Acts 16

Timoteo apketlhelhma’ak Pablo kanhan Silas

1Apvekhek nak Pablo m’a akieto iokhalhma Derbe kakpota nhan Listra, aplomaka lhnak na m’a lhema apketkok nema altameskama apvesai’a Timoteo, ngken noka akto judia mankoiaskeiam nak na m’a, apiapom noka apto griego. 2Ntasek na mota apketlheianma apkelialheng’a m’a Listra kanhan Iconio m’a apketkok anak Timoteo. 3Ka apmahai’o lhnak Pablo eiantemok neksa aplhengama m’a, koka amanie lhnoka apkeltemak ngkolhek akiaqtemenkaso nekha tkok apkammelhakha m’a kakpota enmankok takha m’a judios apkelvanlha la’a ngkanek aplhamakho apkeliamavek apto apiapom griego m’a. 4Ka apketlhengamo lhnak ma’a, apkeliekaiangkolha la na temma apkakhaiangkelha la apkelialheng’a, apkeleltennaseiangko lhnak ania’a m’a apkellanemmakpelha etnangkok apketlhevai’a nema allapaskamo kakpota nhan metno apketko’ok akieto m’a Jerusalen kakpota eleliehekhok ma’a. 5Aplhameiangkek nak moklhem’a iglesias, nkeliennaktengkek nak na meliaskeiam ma’a.

Akvetai’a apaqtek Pablo

6Pablo kakpota nhan apketlhelhma’ak apkenmahai’avek na niekhe elpaiaksek ania’a aktaqmanma iokhalhma Asia, koka Espíritu Santo lhnak meltemok ma’a. Ka apkeliekai’o lhnak konne iokhalhma Frigia kakpota nhan Galacia, 7apkelvekho lhnak nnelha lhepop ankok iokhalhma Misia. Apkenmahai’ak nak niekhe elentelhek iokhalhma Bitinia, koka Espíritu apankok Jesús lhnak meltemok ma’a. 8Ka apkeliekai’o lhnak iokhalhma Misia, apkelvaiakmo lhnak nekha iemmen aknaktetemmalhkelha loma nemmen akieto natemma Troade. 9Pelhasep nak aptemak ma’a, akvetai’o lhnak apaqtek Pablo lhema enenlhet ko Macedonia apkenengvai’o m’a, lhna ntemak akvetai’a apaqtek apkapiosemmakpo enenlhet ma’a:

—Elheng, hengelpasengvata akieto nak hengke’e iokhalhma Macedonia —lhnak aptemak enenlhet akvetai’a apaqtek ma’a.

10Ka akmaskemo lhnak akvetai’a apaqtek Pablo m’a, netamen neliangvakho lhta nhan ennengko’o m’a Eniapom Neten apkeltema angenmeiakhak ma’a Macedonia kakpota angelleltennaksek ania’a aktaqmanma m’a. Ka nellanakho lhta kolhvave ankek nelletsekama, netlhengo lhta nhan ma’a.

Nema altennaikama ania’a aktaqmanma akieto Filipo

11Ka nelkananto lhta loma nemmen akiavai’a m’a Troade, netlhengo nelpeivokho akiakiengveiam lhepop akhalhiengkaiam iemmen akvesai’a Samatrocia. Ka akto lhta mo’ok aknem nenmeiakho mokhom apiav’akha temma Neapolis. 12Netamen ma’a nenmeiakho natemma Filipo, ko Roma lhta apankok ma’a, akto neten ankek akiaspommalhka m’a akieto konne iokhalhma Macedonia, nengakhengvakho nhan moklhem’a aknem ma’a. 13Ka kto lhta sabado nennekhelha nenmeiakho neiava alvata akieto tep temma, lhta nellanemak apkaqnekhelha judios ma’a apkelelmalhnongkomakha la mota nhan. Ka nelvakho lhta m’a, nengakhengvakho neleltennasengka ania’a aktaqmanma moklhem’a ngkelvana’ak ma’a. 14Lidia lhta akvesai’a lhema ngkelvana, ko Tiatira lhna lhta m’a, ietamopai’a apmennave lhta alhakhama apkelelqama’ak alhto ka iama apkel·hanaktema. Nkai’avek na lhta mota Eniapom Neten ma’a, nkailhangke lhta nhan apketlhekmoskama Pablo aniem’o Apveske aptemeskeskamak ma’a. 15Netamen alhta akno aklavkeso konne iemmen kakpota nhan lhamakho aknemolhema, lhta ntak hengellano aioselhko m’a:

—Atlheno la apvalho’ok ketlhengkap asto ko’o have niapak moi’askeiam Apveske, ntasek eniakhengvakhak asnemakha —lhta ntak hengellano.

Hengelienlhanakmave lhta ngkelvana lhta m’a akvakmo lhta nellasekhangvakmo nhan ennengko’o.

16Lhema knem alhta ntak ma’a, nenmeiakho ennengko’o akietemelha apkelelmalhnongkomakha m’a, nelvet’o lhta lhema ngkelvana tkok nema annengkasekama aklheianmo lhta mota akmak’akha ta ngkotnek aniem’o akmaikama kasekapo av’alhok, avanhe lhta annaksepkeskama patakkom apkelveskaie nkok ma’a. 17Ka ampo’o lhta akiepleiam Pablo kakpota nhan ennengko’o ngkelvana tkok, ma lhta nkasak akveneiam nentamna’ak ma’a, lhta ntak:

—Ka enenlhet’avok anak ham apkellennengkasekama Eniapom Neten apto apnema nak netne kankoie, apkelva’ak apkenmahai’a etlhenek ania’a aktemakha nengelvongkasemmalhka ta tep —lhta ntak akveneiam ngkelvana tkok alhta m’a.

18Lhamakho aknem alhta akvenekama m’a akvakmo astengo lhta Pablo m’a, ka apengkakpo lhta neptamen, lhta aptak apkano kasekapok av’alhok:

—¡Koieniekha ngkelvana tkok anak aniem’o apvesai’a Jesús! —lhta aptak.

Kolhvavek anke lhta nieniakhak kasekapok av’alhok ma’a.

19Koka ma lhta nkolkok apvalho’ok apkelveskai’e nko’ok ma’a, ngkanek nketlheianmek na lhta apvalho’ok mennaksepek hata mokhom nkeskama patakkom aktemakha mota allaneskeskama m’a. Ka netamen ma’a apkelpatheto lhta Pablo kakpota nhan Silas, apkeliantemakho lhta napaqtavek apkelveskaie akietemelha apkaknaiangkelha mota enenlhet. 20Lhna aptaiangkok apkellanemo apkelemhama apmaniaie neten apankavek ma’a:

—Ka enenlhet anak hengke’e judios apkeltemeskeska’ak akiennoma lhma nengavakha nak. 21Apketlhekmosengkek mo’ok aktemakha apkeltemakha, koka ennengko’o nentangko romanos mangellapvankek angenmok takha ania’a, mangellapvankek na angelvanangkok —lhna aptaiangkok ma’a.

22Ka apkelvakhengvai’o lhna lhta enenlhet’avok Pablo kakpota nhan Silas, apkeleltemo lhna lhta apkelemhama apmaniaie ngkolhek al·hatsoskasengko apkelentalhnema m’a kakpota nhan ngkolhek aliaqpelhketangko akieplomo iamet neliaqpelhketma ankok. 23Mang na lhta elleskamak apkelleliaqpelhketaiangka m’a, ka aknemo lhna lhta nhan aliantemekho nengaqlhengkasemmalhkelha, apkeleltemo lhna lhta nhan lhema apkellanekama atong etaqmelkasok apkelanekama m’a. 24Ka aplengai’o lhna lhta nhan apkellanekama atong ania’a apkanekpelha etnek ma’a, ka apkellaqlhengkeskaiakmo lhna lhta nhan nnelha nkek pa’at konne m’a, iamet akpaihema lhna lhta nhan nkenmaiankok apmanko’ok ma’a.

25Neplhet pelhasep na lhta aptemak ma’a, apkelelmalhneiangko lhna lhta Eniapom Neten kakpota nhan apkennekmaseiangko himnos Eniapom Neten Pablo kakpota nhan Silas, ka apkellengai’o lhnak na apkeltemo lheme apkellaqlhengkasemmap ma’a. 26Mpelapkeskankek na lhta akvai’a akiavai’a akievhekama lhepop ma’a akvakmo alaktelhko lhna lhta ntemak avhok pa’at anmaikamok ma’a. Kolhvavek ankek na lhta nhan nkenmaihekhak lhamakho atno’ok ma’a, al·hatsosammalhko lhna lhta nha nke knonemaie cadena apmanko’ok aplhamakho apnaktemommap ma’a. 27Ka aplhatekhai’o lhna lhta apkelanekama atong apvetai’o anmaihekha lhamakho atno’ok ma’a, aklheianmo lhna lhta apvalhok apkeniaikamok apnaktemommap ma’a, ka apmamo lhna lhta pelettav akvenaktema apankok kakpota elieplhakpok apankek ma’a. 28Ka apvetai’o lhna lhta Pablo m’a, menieskamo lhna lhta apveneiangka m’a, lhna lhta aptemak apkanemo m’a:

—¡Have, meniaqhakpo apanke lheiap, nengakhangkek ennengko’o nenlhamakho hengke’e! —lhna lhta aptemak.

29Ka apkeltemo lhna lhta ngkolhek aksantengkaso talha nav’a atsaskeskama la lhma m’a, apkakhetaiangka lhna lhta nhan aptalhnema konne pa’at. Apvet’o Pablo kakpota nhan Silas, apkeltanentamo lhna lhta aptapno’ok napaqtave ma’a, apkelpelhiennongkek na lhta m’a aniem’o apkai’a m’a. 30Ka apkelentepkeskamo lhna lhta iokhalhma apkelaklhengkasemmap ma’a, apkelelmalhneiangka lhna lhta nhan, lhna lhta aptemak ma’a:

—¿Ko la atnek ko’o avongkasalhkak tep, he? —lhna lhta aptemak.

31Ka apkellatemmoiangka lhna lhta ma’a Pablo kakpota nhan Silas, lhna lhta aptaiangkok:

—Mei’askem koka lheiap apveske Jesús kakpota evongkasakpok tep, ka nhan apketkak apnemolhema —lhna lhta aptaiangkok ma’a.

32Ka apkeliantemekho lhna lhta apkelanekama atong apnemakha Pablo kakpota nhan Silas, apketlhekmoseiangko lhna lhta ania’a aplhenammap Apveske aplhamakho apkennemolhema ma’a. 33Pelhasep na lhta mokhom ma’a, ka apkeliantemakho akietnakha iemmen kakpota elienieskesangkok apkeliensema Pablo kakpota nhan Silas, netamen na lhta m’a apkellavkeskamo konne iemmen ma’a kakpota nhan lhamakho apkennemolhema apketkak. 34Ka netamen apkeliantemekho lhna lhta mokhom apnemakha apkelanekama atong, aptaveikokho lhna lhta nhan ma’a. Avanhek na lhta alpaihekha apvalho’ok aniem’o aptaiangko meliaskeiam Eniapom Neten.

35Nketsai’ak na lhta m’a, ka apkellapaskamo lhna lhta apkelientalhnakha apkelemhama apmaniaie apkellanekama atong apkeleltemo eleltennaskakhak apkelanekama atong nenmammalhkelha elpaqnemekhak Pablo kakpota nhan Silas. 36Ka apmeiekho lhna lhta apkelanekama atong apnakha Pablo, lhna lhta aptemak:

—Apkelientalhnakha apkelemhama apmaniaie lhkek aptaikamok ntasek nak lhek alentepkasekhak ketlhengkap, ¡eltaqmelkaso ta apkeltaqhekha! —lhna lhta aptemak ma’a.

37Koka lhna lhta aptemak Pablo apkellatemmoiangka m’a:

—Ennengko’o nhan nengeleltaiekho romanos, koka nkakhemave hengeliaqpelhketaiangkek napaqtavek enenlhet’avok, mang na hengeliantemekha amanie nkek apnakha hengiekpelkemo niapom, hengeliantemekho nhan akieto nengaqlhengkasemmalhkelha. Kolhva koka apkenmak’ak hengelpaqnemekhak apkelielhammakpo. ¡Mangkolatsema apkenmak’akha nak eltehek! Ntasek sekhe elelhiemok apkelientalhnakha apkelemhama apmaniaie nak kakpota hengelentepkasekhak apankavek ma’a —lhna lhta aptemak Pablo.

38Ka apkenmeiekho lhnak policias apkakhangkolha apkelientalhnakha apkelemhama apmaniaie apkelletsakheskamo lhna lhta ania’a. Apkennelhtengangkek na lhta neten ma’a apkellengai’o ania’a Pablo kakpota nhan Silas apkellelto nhan romanos. 39Kolhvavek ankek na lhta apkenmeiekhak apkelemhama apmaniaie apkakhangkolha Pablo kakpota nhan Silas kakpota ellasekhekhok ma’a, ka apkelentepkeskekho nhan ma’a nengaqlhengkasemmalhkelha, apkeleltemo lhna lhta enmeiakhak po’ok temma apiav’akha. 40Lhta netamen ma’a Pablo kakpota nhan Silas apkenmeiakho lhta aknemakha Lidia, apkelvetangvakho lhta nhan ma’a apkellelto apkelialheng’a, apkeliatakho lhta nhan, ka apkelentepo lhta nhan ma’a na temma lhta.