Acts 21

Apmeiekha Pablo natemma Jerusalen

1Nelpaivesalhke lhta ennengko’o engelialheng’a m’a, ka nenmeiakho loma nemmen nelkanantema nelpeivokho akieto natemma Cos. Mo’ok aknem alhta ntak ma’a nellempokho mokhom netlhengama akieto natemma Rodas, neliekangvakho lhta m’a netlhengo mokhom akvakho natemma Patara. 2Ka nelvetangvakho lhta loma nemmen akieto aknaktetemmalhkelha m’a kakpota nkoniakhak Fenicia, nelkananto nhan ma’a. 3Netlhengo m’a, nelvet’o akieto ensangkalvelha akiakiengveiam lhepop akhalhiengkaiam iemmen akvesai’a Chipre, nelieko’o nelvakho iokhalhma Siria, nelentepo nhan m’a akieto aknaktetemmalhkelha loma nemmen natemma Tiro. Nengakhengvakho lhta m’a ngkanek loma nemmen nne lhta alentepkaso nentoma atsekama m’a. 4Nelvetangvakho lhta nema altamesaikamok ma’a, nengakhengvakho 7 aknem apieseksek ma’a. Koka alhta aptangkok apkellano Pablo aniem’o nhan Espíritu meleltemo emhangkok akieto m’a Jerusalen. 5Ka akvakmo lhta 7 aknem ma’a, nenmak’o lhta angetlhong mokhom, nelelto lhta nhan netlhelhma’ak aplhamakho meliaskeiam, apnaqteiangka’a nhan, kakpota nhan apketkak akieto iokhalhma apkellavakha nak ma’a nekha alvata. Nelelteklhengko lhta nhan entapno’ok nalhepop ma’a, nelelmalhno lhta Eniapom Neten ma’a. 6Nelpaivesalhko lhta m’a, nelkananto loma nemmen, apkeltaqhakho lhta nhan enenlhet’avok ma’a.

7Ka nellempo lhta m’a Tiro nenmeiakho lhta akvakho m’a Tolemaida, amaika’a lhta nentangkok lhema knem engelialheng’a m’a. 8Mo’ok aknem alhta ntak ma’a, netlhengo akvakho natemma Cesarea, ka nentangko lhta nhan amaika’a apnemakha Felipe. Apto lhta evangelista m’a, apto lhta nhan lhema aphapak apieseksek 7 apketlhelhma’ak, vanlha lhta mota apkelpasmekama m’a nema alapaskamo apkenmakmekama lheme. 94 ngkelvana tko’ok alhta nhan apketkak ma’a Felipe, metka anakteiangka’a lhta, aleltennasemmalhka ania’a alhta nhan ma’a. 10Ka nengakhengvakho lhta m’a moklhem’a aknem. Netamen apvo’o lhta lhema apkeltennasemmap ania’a apkeniem’o Judea, Agabo lhta apvesai’a m’a. 11Ka apvakmo lhta akietnakha apiapnama Pablo m’a, apnakteto lhta apanke apmeio’ok kakpota nhan apmanko’ok, lhta aptak apkellano:

—Espíritu Santo lhkek apkeltemo alvetaskesek ketlhengkap hengke’e, ka apto la apiapnama hengke’e asnaktetkek emankok, emeiok, hata ngkolhek akto nema alanei’o m’a akieto Jerusalen apto apiapnama, ngkolhek hata angkongvakmok ma’a metnangko nak judios —lhta aptak ma’a.

12Neksa nellengai’a lhta ennengko’o kakpota nhan meliaskeiam ko Cesarea m’a, neleltennaso lhta Pablo meniakhek ma’a akieto Jerusalen. 13Koka lhta aptak Pablo hengellatemmongka:

—Mollaiose nke apvalho’ok ketlhengkap, meliapqalh ankek nahan, aniakha ta ko’o Jerusalen niekhe astetemmalhka ta m’a, niekhe nhan asmatnama ta aniem’o apvesai’a Apveske Jesús —lhta aptak hengellano m’a.

14Ma lhta eniasekhak Pablo nennaveskama, lhta nentangkok nellano:

—Ntase, ngkotnek hata nke apmak’akha etnek Apveske engangkok —lhta nentangkok ma’a.

15Netamen nellankesakho nelletsekama kakpota angetlhong angenmeiakhak Jerusalen ma’a, 16netlhelhma’ak alhta nhan moklhem’a nema altamesaikamok ko Cesarea. Hengeliantemakhe lhta nhan akvakho apnemakha lhema enenlhet apvesai’a Mnason apkeniem’o lhtoka Chipre m’a, apto lhta nhan lhennenga aptema mei’askeiam, apkelto nhan angaqhengvomok ma’a apnemakha.

Apathetammap Pablo

17Nelvakhe lhta akieto Jerusalen ma’a, nkelpaihakhe lhta apvalho’ok hengenmangko takha apkellelto engelialheng’a m’a. 18Ka akto mo’ok aknem neltangko nhan amaika’a Jacobo, apkakhaiangke lhta nhan aplhamakho metno apketko’ok ma’a. 19Ka apkelpaivesangko lhta nhan Pablo m’a, apkeltennangka lhamakho aktemakha apasmoma Eniapom Neten neksa apmakmekama mota apieseksek metnangko judios. 20Nkelpaihakhe lhta apvalho’ok apkelleng’o m’a, ka apkeliavenkaskesangka lhta nhan apvesai’a Eniapom Neten ma’a, lhta aptangkok apkellano Pablo:

—Eialheng Pablo, apvet’ak lheiap hengke’e mante pankek judios meliaskeiam Jesucristo, apketlhengke mota nkaimelhkek anlhengkesek mokhom neliehekho ley Moises. 21Koka apkellengai’ak na ania’a aktemakha apketlhekmoskama lheiap ma’a judios apankave nak apkakhangko m’a apieseksek metnangko nak judios, aplheianveiakmo lhna lhta lheiap ntasek elieniekhak ley Moises anak, ntasek na lhta nhan elieniekhak aptaiangkolha nak apkeltemeskesaikamok apkeliaqtemenkeskama nekha tkok apkellammelhakha apketkak, kakpota nhan ntasek na lhta nhan elieniekhak nentaiangkolha nak ennengko’o hengke’e judios. 22Koka kolhvave nak ellengak hata judios apvaktamo nak mokhom lheiap hengke’e Jerusalen, nkotiepok hatelha nhan akmaska. 23Nenmak’ak ennengko’o angeltennasama lheiap lhema qaselhaha kakpota mangkoitek akmaska hengke’e nenieseksa nak, apkakhangkek na hengke’e 4 enenlhet aimommalhkak elpenaksek aptangkolha lhta apkelpaqmeiasma etnangkok hata napaqtek Eniapom Neten ma’a. 24Eliantemekha ta lheiap ma’a enenlhet anak Eniapom Neten apnemakha kakpota elalhnasekhak apvalho’ok napaqtek ma’a, lheiap hata nhan enialhnasekhak apvalhok ma’a. Elianmongkeskes hata nhan patakkom apankok lheiap kakpota ngkolhek aliesesangko, kakpota elvetak aplhamakho enenlhet have niapak aplhengkeskama lheiap mokhom ley enganko’ok anak, kakpota nhan etlhenek ma’a akmovana ania’a aplhenammap lheiap.

25Koka metnangko lhta judios apkellelto lhta meliaskeiam Jesucristo, nellapaskaske lhta vakkahak atkok nennaktalheskama alletlhekmoskama m’a kakpota metavankek nentoskama apetek apkellaikamok la qaselha akiokha alanemmalhka ankok, metavankek na ema, metavankek na nentoskama akvaivekamok atsepma nak, kakpota nhan metnangkek na apkenmensangveiam alhma —lhta aptangkok ma’a.

26Mo’ok aknem alhta ntak ma’a, apkeliantemakho lhta Pablo 4 enenlhet ma’a akieto Eniapom Neten apnemakha, ka apkellempo lhta apkellalhnasekha apvalho’ok ma’a kakpota nhan Pablo. Ka aplheno lhta nhan napaqtavek enenlhet’avok ma’a akmak’akha ta ngkotnek nnelha’ apkelpeneskamo lhta apkelpaqmeiasma apkenmak’akha etnangkok hata napaqtek Eniapom Neten, ellangkok hata nhan qaselha nengaikamok Eniapom Neten.

27Nkama lhta akvaiam 7 aknem aksavhommalhkelha apkellalhnasekha apvalho’ok ma’a, moklhem’a judios apkelleniem’o Asia apkelvet’ak alhta Pablo m’a konne Eniapom Neten apnemakha, ka apkelentepkaso lhta akmaska m’a, apkelketamengko lhta kakpota elpathetek ma’a. 28Ngkelpaihema lhta nhan apatno’ok, lhta aptangkok ma’a:

—Enenlhet ko Israel, hengelvanengvata kakpota ampathetek enenlhet anak, malha apmaiangko lhma apketlhekmoseiangko lhamakho apkellavakha apkammelhekhek na nengavakha nak, ley engankok nahan, kakpota nhan Eniapom Neten apnemakha nak hengke’e. Apkellentalhneska’ak na griegos hengke’e, mangeltammalhkelha nak antangkok, aptevaskek na akto pa’at akpokkenammalhka nak —lhta aptangkok enenlhet’avok ma’a.

29Koka apketlhengke lhta apankavek ma’a ngkanek apkelvet’a lhta sekhek Pablo apiaihengka m’a apvalhok temma aplhelhma lhtoka Trofimo ko Efeso lhta m’a, apkellanemo lhta m’a eiantamak konne Eniapom Neten apnemakha.

30Ka apkellentepkaso lhta akmaska akiokho aiempek ma’a Jerusalen, apkeletkangko lhta nhan apnakha Pablo m’a, apkelpathetvakho, apiempeiok apkankavek alhta apteniangkok apkelentepkaso m’a, ka apkellapakho nhan atong Eniapom Neten apnemakha. 31Ketse’ lhta nkaimelhka apkellaqhemakha Pablo m’a, nietave lhta nhan apleng’o ania’a apveske apankok soldados romanos akteiapma akmaska akieto Jerusalen. 32Ka apkellankesakho lhta soldados apanko’ok ma’a kakpota nhan po’ok apkelemhama apmaniaie soldados, apkeletkakho lhta m’a akieto aktepakha akmaska. Ka apkelvet’o lhta enenlhet’avok apkelvo’o soldados ma’a, apkelvatesangke lhta apkeltekpoikama Pablo m’a. 33Koka apveske apanko lhta soldados ma’a apatheto lhta Pablo, apkelto nhan ngkolhek aknakteto hanet knonemaie cadenas, apkelelmalhnengka nhan enenlhet’avok ma’a, lhta aptak:

—¿Sek la enenlhet hengka ie, se lha apkelanei’o ie, he? —lhta aptak ma’a.

34Moklhem’a alhta nkelpaihema apatno’ok apketlheno lhema qaselha, po’ok alhta nhan mok aktema apketlheianma. Ma lhta eihok apveske m’a aktakha apketlheianma enenlhet’avok ma’a, ka apkelto lhta ngkolhek akiantemakho apkakhaiangkolha kempokhakme m’a. 35Apkelieplakhe lhtoka enenlhet’avok ma’a, ka apkelvakho lhta akietelha atong akiavai’a apkakhaiangkelha kempokhakme, apkelteiongvakho nelteianmeiangkolha metaimong, apkelpatmo nhan neten Pablo ngkanek avanhe lhta nema aktekpoikama apiempehek aniem’o enenlhet’avok ma’a. 36Ka alpaihengka lhta nhan apatno’ok mokhom neptamna’ak soldados, lhta aptangkok:

—Ellaqha, ellaqha —lhta aptangkok ma’a.

Apkasennammakpo panke Pablo napaqtavek enenlhet’avok

37Nketlhengkaske lhta elentalhneksek konne apkakhaiangkolha kempokhakme Pablo m’a, ka apkenmalhnengka lhta apveske soldados, lhta aptak:

—¿Ntase nlho apakmetkesek sekhe lheiap, he? —lhta aptak Pablo.

Mpelapkaske lhta apleng’o apveske aktakha apaivoma Pablo Griego, lhta aptak apkano:

—Ma nak ko aihamok apaqmeteiangka griego apaivoma lheiap. 38¿Have nlho lheiap Egipcio aptepkeskamo nak apkennapommap apkammelhma apveske ko Roma, apkankesekho nak na lheiap 4.000 enenlhet’avok apkenmopvanka’a ennapakpok akieto m’a iokhalhma metkelha temma, he? —lhta aptak.

39Ka apkatemmongka lhta Pablo m’a, lhta aptak:

—Have ko’o m’a enenlhet anak aplheno nak lheiap, judio apanke ko’o, ka asteiaianlha m’a natemma Tarso, akto neten ankek akiaspommalhka m’a akieto iokhalhma Cilicia. Heiangko no sekhe altennama napaqtavek enenlhet’avok anak hengke’e —lhta aptak Pablo.

40Ka apkasekho lhta apveske m’a, neksa apkenmaikama lhta m’a Pablo nelteianmeiangkolha metaimong, apkenengkasakho lhta nhan neten apmek apkeltemo elvanmak sekhek enenlhet’avok ma’a, ka apaqmeto lhta hebreo apaivoma, lhta aptak apkellano: