Act 15 | TmfSC | STEP | Apkelvai’ak nak judios apkelleniem’o iokhalhma Judea akieto Antioquia, ka apketlhekmoseiangko lhnak apkelialheng’a melvongkasakpek tep meliaqtemenangko la nekha tkok apkelammelhakha, aptemakha lhnak nanek Moises apkellanemakha etnangkok.

Acts 15

Apkaqnekha apkelemhama apmaniaie neten apankavek akieto m’a Jerusalen

1 Apkelvai’ak nak judios apkelleniem’o iokhalhma Judea akieto Antioquia, ka apketlhekmoseiangko lhnak apkelialheng’a melvongkasakpek tep meliaqtemenangko la nekha tkok apkelammelhakha, aptemakha lhnak nanek Moises apkellanemakha etnangkok. 2 – 3 Koka nkoihek nak apkellatemommap Pablo kakpota nhan Bernabe m’a, man nak nkolleklemok apvalho’ok aktemakha nak apketlhekmosekamok ma’a. Ka apkelvetai’o lhnak apkelemhama apmaniaie iglesia m’a, apkellapaskamo lhnak Pablo, Bernabe kakpota nhan aplhamakha apketlhelhma’ak akieto Jerusalen kakpota elpaqmetkasakpok nema allapaskamo kakpota nhan metno apketko’ok ma’a aktemakha apketlheianma apkeliaqtemenaikamok nekha tkok apkellammelhakha m’a. Ka apkeliekai’o lhnak iokhalhma Fenicia kakpota nhan Samaria, apkeleltennaseiangko lhnak ma’a nak hanet iokhalhma nak neksa apkeliekai’a ania’a aktemakha apkelvatesaikamok qaselha ngkolatsekama apkellanekamok metnangko judios kakpota meliaskamek na Eniapom Neten. Nkelpaihekhek nak apvalho’ok apkelialheng’a apkellengai’o ania’a m’a.

4 Netamen Pablo kakpota nhan Bernabe apketlhengekho lhnak mokhom apkelvekho Jerusalen. Ka apkenmaiangko lhnak takha apkellelto iglesia m’a, nema allapaskamo nhan kakpota nhan metno apketko’ok. Apkeleltennaiangka nhan Pablo kakpota nhan Bernabe lhamakho aptemakha apkellanekamok qaselha aniem’o Eniapom Neten. 5 Koka moklhem’a lhnak Fariseos apkakhaiangkok nak na m’a apkellelto meliaskeiam Jesús, apkelaqnekho lhnak neten, lhna aptaiangkok ma’a:

—Nkaimelhkek angeliaqtemenkeskasangkok nekha tkok apkellammelhakha m’a metnangko nak judios, angelleltok na elieplavkesek aktemakha nak ley Moises —lhna aptaiangkok ma’a.

6 Ka apkaqnekho lhnak mokhom nema allapaskamo kakpota nhan metno apketko’ok kakpota etlhenek aktemakha m’a. 7 Avanhek na ntemak apkellatemommap ma’a, ka apkenmekho lhnak neten Pedro, lhnak aptemak:

—Elialheng’a, apkeliavek ketlhengkap Eniapom Neten apto heliekieskama lhennenga kakpota altennama ania’a aktaqmanma apieseksek metnangko nak judios kakpota meliaskamek ma’a. 8 Apkeliekpelkavek Eniapom Neten apvalho’ok aplhamakho enenlhet’avok, apkenmaiangkek na takha m’a metnangko nak judios ka nkeniemai’ak apkellaiangko nhan Espíritu Santo, nnavek na aktemakha nak hengellanei’o ennengko’o. 9 Nennavek ennengko’o m’a metnangko nak judios anak, apkellalhnaskaskek apvalho’ok Eniapom Neten ma’a apkellelto nak meliaskeiam, nnavek na ennengko’o m’a. 10 Apkeliepkonkek Eniapom Neten ketlhengkap neksa apkelpatengkeskama mota akientalhnema nema altamesaikamok anak, nelieihengka’a nnenga kakpota nhan ennengko’o ma lhta angenmopvanka’ak angelpatmok akientalhnema nak. 11 Mongeliaskeiakmok ennengko’o angelvongkasalhkak hata tep metka akianmoma aniem’o hengeltaqmelkeskeskama ta apankek nellaniemhaikama apveske Jesús, nnavek na m’a metnangko nak judios —lhnak aptemak Pedro.

12 Lhamakho enenlhet nak apkelvanmeiangkok apkeltakmelkeskamavek nak apkelailheiangko m’a. Ka apkelempai’o lhnak na apkeleltennasekama Pablo kakpota nhan Bernabe lhamakho aktemakha apkellanai’a qaselha mongenatkeskama, qaselha hempelapkeskama nhan alleniem’o Eniapom Neten apieseksek metnangko nak judios ma’a, 13 ka apkelpeneskamo lhnak apkeleltennaikama m’a.

Netamen nak na m’a apkempai’o lhnak apkeltennaikama Jacobo m’a, lhna aptemak:

—Ellailho no elialheng’a asmak’akha atnek aleltennaksek kolhvave nak. 14 Hengelleltennasema lhta ania’a Simon aptemo amaika’a ampakhasekha nkek Eniapom Neten ma’a metnangko nak judios, apkeliekieskangkek na lhta kakpota etnangkok apkennemolhema apankek na m’a. 15 Nlheianmek nak nanek na ania’a apnaktalheskama apkeleltennasemmap ania’a lhennenga, lhnak na ne ntemak:

16 «Netamen hata m’a, avatamok hata mokhom ko’o kakpota apaklhenekhak mokhom qaselha aiempek akiaqnanma lhta, David alhta apkelanai’a m’a. Alanekhak hata nhan mokhom aktevasemmalhka lhta m’a, atnengkasekhak hata mokhom neten 17 kakpota eleliama ta Apveske napokha enenlhet’avok, kanhan metnangko nak judios apkellelto nhan askellavai’a ko’o. 18 Lhna aptemak Apveske apto apkelvetaskeskamo lhamakho qaselha lhennenga m’a» ^{▼▼Amos 9:11-12}.

19 Ka ngkanek ko alhenek ntasek meliasangke lhma metnangko nak judios apkellelto lhta apkelelpengkaiam apvalho’ok akieto apnakha Eniapom Neten. 20 Vanlha koka nkaimelhkek annaktalheskesek lhema vakkahak annavesaikama la m’a kakpota menmangvomek ma’a qaselha anko’ok anak nkollekhok akpaiseiam aniem’o qaselha akiokha alanemmalhka ankok ma’a, metnangkek na apkenmensangveiam alhma, metavankek na nentoskama akvaivekamok atsepma nak, metavankek na ema. 21 Ka ley anak Moises lhennenga nemo aleltennaskamo enenlhet’avok moklhem’a apkellavakha apkaqnekhelha la judios lhamakho aknem nennekhelha la sabado.

Nema allapaskeskama vakkahak aktalhesammalhka metnangko nak judios

22 Aplhamakho nema allapaskamo kakpota nhan metno apketko’ok ka nhan iglesia apkeliekiesaiangko lhnak apqanet enenlhet apkellelto neten apankavek apkeliaspommap apkelvesai’a Judas mo’ok nema altema Barsabas, kakpota nhan Silas, kakpota eltek apketlhelhma’ak Pablo kakpota nhan Bernabe neksa apketlhengama akieto Antioquia. 23 Ka apkellaiangko lhnak na lhema vakkahak kakpota etso’ok ma’a, lhna ntemak aktalhesammalhka:

Ennengko’o nema hengellapaskamo kanhan metno apketko’ok, kanhan engelialheng’a, nketlhenkek engelvalho’ok ketlhengkap engelialheng’a metnangko nak judios akieto ham iokhalhma Antioquia, Siria, kakpota nhan Cilicia.

24 Nelleng’ak ennengko’o ania’a moklhem’a nennemolhema apkenmeioiam ham apketsoiam mokhom ngkolatsekama apketlhekmosekamok kakpota nkoltemeskesek meliamo apkelieplavkesakha ketlhengkap ham, koka have ennengko’o nellapaskama ham. 25 – 26 – 27 Ka ngkanek angellapaksek engelialheng’a Judas kakpota nhan Silas, etnangkok apketlhelhma’ak Bernabe kakpota nhan Pablo, alletlhengkeskamo lhta nhan etekio’ok neksa apketlheianma mota apvesai’a apveske engankok Jesucristo m’a, hata elelpeiveskasekhak ketlhengkap netlheianma ania’a altemeskeskama meliamo apkelieplavkesakha ketlhengkap. 28 Koka nnekhek mo’ok atlheianma engelvalho’ok ennengko’o kakpota nhan Espíritu Santo kakpota mongelpatenkesek malha akientalhnema ketlhengkap, vanlha koka ntasek 29 metavankek nentoskama nak nengaqhema nengaikamok anak qaselha akiokha alanemmalhka ankok. Metavankek na ema, metavankek na nentoskama akvaivekamok atsepma nak, kakpota nhan metnangkek na apkenmensangveiam alhma manganemmalhkelha nak antangkok. Ka apkelleliahakho la ketlhengkap nema alaskamakha nak etnangkok, ngkotnek hata akpeivomo apkellanekamok ma’a. Hai, ntase ta ngkotnek ma’a.

30 Netamen apketlhengamo lhnak Bernabe, Pablo, Judas kakpota nhan Silas akieto m’a Antioquia, apkankeskekho lhnak apkelialheng’a m’a, apkellangkongvekho lhnak na vakkahak aktalhesammalhka. 31 Nkelpaihekhek nak apvalho’ok ma’a apkelietsateiangko vakkahak ngkanek alpaieskeskaiakmo lhnak apvalho’ok ma’a. 32 Judas kakpota nhan Silas apkellelto lhnak na apkeleltennasemmap ania’a, apkelpaieskeskaiakmo lhnak na apvalho’ok, apkeliateikokho lhnak na apkelialheng’a m’a. 33 Apkakhengvaiakmek nak ma’a moklhem’a knem, netamen apkeleltemo lhnak akpaiveskekha’ apkellanei’o Jesucristo apkennemolhema apkeleltemo nhan ngkoltaqmelama apvalho’ok ma’a, ka apkelelhiaiakmo akieto apkelempai’akha. ^{▼▼Mo’ok vakkahak nietnak versiculo 34, ka ntemak henke’e: Koka Silas nlheianmek apvalhok ntasek elhnekhak ma’a.} 34 – 35 Koka Pablo ka nhan Bernabe apkakhengveiakmek nak Antioquia apketlhekmoseiangko aktemakha apaivoma Apveske, apkelpasmekho nhan apentalhnema apkeltemo lhemek ma’a.

Mankolhnemo mo’ok apvalho’ok Pablo kanhan Bernabe

36 Ka netamen nak ma’a, lhnak aptemak Pablo apkanemo Bernabe:

—Nok, antangkok amaika’a mokhom lhamakho natemma nelempai’akha lhta sekha neleltennaikama apaivoma Apveske, kakpota nhan angeliohok aktakha apkellaniemhaikama m’a —lhna aptemak Pablo.

37 Koka Bernabe apmahai’o lhnak na eiantemama nhan Juan Marcos, 38 man noka nkoleklemok apvalhok Pablo m’a, lhna songkek Juan Marcos apkelhakhangveiakmo sekhe lhta akieto m’a Panfilia metnaiangko apketlhelhma’ak ma’a neksa apkelpaieskama ania’a. 39 Avanhek na ntemak apkellatemommap Pablo kanhan Bernabe, ka apkelhpanmo lhnak ma’a. Bernabe lhnoka apiantemekhak Juan Marcos ma’a, apkelkanantemo loma nemmen apkenmeiekho iokhalhma Chipre. 40 Pablo lhnoka apiantemekhak Silas kakpota etnek aplhelhma, ka apkelpaiveseiangko lhnak Jesucristo apkennemolhema m’a apkeleltemo eltaqmelkeskesek apkellaniemhaikama m’a Apveske neksa apketlhengama. 41 Ka aplhengamo lhnak ma’a, apkeliekai’o lhnak Siria kakpota nhan Cilicia, apkeliateikokho lhnak moklhem’a iglesia apkelvaianlha la’a.