Act 17 | TmfSC | STEP | Ka apkelempaikokho lhnak mokhom apketlhengama Pablo kakpota nhan Silas, apkeliekangvekho lhnak na temma Anfipolis kakpota nhan Apolonia, apkelvekho m’a na temma Tesalonica, nietnengkek nak na apkaqnekhelha judios ma’a.

Acts 17

Akiennoma lhma natemma Tesalonica

1 Ka apkelempaikokho lhnak mokhom apketlhengama Pablo kakpota nhan Silas, apkeliekangvekho lhnak na temma Anfipolis kakpota nhan Apolonia, apkelvekho m’a na temma Tesalonica, nietnengkek nak na apkaqnekhelha judios ma’a. 2 Ka apmaiangko lhnak Pablo m’a aptemakha apankek na mota m’a, hanetolhem’a sabado aknem nennekhelha lhna ntemak apkellatemommap ma’a. 3 Apkelelpeiveskasekho nhan enenlhet’avok aktemakha aklheianma vakkahak Eniapom Neten Apaivoma aktemakha nhan apketsepma Cristo, aplhatekhangveiakmo nhan. Lhnak aptemak na Pablo:

—Ka enenlhet na lhta Cristo, Jesús alhta m’a —lhna aptemak.

4 Moklhem’a lhnak judios meliaskeiakmok ma’a, apkelpasmekho nhan Pablo kakpota nhan Silas ma’a. Meliaskeiakmo nhan aplhamakma griegos apkellelto apkellai’o mota Eniapom Neten, kakpota nhan alemhama amaniaie akto neten ankavek aliaspommalhka m’a. 5 Koka napokha judios apkeliaskeiakmek nak ma’a kakpota nhan apkeliasepkeskama. Apkelleliaiangka lhnak moklhem’a enenlhet meliamolhma apkellomakha apankek la amai kakpota eliasangkolhma lhamakho temma nak. Apkelteniaiangkek nak apiempeiok apkelentalhnengvaiakmo apnemakha lhema enenlhet apvesai’a Jason. Apkelleliaiangka m’a Pablo kakpota nhan Silas kakpota eliantemekhak napaqtavek enenlhet’avok kakpota eleltangkok meliamolhma m’a. 6 Koka man nak elvetekhak Pablo kakpota nhan Silas ma’a, netamen apkelpathetmo lhnak Jason kakpota nhan apkeltemo lhemek apkelialheng’a, ka apkeliantemekho apkelienioseikokho nhan napaqtavek apkelemhama apmaniaie, ka apkelveneiangka lhnak ma’a, lhna aptaiangkok:

—Ka enenlhet anak hengke’e apkeltemeskeskangkek lhamakho eiempek anak, apiennengkeskama lhma enenlhet’avok, kolhva apkelva’ak hengke’e, 7 Jason koka apto apkenmama takha. Ka enenlhet’avok anak meleliehekhok henganemakha apankok apveske ko Roma, apketlhenkek apnema po’ok apiav’akha apveske apvesai’a lhna Jesús —lhna aptaiangkok ma’a.

8 Ka apkellengai’o lhnak enenlhet’avok kakpota nhan apkelemhama apmaniaie m’a, nkeltaikama lhnak apvalho’ok. 9 Koka Jason kakpota nhan apkeltemo lhemek apkelianmongkeskangkek nak multa kakpota elpaqnemekhak ma’a, ka apkelpaqnemekho lhnak ma’a.

Pablo kanhan Silas akieto natemma Berea

10 Ka aptemo lhnak pelhasep ma’a, apkellapaskamo lhnak apkelialheng’a Pablo kakpota nhan Silas enmeiakhak natemma Berea, ka apkelentalhnengvaiakmo lhnak akieto apkaqnekhelha judios ma’a. 11 Apkeltakmelkasemmakpo apankavek nak ma’a judios, havek lhnak aptangko nak judios ko Tesalonica, apkelleltakmelkeskamavek nak apkellailhemo apketlhekmoskama Pablo. Apkelleliaiangka lhnak na Vakkahak Eniapom Neten Apaivoma kakpota elvetak have niapak ankek aptemakha apketlhekmoskama Pablo. 12 Apentelhek nak enenlhet’avok meliaskeiakmo m’a kakpota nhan enenlhet neten apankavek, ngkelvana’a nhan alemhama amaniaie ko Grecia. 13 Koka apkellengai’ak nak judios akieto m’a Tesalonica apkeltennaikama Pablo Eniapom Neten apaivoma natemma Berea, ka apkenmeiekho lhnak ma’a, apkeltemeskeskekho lhnak na mokhom apkeliennengkeskama lhma enenlhet’avok aniem’o apkellammelhma Pablo. 14 Ka apkelvetai’o lhnak apkelialheng’a m’a, apkeliantemekho lhnak Pablo nekha alvata, koka Silas kakpota nhan Timoteo apkakhaikokhek noka m’a natemma Berea. 15 Ka apmeiekho lhnak Pablo kakpota nhan apketlhelhma’ak apiav’akha temma Atenas, netamen ma’a apkeltaqhemo lhnak neptamna’ak apketlhelhma’ak. Apkeleltennaskekha ania’a Silas kakpota nhan Timoteo, aplheianma lhnoka Pablo etnangkok pekhai’a apkenmeiekha m’a akieto na temma Atenas kakpota eniaqnekhok ma’a.

Apkeltennaikama Pablo ania’a aktaqmanma akieto natemma Atenas

16 Apkelel·halhanmek nak Pablo Silas kakpota nhan Timoteo akieto m’a Atenas, ka apkaniemhaiangka lhnak apieseksek temma m’a, apvetangveiakmo lhnak ngkeskama qaselha akiokha apkellanekamok, avanhek ankek nak akiephesekama aploma Pablo m’a. 17 Ka apkellatemommakpo lhnak na m’a judios kakpota nhan metnangko judios apkellelto apkellamelaiam Eniapom Neten akieto m’a apkaqnekhelha. Apmeiekhek nak na Pablo akieto akietelha apkaknaiankolha la mota enenlhet, apkellatemommakpo lhnak na enenlhet ma’a lhamakho aknem. 18 Apketlhekmoskangkek nak Pablo m’a aptemakha Jesús kakpota nhan aktemakha nema apnaklhatekhaskeiam hata apieseksek apkenmaskengvaiakmo. Koka apkellammelhmek nak na m’a moklhem’a enenlhet apkelvesai’a Epicureos ^{▼▼Enenlhet nak ma’a aklheianmo apvalho’ok ntasek ellanak apkenmak’akha la ellanak kakpota ngkolpaiesekha mota apvalho’ok ma’a.} kakpota nhan po’ok apasmekha apkelvesai’a Estoicos ^{▼▼Koka enenlhet’avok nak ma’a apketlhekmoseiangko lhna mota apvanka’ak enmankok takha aliaspongkomakha nak apvalho’ok, mankaimommalhkak apkelpasmoma Eniapom Neten.}, lhna aptaiangkok:

—¿Se lha aplheno ham enenlhet anak aplhamasammap, he? —lhna aptaiangkok.

Lhnak na aptaiangkok apketlhelhma’ak:

—Malha nak apketlhekmoskama apkeltemakha dioses mo’ok apkellavakha —lhna aptaiangkok.

19 – 20 Ka netamen nak ma’a apkeliantemekho lhnak Pablo akietelha apkaqnekhelha apkelemhama apmaniaie apkellavakha nak ma’a akvesai’a Areopago, apkelelmalhneiangka lhnak ma’a, lhna aptaiangkok:

—Nengeleltavek ennengko’o angeliohok aktemakha lhnak lhkek apketlhekmoskama alhnankok mongvetai’o apsoiam lheiap —lhna aptaiangkok.

21 Lhna ngkanek enenlhet’avok ko Atenas kakpota nhan po’ok enenlhet apkellelto apkellomakha nhan ma’a, vanlha lhna mota apkeltemakha apkelelpengkamekho qaselha akvaiam la m’a, apkelteniai’a nhan ania’a alhnankok la’a.

22 – 23 Ka apkenmekho lhnak neten Pablo m’a aiseksek konne apkaqnekhelha apkelemhama apmaniaie m’a, lhna aptemak apkellanemo:

—Ellailhoho apkelennava’ak ko Atenas, neksa askaniemhaikama lhta asvet’o ngkeskama akietemelha apkelelteklheiangkelha aptapno’ok naqtek dioses apanko’ok kakpota ellahok ma’a. Avanhek apkenmahai’a ellaqhaskesama av‘alho’ok aklhamakho dioses ketlhengkap, asvet’o nhan lhema asota metka qaselha akiokha alanemmalhka la neten, vanlha iamet akpaihema nekha akieplomo aktalhesammalhka:

“Ka nke’e asota nak takhalhet apto dios mongelvet’o mokhom”, lhta ntak aktalhesammalhka.

Ko’o koka asiekpelkek ma’a apto apkellai’o na mota ketlhengkap neksa melvetai’a mokhom, asva’ak asmahai’a aleltennaksek Apvesai’a ketlhengkap ma’a. 24 Apto nhan apkelanai’a nalhepop kakpota nhan lhamakho qaselha lhmankek ham, apto nhan Apveske neten kakpota nhan nalhepop, melhnemak ma’a apnemakha nak pa’at apkellanai’a enenlhet apanke’. 25 Mankaimommalhkak na enenlhet la apasmoma m’a ngkanek apto nhan aniem’o apkellaikamok apkeliennaktema, apkellaikamok na apkelamnoma kakpota nhan lhamakho qaselha alaimommalhkelha la enenlhet’avok. 26 Ampai’akhasekhek ankek nak nanek na apkelanai’a lhema enenlhet, ka apkeleniemai’ak aplhamekho nak enenlhet’avok apkelloma nak lhma nkek ham, apto nhan hengeliekieskeskama aknem nenteiaianlha la iantelhkapa kakpota nhan apkeliekieskama akmak’akha la annemok. 27 Apkeltemavek nak nanek na Eniapom Neten ellempo pankavek enenlhet’avok apkelketansema, malha apkelpaqnemaikama la’a kakpota elvetekhak kelhaha ngkanek apnek nengaqtek ennengko’o Eniapom Neten, 28 hengellangkek apmopvana kakpota anlokaha. Lhta aptemak na lhema enenlhet apmopvana eltennama iokhalhma nak hengke’e:

“Ennengko’o nengelelto Eniapom Neten apketkak”, lhta aptemak.

29 Hai’, have niapak anke Eniapom Neten apketkak ennengko’o, have aptonak qaselha allanemmalhka akiokha oro, tavapak alienmomo akmopai’a kakpota nhan metaimong aktaqmanma apkellanekamok anak enenlhet’avok aniem’o aktemakha alietnaikama apaqto’ok. 30 Malha metka apqatko’ok enenlhet’avok lhennenga, meliekpelkemak na Eniapom Neten, mang koka eliaqmongkaskesekhak aptaiangkolha meliamolhma m’a. Kolhva koka apkeltavek Eniapom Neten lhamakho enenlhet eliaqmongkasekhak mo’ok apvalho’ok ma’a. 31 Eniapom Neten alhta apkeliekieskama lhema aknem kakpota eliekpelkok aktaqmanma, nlho ka la ngkollatsekama enenlhet’avok. Akietemo nkek hata etnek ma’a. Apkeliekieskamo nhan lhema enenlhet kakpota elanak ma’a, apkelvetaskeskamo lhta nhan enenlhet’avok ma’a aniem’o nhan aplhatekhaskeiam apieseksek apkenmaskengvaiakmo —lhnak aptemak Pablo.

32 Neksa apkellengai’a lhnak enenlhet’avok aktemakha nennaklhatekhangveianlha apieseksek apkenmaskengvaiakmo, ka apkeliematkesaiangka lhnak Pablo m’a, lhnak aptemak po’ok:

—Mo’ok aknem hata angetlhengkasekhok mokhom nellailhemo aktemakha aplheno nak lheiap —lhnak aptaiangkok ma’a.

33 Ka apteiapmo lhnak Pablo m’a. 34 Koka moklhem’a enenlhet nak meliaskeiakmok apketlhekmoskama Pablo ka apkelieplekho nhan ma’a. Lhema lhnak apkemhama apmanie apto neten apiaspommap apvesai’a Dionisio, apasmekha koka apkeniem’o Areopago, kakpota nhan lhema ngkelvana akvesai’a Damaris, kakpota nhan po’ok aplhamakha m’a.