Act 2 | TmfSC | STEP | Ngvaiakmek nak aknem aktaqmelaiangkelha lhma akvesai’a Pentecostes ma’a , apkaqnekhek nak aplhamakho apasmekho m’a.

Acts 2

Apvaiventanlha Espíritu Santo

1 Ngvaiakmek nak aknem aktaqmelaiangkelha lhma akvesai’a Pentecostes ma’a ^{▼▼Aktaqmelaikama lhma nak Pentecostes apankok trigo apnaklhemmap apielhna. Amanie koka m’a aktaqmelaikama lhma Pascua, netamen akvaiakmo knem 50 akiekai’a, nkompak na aktaqmelaikama lhma nak Pentecostes.}, apkaqnekhek nak aplhamakho apasmekho m’a. 2 Ka akpelapkeskamo lhnak apkellengai’a akiennaktema nkek amnoma aniemei’o neten. Malha alhkaiam akiennaktema lhna ntemak ma’a, nlanengvai’ak nak ma’a akieto apkakhangkelha konne m’a. 3 Ka alpelapkeskamo lhnak alenteiapvei’o aleivoma malha talha apietsekso’ok lhamakho enenlhet’avok ma’a apkelanemmakpo. 4 Apkelapvei’o lhnak na aplhamakho Espíritu Santo m’a, ka ampai’akha lhnak apkelpaqmetekama mo’ok apkelpaqmeiasma aniem’o m’a Espíritu.

5 Apkakhaiangkek nak na m’a akieto Jerusalen judios apankavek apkellamelaiam Eniapom Neten apkelleniem’o m’a lhamakho apkellavakha lhmankek ham, apkelpaqmeteiangka lhnak mo’ok aktemakha apkelpaqmeiasma 6 – 7 Apkeletkaiangkek nak ma’a akieto aklheianlha akiennaktema amnoma malha alhkaiam, avanhek ankek nak alpelapkeskama apkellengai’a apkelpaqmeiasma apkelvaianlha lhta sekhek ma’a apkelpaqmeiasma, lhna aptaiangkok:

—Ko Galilea enenlhet anak ha’e apkelpaqmetengka nak, 8 ¿se lha ntak nelleng’o nak apkelpaqmetekama nempaivoma engankavek nak nelleniem’akha lhta ennengko’o, he? 9 Nelpalhkalhkek ennengko’o hengke’e nelleniem’o mo’ok apkellavakha, ko Partia, Media, Elam, Mesopotamia, Judea, Capadocia, Ponto, Asia. 10 Frigia, Panfilia, Egipto, kakpota nhan iokhalhma’ akieto Libia, nengaqtek iokhalhma Cirene. Apkaqhangkek na enenlhet hengke’e apkelleniem’o ko Roma, 11 moklhem’a apkellelto judios apankavek, kakpota nhan po’ok aptaikamok kolhva judios. Apkakhangkek na hengke’e enenlhet apkelleniem’o Creta kakpota nhan ko Arabia. Nenlhamakho nenleng’ak apkelpaqmetengka nempaivoma ennengko’o aktakha nak qaselha hempelapkeskama aniem’o m’a Eniapom Neten —lhnak aptaiangkok enenlhet ma’a.

12 Nkeliemaskangkek nak apvalho’ok ma’a, alpelapkeskamo nhan aniem’o aktemakha apkelvetai’a m’a, lhna aptaiangkok apkelpaqmetkesammakpo mok apankavek ma’a:

—¿Sek la akvesai’a hengka ie, he? —lhna aptaiangkok.

13 Koka napokha enenlhet’avok nak ma’a apkeliematkesaikama lhnak apkellelto meliaskeiam ma’a, lhna aptaiangkok:

—Nkelieiha lhma ham, anmen na nkennapak —lhna aptaiangkok.

Ampakhasekha nkek apkeltennaikama Pedro

14 Ka apkenmekho lhnak neten Pedro m’a kakpota nhan 11 nema alapaskamo, lhna aptemak Pedro apiennakteskamo apaivoma:

—Ketlhengkap judios kakpota nhan ketlhengkap apkellavakha nak hengke’e Jerusalen, eltaqmelkaso no apkellailhemo asmak’akha nak atnehek alheianma. 15 Mankolieiha lhma enenlhet’avok anak ngkanek la 9 sosekhe ntahak, mankoietok aptangkolha nak apketlheianma ketlhengkap. 16 Ka aktakha nak apkelvetai’a ketlhengkap ngva’ak aknem aplheianmo lhnak nanek apkeltennasemmap ania’a Joel annenga, lhnak na nek aptemak:

17 «Lhke aptak Eniapom Neten, hata akvakmo ta nnelha aknem lhmankek ham, aiangkenek hata Espíritu ehenkok takhaplhet’ok aplhamakho enenlhet’avok lhmankek ham, apketkak apkelennava’ak kakpota nhan ngkelvana’ak nkotlhenek hata ania’a apankok aniem’o Eniapom Neten. Apketko’ok ngkoitek hata alvetai’a apaqto’ok, kakpota nhan apkelvaneiam apkelvanmongkoma. 18 Aiangkenek hata nhan Espíritu ehenkok takhaplhet’ok askellasennaikama apkelennava’ak kakpota nhan ngkelvana’ak, nkotlhenek hata ania’a ehenkok. 19 Alvetaskesek hata nhan qaselha hempelapkeskama neten, kakpota nhan qaselha mongenatkeskama nalhepop, ngkoitek hata ema, talha kakpota nhan akpanma eten akiavai’a. 20 Nkomaskok hata apommato aknem, kakpota nhan pelten eielhvaksek hata, malha ema ta etnehek ma’a, netamen nkovak hata aknem apankok Apveske akiavai’a aktaqmanma nkoie. 21 Nkolhek hata nhan alvongkaso tep aplhamakho apkelelto apkellavekama Apveske» ^{▼▼Joel 2:28-32}, lhnak nanek aptema m’a.

22 Ketlhengkap israelitas, eltaqmelkaso no mokhom apkellailhemo asmak’ak altennasangkok. Apkeliavek ketlhengkap Eniapom Neten nkeniem’ak ma’a apkelvetaskeskamo nak ketlhengkap apmopvana Jesús ko Nazaret, akiavai’a nhan apkellanai’a qaselha hempelapkeskama, qaselha mongenatkeskama nhan. 23 Koka ketlhengkap apkellangkongvaiakme lhta Jesús enenlhet’avok meliamolhma kakpota ennapok neten iamet aktenneskama m’a, apiamavek koka Eniapom Neten apmanie panke’ akmak’akha ngkotnek ma’a. 24 Netamen aplhatekhaskeiakme lhta nhan apieseksek apkenmaskengvaiakmo, apaknengkasekhe lhta akmaska nengetsepma, mankavankek mokhom ngkomangkok ma’a. 25 Lhennenga tep nak nanek aplheianmo lhnak apveske David aptemakha akmak’akha ta ngkotnek apkaniemhaikama Jesús, lhna aptemak:

«Asvet’ak ko Apveske ehenkok emanie mota, akieto nhan akiennakha ehektong ka ngkanek mamma enenlhet heievheskak ko’o. 26 Mpaihakhek ko evalhok, kanhan mpaihakhek av’alhok ehelhkok anak, niamposalhkek na asiokha nak akieplomo al·halhnekama evalhok atak hata aktaqmanma». 27 «Nkanek manheiamasangvomek lheiap akieto m’a ngkolatsenkelha apkeletsepmakha, meniangkek hata nhan ma’a nkokpelkalhkak apiempek apto apokkanma lheiap. 28 Heteskaskek amai akmaikamok ma’a metka aktemongvaianlha nnelha nenganiemhaikama, avanhe mota akpaihekha evalhok aniem’o astaikama alhelhma lheiap» ^{▼▼Salmos 16:8-11}, lhnak aptemak ma’a.

29 Elialheng’a, apkeliavek ketlhengkap David apketsepme lhta m’a, neliavek na ennengko’o nemakha aklhengkeskaianlha aphapak hengke’e. 30 Apkeltennasemmap ania’a lhnak na nek David ma’a, Eniapom Neten apkeltennaskangkek nak na nek lhema apaivoma juramento etnekhak hata apiav’akha apveske aptaven neptamen. 31 Apiamavek noka David elhatekhangvomok hata Cristo apieseksek apkenmaskengvaiakmo, ka ngkanek aplheianmo meietnemhek hata m’a aphapak Cristo ngkolatsenkolha apkeletsepma nak, mankokpelkalhkek hata nhan apiempek ma’a.

32 Jesús alhta m’a, nelvet’a lhta ennengko’o Eniapom Neten apto aplhatekhaskeiam ma’a. 33 Ka apiantemakho lhta nhan neten apneso napokha akieto akiennakha apoktong, apkaiangkek na Espíritu Santo. Kolhva koka Jesús apiangkenkek tekhenlhet’ok ennengko’o m’a aptemakha lhta nhan apaivoma apeneskamo hengeleltennaskama, ka nkeniem’ak ma’a apkelleng’o lhkek, kanhan apkelvet’o lhkek qaselhaha.

34 Ma lhta eniekhak neten apveske David, koka lhnak na nek aptemak:

«Lhta aptak Apveske aplheno Apveske ehenkok ko m’a: Elhnata neheqha akiennakha nak, 35 akvakmo ta asavho askakheskeskekta koneng apmankok apkelammelhmakha lheiap» ^{▼▼Salmos 110:1}, lhnak na nek aptemak.

36 Ellailhono enenlhet ko Israel, have niapak anke ketlhengkap apkeliaqlhaiangke lhta apmeiok apmankok neten iamet aktenneskama Jesús alhta, Eniapom Neten alhto ka aptemeskasak Apveske kanhan Cristo —lhna aptemak Pedro apkellanemo enenlhet’avok ma’a.

37 Avanhek ankek nak altaikama apvalho’ok apkellengai’o m’a, ka apkelelmalhnengvekho lhnak Pedro kakpota nhan apketlhelhma’ak nema allapaskamo, lhna aptaiangkok:

—Elialheng’a, ¿ko la antemeskesangkok ennengko’o m’a, he? —lhna aptaiangkok.

38 Ka apkatemmoiangka lhnak Pedro m’a, lhna aptemak:

—Eliaqmongkasekha mo’ok apvalho’ok, elvatesamok apkeltemakha ngkollatsekama, elteniamok nema allavkeskama konne iemmen akieplomo apvesai’a Jesucristo. Netamen Eniapom Neten etnama ta apankek meleliehekho apkellaskamakha, kakpota ellangkok na metka akianmoma Espíritu Santo. 39 Lhnak na nek aptemak Eniapom Neten Apveske engankok aplheianmo have niapak ankek ellangkok ma’a apkellelto apkeliekieskama, ketlhengkap, apketkak, kakpota nhan lhamakho enenlhet’avok lhmankek ham —lhna aptemak Pedro m’a.

40 Aplhengkeskangkek nak Pedro apkeleltennasekamok ma’a apkanemakha eltehek, lhnak aptemak:

—¡Elvongkasap tep apieseksek anak enenlhet’avok apkellanekamo mota ngkolatsekama nenvanlha nak! —lhna aptemak.

41 Nnengkek nak allavkeskamo konne iemmen apkellelto meliaskeiam aptemakha apkeltennaikama Pedro m’a, aplhameiangkek nak aptaikamok meliaskeiam Jesús ma’a, malha lhnak 3.000 enenlhet’avok ma’a. 42 Vanlha lhna mota apkellasekhai’o aktemakha apketlhekmosekamok nema allapaskamo, apkeltaiangkolha lhna lhta mota nhan apketlhelhma’ak, kakpota nhan aptaveikokho lhemek, kanhan apkelpasmekho apkelelmalhnongkoma m’a.

Aktemakha apkellangiemhaikama apmaniaie meliaskeiam

43 Nkeliemaskangkek nak apvalho’ok enenlhet’avok ma’a apkelvetai’o qaselha hempelapkeskama aktaqmanma nkek kanhan qaselha mongenatkeskama apkellanekamok nema allapaskamo. 44 Apkennaskesammakpek nak na lhamakho qaselha apanko’ok apkellelto meliaskeiam Jesús ma’a aniem’o apkaqnekho mota. 45 Apkeliamasmek nak na lhepop apanko’ok kakpota nhan lhamakho qaselha apankok, apkennaskesammakpek nak patakkom alaimommalhkelha la m’a. 46 Lhamakho knem nak apkaqnekha mota akieto Eniapom Neten apnemakha m’a, kakpota nhan apkelpasmekho m’a apkakhaiangkelha nentoma aktaqmanma. Aptaveikokho nhan nentoma nkek akieplomo alpaihekha apvalho’ok ma’a kakpota nhan allakhaiangka apvalho’ok. 47 Apkeliavenkaseiangka nhan apvesai’a Eniapom Neten ma’a, apketlhenammakpo lhnak na apkellelto apkeliamolhma m’a. Lhamakho knem na ntemak aplhamasekamok Apveske m’a enenlhet’avok knema ta alvongkeskama tep.