapom Neten, 7 ngkanek heiasennaikama aktaqmanma nkek ma’a, astemengke mota nhan malha kto nak soldado apmopvana la ennapakpok, malha nhan astemak ma’a apkelpaivasemmap la’a apvaiam anak akiensasemmalhka nak, molvateskakmok na moi’askeiam. 8 Asiavek ko Apveske apto apeivomo hengiekpelkemo, heiangkok hata m’a akianmoma asnaksepma askelhnekha epatek aniem’o astema aspeivomo ngkotnek hata m’a akmo’o ta nkovak aknem aliekpelkammalhkelha nentaiangkolha, ellangkok hata nhan ma’a aplhamakho apkellelto nak melleskama elel·halhnama apvektanlha ta m’a.

Pablo apkeltemo etnentak amaika’a Timoteo

9 Elienlhanmo ta apekheskamo elhiemok hetnaienta la amaika’a lheiap hengke’e 10 ngkanek Demas heieniakhehe’, apmeiakhe lhta ma’a akieto Tesalonica apteniai’a qaselha meiaspongkomakha nak Eniapom Neten. Crescente lhtoka apmeiakhak ma’a akieto iokhalhma Galacia, Tito koka m’a iokhalhma Dalmacia, 11 vanlha koka Lucas apnekho hengke’e alhelhma. Askeltavek na eliama lheiap Marcos ham eiantementak na hengke’e kakpota hepasengvatak asmakmekama nak. 12 Tiquico lhtoka askapasak ma’a akieto Efeso. 13 Hata apkelhiakmo ta lheiap hengke’e hesantengkaso ta astalhnema apmokhetma apvenaktema lhta aspekkenekha akieto Troade apnemakha m’a Carpo, hata nhan vakkahak ehenko’ok alhta, koka nhan akto neten ankek ntasek esantak qaselha aiempek akiaqhapesammalhka aktalhesammalhka.

14 Altennasama ta nhan lhema ania’a lheiap, ka Alejandro lhta apto tavapak niapom apkeltekpoikama mangkolatsekama helanei’o m’a, Apveske toka eiaqmongkasekhak aptemakha nak helanei’o m’a. 15 Eniaho ta lheiap ma’a ngkanek mantek apkammelhma nengetlhekmosekamok anak.

16 Amanie lhta nema heiantemekha napaqtavek apkelientalhnema mamma lhta enenlhet hepasmoma la m’a kakpota hengio’ok, vanlha lhtoka ko’o askasennalhko ehenkek ma’a, helieniakhe lhta aplhamakho asketlhelhma’ak ma’a, koka askeltavek ko’o meiaqmonkasekhek Eniapom Neten apkeltemakha m’a. 17 Apveske lhtoka hepasmoma, heiaiangko nhan asiennaktema kakpota apaiaksek aklhamakho nkek ania’a aktaqmanma napaqtavek na aplhamakho metnangko nak judios, hevongkeskanke lhta nhan tep malha lhta ntemak iama akmeiva nak akmahai’a heiaqhek ma’a. 18 Hevongkesek hata nhan tep emanie nak neksa akvai’a maniamolhma, heiantemekhak hata nhan ma’a akieto neten aptemakha nak Apveske m’a. ¡Antangko ta mota gloria Apvesai’a m’a metka akvaiam annelha aliekaikamok iantelhkapa! Amen.

Aktakha nnelha apaivoma Pablo kanhan aklheianma apvalhok

19 Nketlhenke ta evalhok Prisca kanhan atava Aquila kakpota nhan apketkak apkennemolhema Onesiforo. 20 Askeltavek altennaksek lheiap apnakhe lhta Erasto m’a akieto Corinto, Trofimo lhtoka asnesakhak ma’a akieto apiav’akha temma Mileto ngkanek nenmaskema lhta nkaqhak ma’a. 21 Elienlhanmo ta evatak apmanie nak apkelhkaianlha nak pieiam. Ka nhan hengke’e Eubulo, Pudente, Lino, Claudia kakpota nhan aplhamakho elialheng’a hengke’e nketlhenkek apvalho’ok lheiap ham.

22 Askeltave ko’o Apveske Jesucristo etnek aplhelhma mota lheiap, kanhan Eniapom Neten eltaqmelkeskesek apkellaniemhaikama aplhamakho apketlhelhma’ak lheiap ham.